ក្រុមជើងឯកតាមពូលនីមួយៗនៃវគ្គជម្រុះពានរង្វាន់បាល់ទាត់យុវជនក្រោមអាយុ២០ឆ្នាំប្រចាំទ្វីបអាស៊ី 2023 AFC U-20 Asian Cup qualification សុទ្ធតែទទួលបានឱកាសឡើងទៅប្រកួតវគ្គ១៦ក្រុមចុងក្រោយ ក្នុងជុំផ្ដាច់ព្រ័ត្រ ដែលគ្រោងរៀបចំនៅប្រទេសអ៊ូបេគីស្ថាន ក្នុងខែមីនា ឆ្នាំ២០២៣ខាងមុខ។
ក្រុមជាសមាជិកទ្វីបអាស៊ីទាំង៤៤ក្រុមបានចូលរួមប្រកួតក្នុងវគ្គជម្រុះ 2023 AFC U-20 Asian Cup qualification នេះដោយបែងចែកជា១០ក្រុម ហើយក្រុមលេខ១តាមពូលនីមួយៗមានឈ្មោះឡើងទៅជុំផ្ដាច់ព្រ័ត្រ ខណៈម្ចាស់ផ្ទះអ៊ូបេគីស្ថាន មានឈ្មោះដោយស្វ័យប្រវត្តិ។ ចំណែក៥ក្រុមផ្សេងទៀតគេជ្រើសរើសយកក្រុមចំនួន៥ដែលមានចំណាត់ថ្នាក់ល្អជាងគេបើធៀបក្រុមលេខ២មកពីសមាជិកទាំង១០ពូល។ ប៉ុន្តែអ្វីៗមិនទាន់ច្បាស់ការ១០០% សម្រាប់ក្រុមចំណាត់ថ្នាក់លេខ២ល្អ ព្រោះពូល H មិនទាន់ប្រកួតនៅឡើយនោះទេ។
ពានរង្វាន់ 2023 AFC U-20 Asian Cup ជុំផ្ដាច់ព្រ័ត្រ គ្រោងធ្វើឡើងនៅថ្ងៃទី១ ដល់១៨ ខែមីនា ឆ្នាំ២០២៣ នៅប្រទេសអ៊ូប៊ែគីស្ថាន ដោយក្រុមទាំង១៦ ត្រូវបែងចែកជា៤ពូល ខណៈក្រុមលេខ១និងលេខ២តាមពូលមានឈ្មោះ បន្តកៅអីឡើងទៅវគ្គ៨ក្រុមចុងក្រោយហើយបន្តជម្រុះដល់វគ្គផ្ដាច់ព្រ័ត្រ។
អត្ថបទពាក់ព័ន្ធ៖ម្ចាស់ផ្ទះតាហ្ស៊ីគីស្ថានឡើងទៅជុំបន្ត ខណ:កម្ពុជា, សិង្ហបុរី និងលីបង់ ហាលអាវត្រលប់ទៅផ្ទះវិញ
ពានរង្វាន់ AFC U20 Asian Cup រៀបចំដំបូងតាំងពីឆ្នាំ១៩៥៩ ដោយធ្វើឡើងរាល់១ឆ្នាំម្តង ប៉ុន្តែរហូតដល់ឆ្នាំ២០០៨ មានការផ្លាស់ប្តូររៀបចំរាល់២ឆ្នាំម្តង។ ក្រុមកូរ៉េខាងត្បូង ឈ្នះជើងឯកបានច្រើនលើកជាងគេរហូតដល់១២ដង ស្របពេលដែលបច្ចុប្បន្ន ក្រុមលេខដល់លេខ៤ មានឈ្មោះតំណាងឱ្យទ្វីបអាស៊ីចូលរួមប្រកួតពានរង្វាន់ FIFA U20 World Cup ផងដែរ៕
