កាលពីជាង១០ឆ្នាំ តារាចម្រៀង សាពូន មីដាដា ធ្លាប់ជាតារាចម្រៀងដែលនិពន្ធចម្រៀងចាក់ដោតចំបេះដូងអ្នកគាំទ្រនិងពេញនិយមក្នុងស្រទាប់មហាជន។ ប៉ុន្តែបច្ចុប្បន្ននេះកេរ្តិ៍ឈ្មោះរបស់លោកមិនដូចមុនទៀតឡើយ ហើយអ្នកគាំទ្រស្ទើតែភ្លេចមុខរបស់លោកព្រោះ មិនឃើញរូបលោកចេញបទចម្រៀងថ្មីនិងឡើងច្រៀងលើកញ្ចក់ទូរទស្សន៍ ដូចកាលពីមុននោះឡើយ។ យ៉ាងណាមិញតារាដែលធ្លាប់តែរះចិញ្ចែងចិញ្ចាចលើមេឃាសិល្បៈរូបនេះបានចេញមកប្រកាសដោយក្ដីមោទកភាពថាខ្លួនមានអ្នកបន្តវេនបម្រើសិល្បៈហើយ ខណៈដែលខ្លួនលោកពេលនេះបានចូលនិវត្តន៍ហើយ។
ម្ចាស់បទ «និយមន័យស្នេហ៍» បានប្រកាសនៅលើបណ្ដាញទំនាក់ទំនងសង្គមកាលពីយប់ទី២២ ខែមេសា ឆ្នាំ២០២២ថា លោកចូលនិវត្តន៍ហើយ ហើយលោកក៏អាចប្រហែលជាទៅបួសនៅឯពុទ្ធគាយា ជាទីដែលព្រះពុទ្ធត្រាស់ដឹង ស្ថិតត្រង់ចំណុចព្រំប្រទល់ ឥណ្ឌា-នេប៉ាល់។ ក្រៅពីនិយាយថាខ្លួនចូលនិវត្តន៍ និងអាចទៅបួសហើយនោះ បុរសកូនពីររូបនេះបាននិយាយដោយក្ដីរំភើបដែរថាខ្លួនពេលនេះមានកូនស្រីច្បងដែលនឹងត្រូវបន្តវេនបម្រើសិល្បៈទី៧ របស់ជាតិហើយ ព្រមទាំងភ្ជាប់រូបថតជាច្រើនសន្លឹករបស់លោកជាមួយនឹងកូនស្រីបណ្ដូលចិត្ត សាពូន តារាភិមាន។
តាមរយៈរូបភាពដែលលោកបានបង្ហោះបានបង្ហាញឱ្យឃើញថាកូនស្រីរបស់លោក និងតារាសម្ដែង សឿ សុធារ៉ា ពិតជាស្លឹកឈើជ្រុះមិនឆ្ងាយពីគល់មែន ព្រោះក្មេងស្រីតូចរូបនេះក្រៅពីមានសម្រស់ស្អាតកាត់តាមអ្នកម្ដាយហើយនោះ ថែមទាំងមានទេពកោសល្យនិងដុងផ្នែកតន្ត្រីដូចជាឪពុកបេះបិទ ព្រោះដៃកាន់ដេញហ្គីតាសែនទំនងប្រៀបដូចទៅនឹងតន្ត្រីករអាជីព។
នេះគឺជាការលើកឡើងរបស់លោកនៅលើបណ្ដាញទំនាក់ទំនងសង្គមហ្វេសប៊ុកទាំងស្រុង៖ «ឪ ចូលនិវត្តន៍ហើយ ប្រហែលជាទៅបួសរហូតនៅឯពុទ្ធគាយា ( កន្លែងព្រះពុទ្ធត្រាស់ដឹង ព្រំប្រទល់ប្រទេស ឥណ្ឌា នេប៉ាល់ ) ឯណោះ កូនស្រីត្រូវបន្តវេនបម្រើសិល្បះទី7របស់ជាតិយើងណាកូនមាសឪពុក 
»
អ្នកគាំទ្រ ក៏ដូចជាមិត្តភក្ដិបានចូលមកសរសើរកូនស្រីរបស់លោកថាជាក្មេងឆ្លាត កាន់តែធំកាន់ស្អាត ថែមទាំងពូកែខ្លាំងមិនចាញ់ម្ដាយឪពុកនោះឡើយ៕
