តារាចម្រៀង ករុណា ពេជ្រ ត្រូវបានគេដឹងថា ខកខានចេញបទចម្រៀងនៅផលិតកម្មថោនអស់រយៈពេលយូរណាស់ដែរហើយ នោះក៏ដោយសារតែលោកមមារញឹកជាមួយរបរក្រៅសិល្បៈ។ ក៏ប៉ុន្តែថ្មីៗនេះ លោកបានត្រឡប់មកសិល្បៈចម្រៀងលើកនេះ តារាចម្រៀងរូបនេះ បានធ្វើឱ្យមហាជនចាប់អារម្មណ៍ខ្លាំងជាង ដោយសារតែបទចម្រៀងរបស់លោក គឺសុទ្ធតែបង្ហាញពីសក្ដានុពលទេសចរណ៍តាមតំបន់នៅក្នុងប្រទេសកម្ពុជា។
ជាក់ស្ដែងនាពេលថ្មីៗនេះ លោក ករុណា ពេជ្រ បានបញ្ចេញបទចម្រៀងមួយបទដែលមានចំណងជើងថា «ភ្នំព្រឹកនឹកភ្នំពេញ» មិនថាតែអត្ថន័យនៃបទចម្រៀង ឬរូបភាពនោះទេ គឺលោក និងក្រុមការងារចុះផ្ដិតយកនូវទេសភាពដ៏ស្រស់ត្រកាលតែម្ដង។ បទនេះទទួលបានការគាំទ្រច្រើន នៅពេលដែលហ្វេនរបស់លោកក៏បានបញ្ចេញមតិលើកទឹកចិត្តដល់ចំពោះការចូលរួមលើកស្ទួយតំបន់ទេសចរណ៍ក្នុងស្រុកនេះដែរ ព្រោះលោកជាសិល្បករម្នាក់ពិតជាបានចូលរួមជួយសង្គមជាតិស្ដែងតាមរយៈការបង្ហាញបទចម្រៀង។ បទនេះ ត្រូវបានដឹកនាំសម្ដែងដោយលោក ផល ពេជ្រសីហា ដែលគេដឹងថា ជាអ្នកដឹកនាំសម្ដែងឆ្នើមមួយរូប ដែលមានទឹកដៃក្នុងការចាប់យកប្លង់ស្អាត ប្រចាំឱ្យផលិតកម្មថោន។
នេះជាបទចម្រៀងទី២ហើយរបស់លោក ករុណា ពេជ្រ ដែលច្រៀងនិងថតផ្តិតយកតំបន់ទេសចរណ៍របស់ខេត្តនោះផ្ទាល់ឱ្យត្រូវអត្ថន័យបទចម្រៀងតែម្ដង ស្របពេលដែលចម្រៀងទី១លោកបទ«មន្ដស្នេហ៍ កំពង់ស្ពឺ»ក៏ឆ្លុះបញ្ចាំងពីតំបន់ទេសចរណ៍ដ៏ស្រស់ត្រកាលរបស់ខេត្តនោះដែរ។ ប៉ុន្ដែមិនមែនចេញត្រឹមតែ២បទនោះទេ តែលោកពេជ្រ ធ្លាប់ប្រាប់ថាលោកនិងក្រុមការងារផលិតថោន នឹងផលិតបទចម្រៀងទាក់ទងតំបន់ទេសចរណ៍ឱ្យបានទូទាំង២៥ខេត្តក្រុងដើម្បីឱ្យមហាជនបានស្គាល់និងទៅកម្សាន្ដតាមរមណីដ្ឋានក្នុងខេត្តនីមួយឱ្យកាន់តែច្រើនថែមទៀត។
តាមការបង្ហើប គេបានដឹងថា តារាចម្រៀងប្រុសរូបនេះត្រៀមសម្រុកស្នាដៃបន្តបន្ទាប់ទៀត ដោយលោកផ្ដោតលើការរៀបចំចេញបទថ្មីៗទាក់ទងវិស័យទេសចរណ៍នៅតាមបណ្ដាខេត្តផ្សេងៗទៀត៕