ក្រៅពីការចាប់អារម្មណ៍លើកំឡោះតូច លីម តិចម៉េង ក្លាយជាម្ចាស់ពាន Cambodian Idol រដូវកាលទី ៤នេះ ក្នុងនោះ បុរសសង្ហាដែលជាម្ចាស់ឧបត្ថម្ភធំដែលឡើងប្រគល់ពាន ក៏បានធ្វើឱ្យនារីៗជាគាំទ្រកម្មវិធី Cambodian Idol ជ្រួលច្របល់ចង់ក្លាយជាតួឯកស្រី នោះគឺអ្នកឧកញ៉ា សំអាង វឌ្ឍនៈ ។ តើ អ្នកឧកញ៉ា សំអាង វឌ្ឍនៈ ជាអ្នកណា? តោះមកដឹងពីសាវតាខ្លះទាំងអស់គ្នាដូចតទៅ ៖
អ្នកឧកញ៉ា សំអាង វឌ្ឍនៈ គឺជាកូនប្រុស របស់អ្នកឧកញ៉ា សំ អាង ប្រធានក្រុមប្រឹក្សាភិបាល និងភរិយារបស់លោក អ្នកឧកញ៉ា ឈុន លាង បណ្ណាធិការរបស់ធនាគារវឌ្ឍនៈ ដែលកំពុងតែកាន់តំណែងធំៗ ដែលជាសមាជិកក្រុមប្រឹក្សាភិបាលក្រុមហ៊ុនវឌ្ឍនៈ និងមានតំណែងខ្ពស់ៗក្នុងបណ្តាក្រុមហ៊ុនបុត្រសម្ព័ន្ធនានា នៃក្រុមហ៊ុនមេ វឌ្ឍនៈផងដែរ។ អ្នកឧកញ៉ា សំ អាង មានកូនស្រី ២នាក់ផ្សេងទៀត គឺលោកជំទាវ សំអាង កាន្និកា និងលោកជំទាវ សំអាង លក្ខិណា។
អ្នកឧកញ៉ា សំអាង វឌ្ឍនៈ បានបញ្ចប់ការសិក្សារពីសាកលវិទ្យាល័យ Oxford ចក្រភពអង់គ្លេស ទទួលបរិញ្ញាបត្រជាន់ខ្ពស់ ផ្នែកវិស្វកម្ម សេដ្ឋកិច្ច និងគ្រប់គ្រង និងបានសិក្សាស្រាវជ្រាវផ្នែកអាជីវកម្មធនាគារ នៅធនាគារ Allied Irish ចក្រភពអង់គ្លេស ក្នុងឆ្នាំ២០០៥។ អ្នកឧកញ៉ា ជានាយកប្រតិបត្តិនៃក្រុមហ៊ុន វឌ្ឍនៈ ប្របភើធី អិលធីឌី និងជាអ្នកគ្រប់គ្រងគម្រោងសាងសង់សំណង់អគារវឌ្ឍនៈ កាពីតាល ដែលបានឈ្នះពានរង្វាន់ និមិត្តសញ្ញានៃការអភិវឌ្ឍមានទីតាំង នៅកណ្តាលរាជធានីភ្នំពេញ។ អ្នកឧកញ៉ា សំអាង វឌ្ឍនៈ ជាសហស្ថាបនិក និងភាគទុនិករបស់ ធនាគារ វឌ្ឍនៈ ហើយទទួលបានការតែងតាំងជា នាយកមិនប្រតិបត្តិ នៃក្រុមប្រឹក្សាភិបាល តាំងពីឆ្នាំ២០០២និង ជាសហស្ថាបនិក ភាគទុនិក និងជាអភិបាលនៃក្រុមហ៊ុន វឌ្ឍនៈ ប្រូវើរី ឯ.ក, ក្រុមហ៊ុន វឌ្ឍនៈ អ៊ិនវេសមេន លីមីធីត, ក្រុមហ៊ុន វឌ្ឍនៈ អេហ្វ & ប៊ី លីមីធីត, ក្រុមហ៊ុន វឌ្ឍនៈ កាពីតាល លីមីធីត, ក្រុមហ៊ុន វឌ្ឍនៈ ហ្គោល រីហ្សត ឯ.ក ។
អ្នកឧកញ៉ា សំអាង វឌ្ឍនៈ ត្រូវបានត្រាស់បង្គាប់ផ្ដល់គោរមងារទៅជាអ្នកឧកញ៉ា តាំងពីនៅថ្ងៃទី ២៦ ខែធ្នូឆ្នាំ ២០២០ ហើយរហូតមកទល់សព្វថ្ងៃនេះ អ្នកឧកញ៉ា សំអាង វឌ្ឍនៈ នៅមិនទាន់មានដំណឹងមានគូរគាប់គ្រងបេះដូងនៅឡើយទេ។
តាមការលើកឡើងរបស់នារីៗនៅលើបណ្ដាញសង្គមបានឱ្យដឹងថា បើទោះបីជាអ្នកឧកញ៉ានៅកំឡោះយ៉ាងណាក៏ដោយ ក៏គេមិនមានហ៊ានសូម្បីគិតថា Add Friend នៅហ្វេសប៊ុក ហើយថែមទាំងមិនហ៊ានស្រម៉ៃលើសពីការពោលសរសើរឡើយ ពោលគឺពួកគេបានត្រឹមតែលើកសរសើរនូវភាពស្រស់សង្ហារបស់អ្នកឧកញ៉ាប៉ុណ្ណោះ និងស្ញើចសរសើរចំពោះទឹកចិត្តការលើកស្ទួយវិស័យសិល្បៈតាមកម្មវិធីប្រឡងចម្រៀងលំដាប់ពិភពលោកបែបនេះ។ គ្រប់គ្នាពិតជាចង់ឃើញឱ្យការរីកចម្រើននៃវិស័យសិល្បៈខ្មែរគ្រប់ទម្រង់ និងរំពឹងថា សិល្បៈខ្មែរនឹងកាន់តែបោះជំហ៊ានកាន់តែខ្លាំងឡើងៗ៕
