ថ្មីៗនេះសារព័ត៌មានត្រយងបានទទួលដំណឹងថា តារាសម្ដែងឯកប្រុស ប៉ែន ភ័ក្រ្តសុធារិទ្ធ បានបង្ហាញមុខចូលរួមក្នុងការប្រកួតវិស័យបុរសឯកក្នុងកម្មវិធី Mister Supranational Cambodia 2023 ដោយដំណឹងនេះបានធ្វើឱ្យអ្នគគាំទ្រ ញាប់ញ័របេះដូងគាំទ្រលោកយ៉ាងពេញទំហឹងតែម្ដង។
តាមការរៀបរាប់ជាផ្លូវការនៅលើហ្វេសប៊ុក Mister Supranational Cambodia បង្ហោះថា ៖ «ខ្ញុំបាទឈ្មោះ ប៉ែន ភក្រ័សុធារឹទ្ធិ អាយុ27ឆ្នាំ កម្ពស់ 180cm ទម្ងន់ 73គីឡូ សព្វថ្ងៃ ជាតារាសម្ដែងមួយរូប។ ជាបេក្ខជនដែលមានការចាប់អារម្មណ៍ក្នុងការចូលរួមប្រកួតប្រជែង Mister Supranational Cambodia 2023 និងជាបេក្ខភាពមកពី ភ្នំពេញជាបំណងដែលខ្ញុំបានប៉ងជាយូមកហើយដើម្បីចូលរួមប្រកួតកម្មវិធីលំដាប់ថ្នាក់ពិភពលោកមួយនេះ»។
យ៉ាងណាមិញ លោក ប៉ែន ភ័ក្រ្តសុធារិទ្ធ គឺជាតារាសម្ដែងដែលបានចូលប្រឡូកក្នុងវិស័យសិល្បៈនៃការសម្ដែងរាប់ឆ្នាំមកហើយ លោកបានប្រឡូកក្នុងវិស័យសិល្បៈតាំងពីឆ្នាំ២០១០ ប៉ុន្តែលោកទើបទទួលបានការងារសម្ដែងច្រើននៅក្នុងរយៈពេល៥ឆ្នាំចុងក្រោយនេះ។ ភាគច្រើនលោកធ្លាប់សម្ដែងជាតួអង្គឯក និងតួអង្គសំខាន់ៗក្នុងខ្សែភាពយន្ដភាគ ហើយរឿងដែលលោកបានចូលរួមសម្ដែងមិនតិចជាង ៣០ រឿងនោះទេ។ សព្វថ្ងៃនេះ គេមិនសូវឃើញតារាប្រុសរូបនេះសម្រុកថតភាពយន្តដូចមុននោះទេ ហាក់ដូចជាលោកជាតារាកុងត្រាឱ្យផលិតកម្ម។ ក្រៅពីអាជីពសម្ដែង លោក ប៉ែន ភ័ក្រ្តសុធារិទ្ធ ក៏ជោគជ័យមិនស្ទើរជាមួយអាជីពហ្វេសសិន និងបង្ហាញម៉ូដ ដោយលោកមានហាងសម្លៀកបំពាក់ផ្ទាល់ខ្លួន។
លោក ប៉ែន ភ័ក្រ្តសុធារិទ្ធ ពិតជាបានធ្វើឱ្យហ្វេនអ្នកគាំទ្ររបស់លោកហាក់ភ្ញាក់ផ្អើល និងសប្បាយចិត្តជាខ្លាំង ក្រោយពីដឹងដំណឹងថា លោកបានសម្រេចចិត្តប្រឡូកចូលក្នុងវិស័យបុរសឯកហើយ ដែលបានឃើញបង្ហាញវត្តមានដាក់ពាក្យចូលរួមប្រកួតក្នុងកម្មវិធី Mister Supranational Cambodia ឆ្នាំ2023នេះ។ គេមើលឃើញថា មានអ្នកគាំទ្រជាច្រើននាក់បានជូនពរលោកឱ្យទទួលបានជោគជ័យក្នុងការប្រកួត៕
