មុននេះបន្តិចតារាសម្ដែងនិងតារាចម្រៀង ចន អេឡិចសូរ៉ា បានប្រកាសជាសាធារណៈថាលោកគឺជាតារាខ្មែរទីមួយហើយ ដែលបានឡើងនិងចុះភ្នំឱរ៉ាល់កម្ពស់១៨១៣ម៉ែត្រ ក្នុងរយៈពេលត្រឹមតែមួយថ្ងៃ ប៉ុន្តែលោកថាប្រសិនបើគ្មានមនុស្សម្នាក់នេះចាំជួយទេ លោកក៏មិនអាចសម្រេចភារកិច្ចនេះបានដែរ។
នៅថ្ងៃទី២៩ ខែមេសា ឆ្នាំ២០២២នេះ តារាសម្ដែង ចន អេឡិចសូរ៉ា បានចែករំលែករឿងដ៏រីករាយនិងអស្ចារ្យមួយនៅក្នុងជីវិតខ្លួននោះគឺលោកបានសម្រេចភារកិច្ចឡើងនិងចុះភ្នំឱរ៉ាល់ក្នុងរយៈពេលត្រឹមតែមួយថ្ងៃប៉ុណ្ណោះ ពោលគឺចាយពេលអស់១៣-១៥ម៉ោង ដើរដោយថ្មើជើង ក្នុងរយៈចម្ងាយ២០គីឡូម៉ែត្រជាង។
យ៉ាងណាមិញលោក អេឡិចសូរ៉ា ក៏ជម្រាបជូនដែរថាប្រសិនបើមានសិល្បកររៀមច្បងធ្លាប់បំបែកកំណត់ត្រានេះបានអាចជម្រាបមកកាន់លោកវិញ ថែមទាំងបបួលបងប្អូនសាធារណៈឱ្យឡើងកំពូលភ្នំឱរ៉ាល់ បំបែកកំណត់ត្រាចាស់ចុះភ្នំវិលល្ងាចរបស់លោកទៀតផង។
សម្រាប់ការសម្រេចបានជោគជ័យដ៏ធំលើកនេះ អេឡិចសូរ៉ា មិនភ្លេចអរគុណដល់រៀមច្បង តាន់ គីមសួរ ដែលបានចំណាយពេលកំដរនិងបង្ហាញផ្លូវលោក ទើបលោកអាចសម្រេចបានលទ្ធផលគួរជាទីគាប់ចិត្តបែបនេះ។
ប៉ាប៉ាកូនមួយរូបនេះក៏បានរំលឹកដែរថាប្រសិនបើខ្លួនបានហ្វឹកហាត់វិបស្សនានិងសមាធិជាមុននោះទេ ម្ល៉េះសមមិនដឹងថាលោកអាចគ្រប់គ្រងចិត្តច្របូកច្របល់បានឬអត់នោះទេ ព្រោះដំណើរការឡើងចុះនេះពិតជាមានឧបសគ្គខ្លាំងណាស់ បើមិនមានការតាំងចិត្ត អំណត់អត់ធ្មត់ និងការលើកទឹកចិត្តពីអ្នករួមដំណើរ ម្ល៉េះសមលោកមិនអាចសម្រេចជោគជ័យនេះបានឡើយ។
