ភាពយន្ត «Everything Will Be Ok» វណ្ណកម្មថ្មីរបស់លោក ប៉ាន់ រិទ្ធី គ្រោងនឹងចាក់បញ្ចាំងនៅក្នុងមហោស្រពភាពយន្តអន្តរជាតិកម្ពុជាលើកទី ១១ ។
ភាពយន្តឯកសារ ដ៏ល្បីល្បាញមួយនេះ ធ្លាប់បានទទួលពានរង្វាន់ខ្លាឃ្មុំប្រាក់សម្រាប់ស្នាដៃសិល្បៈ ឬ Silver Bear Outstanding Artistic Contribution Best Film Award ពីមហោស្រពភាពយន្តប៊ែរឡាំង ប្រទេសអាល្លឺម៉ង់ ។
«Everything Will Be Ok» បានលាតត្រដាងពីមនុស្សក្លាយជាទាសកររបស់សត្វ ហើយសត្វដណ្តើមយកអំណាចគ្រប់គ្រងពិភពលោក។ អ្នកនិពន្ធនឹងដឹកនាំភាពយន្តមួយនេះ បានផ្ដោតលើគោលគំនិតនៃលទ្ធិប្រជាធិបតេយ្យ និងលទ្ធិប្រជាធិបតេយ្យនិយម ដែលបានទទួលពានរង្វាន់ជាសាកលជាច្រើន។ ភាពយន្ត «Everything Will Be Ok» ជាភាពយន្តបែបស្រមើស្រមៃអំពីពិភពលោកមួយដែលត្រូវបានកាន់កាប់អំណាចដោយសត្វ និងឆ្លុះបញ្ចាំងពីព្រឹត្តិការណ៍ធំៗជាច្រើនដែលកើតឡើងក្នុងពិភពលោក នារយៈពេល ២ឆ្នាំចុងក្រោយ។
នេះជាភាពយន្តទី ២ ហើយបន្ទាប់ពីភាពយន្ត The Missing Picture ដោយលោក រិទ្ធី បានប្រើតួអង្គតូចៗសូនពីរូបចម្លាក់ពីដីឥដ្ឋរួមមានសត្វតូចៗ ដូចជា ជ្រូក ក្របី និងគោ និងបានបង្ហាញថា ពួកសត្វទាំងនេះបានយកឈ្នះលើមនុស្សដែលត្រូវបានធ្វើជាទាសករ។ ក្រៅពីប្រើតួអង្គដីឥដ្ឋ ក៏មាននិទានកថារៀបរាប់អំពីសាច់រឿងទាំងមូលរបស់ភាពយន្ត បង្កើតឡើងជាគំនិតច្នៃប្រឌិតថ្មីនៃភាពយន្តដែលប្លែកដាច់គេក្នុងសតវត្សទី២១។
យ៉ាងណាមិញ ភាពយន្ត «Everything Will Be Ok» ត្រៀមដាក់បញ្ចាំងជាការស្វាគមន៍ក្នុងកម្មវិធីមហោស្រពភាពយន្តអន្តរជាតិកម្ពុជាលើកទី ១១ រួមជាមួយនឹងការជួបស្វាគមន៍យ៉ាងពិសេសជាមួយអ្នកដឹកនាំរឿងផ្ទាល់ផងដែរ៕
សូមទស្សនាវីដេអូ Top News ៖
