លោក លី ហៀង អគ្គលេខាធិការរបស់ក្លិបបាល់ទាត់ភ្នំពេញក្រោន បានបញ្ចប់វគ្គសិក្សា Certificate of Football Management ដោយរៀបចំឡើងដោយ UEFA នៅប្រទេសស្វីស។
ក្រោយបញ្ចប់ការសិក្សាដោយជោគជ័យ លោក លី ហៀង បានបង្ហាញចំណាប់អារម្មណ៍របស់ខ្លួនថា៖ «ពីជនភៀសខ្លួនរហូតដល់ទទួលបានសញ្ញាបត្រ UEFA! សម្រាប់ខ្ញុំ ជីវិតគឺមិនមែនរឿងងាយស្រួល តាំងពីផ្លាស់ពីជំរុំជនភៀសខ្លួនពីប្រទេសថៃ រហូតទទួលបានសមិទ្ធផលដល់សព្វថ្ងៃនេះ វាគឺជាពេលវេលាដ៏មានមោទកភាពសម្រាប់ភាពរីកចម្រើនផ្ទាល់ខ្លួន និងក្រុមគ្រួសាររបស់ខ្ញុំផងដែរ។
ខ្ញុំចង់លើកទឹកចិត្តយុវជនឲ្យមានគោលដៅច្បាស់លាស់ ហើយប្រឹងប្រែងធ្វើវា។ ការអប់រំមានសារៈសំខាន់ណាស់សម្រាប់អនាគតកម្ពុជា។ ប្រទេសយើងត្រូវការយើង ហើយត្រូវការមនុស្សដែលមានការអប់រំ និងចំណេះដឹងបន្ថែមទៀតដើម្បីទៅមុខបន្តទៀត»៕