ខ្សែប្រយុទ្ធLionel Messi សមាជិកក្រុមជម្រើសជាតិអាហ្សង់ទីន កំពុងប្រកបអាជីពនៅក្លិប Paris Saint-Germain F.C នៅប្រទេសបារាំង បានបញ្ជាក់ថ្មីៗនេះថា ការប្រកួតពានរង្វាន់ជើងឯកពិភពលោក 2022 FIFA World Cup Qatar ឆ្នាំនេះនៅប្រទេសកាតា នឹងក្លាយជាការប្រកួតបាល់ទាត់ពិភពលោក (FIFA World Cup) ចុងក្រោយនៃអាជីពរបស់គេ។
ថ្លែងទៅកាន់សារព័ត៌មាន ESPN កីឡាករវ័យ៣៥ឆ្នាំរូបនេះ បានប្រកាសព័ត៌មានអំពីអនាគតរបស់ខ្លួន ជាមួយក្រុមជម្រើសជាតិអាហ្សង់ទីន កាលពីថ្ងៃព្រហស្បតិ៍ ថា៖«នេះនឹងក្លាយជា World Cup ចុងក្រោយរបស់ខ្ញុំ»។
Messi នឹងចូលលេងក្នុង World Cup ជាលើកទី ៥ របស់គេ នៅប្រទេសកាតា ខណៈកន្លងមកធ្លាប់ស៊ុតបញ្ចូលទីបាន ៦ គ្រាប់ ក្នុងការប្រកួត ៤ លើកមុនៗ ៤ ក្នុងចំណោមនោះបានកើតឡើងក្នុងឆ្នាំ ២០១៤ នៅពេលដែលតារា PSG រូបនេះ បានជួយឲ្យអាហ្សង់ទីន ឈានដល់វគ្គផ្ដាច់ព្រ័ត្រដែលពួកគេបានចាញ់អាល្លឺម៉ង់ ១-០ បន្ទាប់ពីម៉ោងបន្ថែម។
កំណត់ត្រារបស់ Messi សម្រាប់អាហ្សង់ទីន គឺរកបាន ៩០ គ្រាប់ ក្នុង ១៦៤ ប្រកួត ដែលធ្វើឲ្យគេក្លាយជាអ្នកស៊ុតបញ្ចូលទីច្រើនជាងគេទី ៣ សម្រាប់ជម្រើសជាតិ បន្ទាប់ពី Cristiano Ronaldo (១១៧) និង Ali Daei របស់អ៊ីរ៉ង់ (១០៩)។
Messi ក៏ធ្លាប់បានប្រកាសចូលនិវត្តន៍ពីក្រុមជម្រើសជាតិ ក្នុងឆ្នាំ ២០១៦ បន្ទាប់ពីចាញ់ក្នុងវគ្គផ្ដាច់ព្រ័ត្រ Copa America ទល់នឹងស៊ីលី ប៉ុន្តែគេត្រូវបានប្រធានាធិបតីរបស់អាហ្សង់ទីន ទទូចសុំឱ្យបន្តជួយជម្រើសជាតិទៀត ហើយតាំងពីពេលនោះមក គេបន្តកៅអីជាបន្តក្រុមរហូតដល់បច្ចុប្បន្ន។
គួរបញ្ជាក់ដែរថាសម្រាប់ពានរង្វាន់ 2022 FIFA World Cup Qatar ដែលប្រទេសកាតា ជាម្ចាស់ផ្ទះ ក្រុមជម្រើជាតិអាហ្សង់ទីន ស្ថិតនៅពូល C ជាមួយ អារ៉ាប៊ីសាអូឌីត, ម៉ិកស៊ិក និងប៉ូឡូញ៕