យោងតាមការចុះផ្សាយរបស់គេហទំព័រ GiveMeSport បានឲ្យដឹងថាខ្សែបម្រើអន្តរជាតិអាហ្សង់ទីន Rodrigo de Paul ស្ម័គ្រចិត្តធ្វើសង្រ្គាមដើម្បីប្រធានក្រុមរបស់គេគឺ Lionel Messi មិនថាអំឡុងការប្រកួត ឬពេលហ្វឹកហាត់ក៏ដោយ។
នៅក្នុងជំនួបមិត្តភាពអន្តរជាតិដែលក្រុមជម្រើសជាតិអាហ្សង់ទីនយកឈ្នះ ៣-០ លើក្រុមជម្រើសជាតិហុងឌូរ៉ាស់ក្នុងកីឡដ្ឋាន Hard Rock ដោយកីឡាករ Messi រកបាន២គ្រាប់ និង Martinez រកបានមួយគ្រាប់។
អំឡុងការប្រកួតនៅនាទី៣៨’ កីឡាករ Deiby Flores បានប៉ះធ្វើឲ្យ Messi ដួល, ស្រាប់តែកីឡាកររបស់ក្រុមជម្រើសជាតិអាហ្សង់ទីនរួមទាំង Rodrigo de Paul នាំគ្នារត់ទៅតវ៉ា និងស្រែកតឹងសរសៃកដាក់កីឡាករហុងឌូរ៉ាស់ដែលបានប៉ះ Messi។ សម្បីតែពេលថតរូបក្រោយចប់ការប្រកួតក៏ Rodrigo de Paul ព្យាយាមដើរតាមដើម្បីការពារ Messi រហូតចូលដល់បន្ទប់ផ្លាស់សម្លៀកបំពាក់។
ក្រោយចប់ការប្រកួតកីឡាករ Rodrigo de Paul បានថ្លែងប្រាប់គេហទំព័រ GiveMeSport ដូច្នេះថា៖«យេីងនឹងធ្វេីសង្គ្រាមដេីម្បី Lionel Messi ប្រសិនបើគាត់ចង់»។
គួរដឹងថាខ្សែបម្រើវ័យ២៧ឆ្នាំរូបនេះគឺជាផ្នែកមួយជួយឲ្យក្រុមជម្រើសជាតិអាហ្សង់ទីនឈ្នះពាន Copa America ២០២១ ប្រចាំទ្វីបអាមេរិកខាងត្បូង បន្ទាប់ពីយកឈ្នះក្រុមជម្រើសជាតិប្រេស៊ីល ក្នុងលទ្ធផល ១-០ នៅកីឡដ្ឋាន Maracanã Stadium៕
