ប្រធានាធិបតីអ៊ុយក្រែន លោក Volodymyr Zelensky បានប្ដេជ្ញាថា នឹង«រំដោះ» ទឹកដី Crimea និង សាធារណរដ្ឋឯករាជ្យ Donetsk (DPR) និង Lugansk (LPR) មកវិញឲ្យបាន។
លោក Zelensky បាននិយាយបែបនេះតែប៉ុន្មានម៉ោងប៉ុណ្ណោះ បន្ទាប់ពីមានសេចក្ដីរាយការណ៍អំពីការបាញ់ផ្លោងរបស់យោធាអ៊ុយក្រែន លើអគារលំនៅដ្ឋាន ផ្សារ និង មន្ទីរពេទ្យសម្ភពមួយកន្លែងនៅកណ្ដាលទីក្រុង Donetsk។
ថ្លែងក្នុងសុន្ទរកថាវីដេអូមួយកាលពីយប់ថ្ងៃ ច័ន្ទ លោក Zelensky បានបញ្ជាក់ថា «យើងនឹងមកដល់ទីក្រុងទាំងអស់របស់យើង ទៅកាន់ភូមិទាំងអស់របស់យើងដែលមិនទាន់មានទង់ជាតិរបស់យើង»។ លោកអះអាងថា កងទ័ពរបស់លោកនឹងកម្ចាត់គូប្រជែងរុស្ស៊ី នៅភាគខាងកើតអ៊ុយក្រែន ហើយដណ្ដើមយកទីក្រុង Mariupol, Kherson, និង Melitopol មកពីកងកម្លាំងរុស្ស៊ីមកវិញ និងបេ្ដជ្ញាដណ្ដើមយក សាធារណរដ្ឋឯករាជ្យ Donetsk (DPR) និង Lugansk (LPR) ផងដែរ។
លោកបានបន្ដថា «ខ្ញុំស្នើសុំឲ្យអ្នករាល់គ្នាដែលមានឱកាសទាក់ទងជាមួយប្រជាជននៅភាគខាងត្បូងដែលរុស្ស៊ីកាន់កាប់ សូមប្រាប់ពួកគេថា នឹងមានការរំដោះ។ ហើយសូមនិយាយពាក្យនេះទៅកាន់ Gorlovka, Donetsk និង Lugansk ដោយប្រាប់ពួកគេថា កងទ័ពអ៊ុយក្រែននឹងទៅទីនោះយ៉ាងប្រាកដ។ ពិតណាស់ យើងនឹងទៅរំដោះតំបន់ Crimea របស់យើងផងដែរ។ សូមឲ្យមន្រ្តីរុស្ស៊ីគ្រប់រូបដែលបានរឹបអូសយកទឹកដីដ៏មានតម្លៃនៅ Crimea ចងចាំថា នេះមិនមែនជាទឹកដីដែលពួកគេនឹងមានសន្តិភាពនោះទេ»។
ទីក្រុង Donetsk និង Lugansk បានប្រកាសឯករាជ្យពីអ៊ុយក្រែន ២ថ្ងៃមុនការផ្ទុះជម្លោះនៅក្នុងខែ កុម្ភៈ ចំណែកតំបន់ Crimea បានបោះឆ្នោតយ៉ាងលើសលុប ដើម្បីចូលរួមជាមួយរុស្ស៊ីនៅក្នុងឆ្នាំ ២០១៤៕