ភ្នំពេញ៖ រដ្ឋបាលខេត្តកំពង់ស្ពឺកាលថ្ងៃទី ២៧ ខែកញ្ញា ២០២២ម្សិលមិញនេះបានប្រកាសឱ្យប្រជាពលរដ្ឋដែលរស់នៅខាលើទ្វារទឹករលាំងជ្រៃ និងតំបន់ទំនាបតាមបណ្ដោយដងស្ទឹងព្រែកត្នោតក្នុងភូមិសាស្ត្រខេត្តកំពង់ស្ពឺ បង្កើនការប្រុងប្រយ័ត្ន និងស្វែងរកទីទួលសុវត្ថិភាព បន្ទាប់ពីមានភ្លៀងធ្លាក់ជាបន្តបន្ទាប់ ធ្វើឱ្យទឹកដងស្ទឹងព្រែកត្នោតហក់ឡើងលឿន។
ហើយស្ថានភាពបែបនេះ ធ្វើឲ្យទឹកស្ទឹងព្រែកត្នោតផ្នែកខាងក្រោមអាចបង្កឱ្យមានការលិចលង់តំបន់ជាយថាហេតុ ហើយផ្នែកខ្លះត្រូវទទួលរងផលប៉ះពាល់ ដល់ដំណាំកសិកម្ម សត្វចិញ្ចឹម ផ្ទះសំបែង ហេដ្ឋារចនាសម្ព័ន្ធនានា ពិសេសអាចបង្កគ្រោះថ្នាក់ដល់អាយុជីវិតបងប្អូនប្រជាពលរដ្ឋផងដែរ។
រដ្ឋបាលខេត្តកំពង់ស្ពឺក៏អំពាវនាវដល់ប្រជាពលរដ្ឋដែលរស់នៅផ្នែកខាងលើ និងខាងក្រោមទ្វារទឹករលាំងជ្រៃបណ្តោយស្ទឹងព្រែកត្នោតជាពិសេសតំបន់ងាយរងគ្រោះ ត្រូវត្រៀមលក្ខណៈឲ្យរួចជាស្រេច ត្រូវបង្កើនការប្រុងប្រយ័ត្នខ្ពស់ និងស្វែងរកទីទួលមានសុវត្ថិភាព ដើម្បីជៀសវាងកើតមានគ្រោះថ្នាក់ផ្សេងៗ ព្រោះស្ថានភាពទឹកកំពុងហក់ឡើងជាបន្តបន្ទាប់។
អភិបាលខេត្តកំពង់ស្ពឺ ក៏បានអំពាវនាវដល់ប្រជាពលរដ្ឋឱ្យត្រៀមលក្ខណៈជាស្រេច និងប្រុងប្រយ័ត្នខ្ពស់ចំពោះទឹកជំនន់។ តាមការព្យាករណ៍ធាតុអាកាសរបស់ក្រសួងធនធានទឹក និងឧតុនិយមបានឲ្យដឹងថា ខេត្តកំពង់ស្ពឺនឹងទទួលរងឥទ្ធិពលព្យុះទី១៦ ដូចបណ្ដាខេត្តដទៃផ្សេងទៀតដែរ៕
អត្ថបទ៖ ត្រយង