ខ្សែប្រយុទ្ធ Cristiano Ronaldo ស៊ុតបានបញ្ចូលទី១គ្រាប់កាលពីយប់មិញនេះក្នុងការរួមចំណែកជួយឲ្យក្លិបបិសាចក្រហម Manchester United យកឈ្នះម្ចាស់ផ្ទះ Everton ដោយលទ្ធផល ១-២ ក្នុងការប្រកួតសប្តាហ៍ទី៩នៃលីគកំពូលអង់គ្លេស English Premier League 2022/23។
ការប្រកួតប្រព្រឹត្តទៅបានតែ៥នាទីប៉ុណ្ណោះក្រុមម្ចាស់ផ្ទះរបស់លោក Frank Lampard ស៊ុតបានសម្រេចនាំមុខ ១-០ ដោយកីឡាករ Iwobi ប៉ុន្តែចូលដល់នាទីទី១៥ សមាជិកថ្មីទើបទិញពី Ajax កីឡាករប្រេស៊ីល Antony ស៊ុតឲ្យក្រុមភ្ញៀវតាមស្មើ ១-១ មុនពេល Cristiano Ronaldo ដែលទើបប្តូរចូលជំនួស Martial ស៊ុតគ្រាប់បាល់ជ័យជម្នះនៅនាទីទី៤៤ បន្ទាប់ពីមិត្តរួមអាជីពតាំងពីនៅ Real Madrid កីឡាករ Casemiro បញ្ជូនបាល់ឲ្យយ៉ាងស្អាត។
ខ្សែប្រយុទ្ធវ័យ៣៧ឆ្នាំរូបនេះរកបានគ្រាប់បាល់ទី៧០០ក្នុងអាជីពសម្រាប់ក្លិបបាល់ទាត់ចំនួន៤ផ្សេងគ្នាដូចជា Real Madrid ចំនួន៤៥០គ្រាប់ក្នុងការបង្ហាញខ្លួន៤៣៨ប្រកួត Man United ចំនួន១៤០គ្រាប់ ក្នុងការបង្ហាញខ្លួន៣៤០ប្រកួត Juventus ចំនួន១០១គ្រាប់ ក្នុងការបង្ហាញខ្លួន១៣៤ប្រកួត និងក្លិបដំបូង Sporting Lisbon ចំនួន៥គ្រាប់ ក្នុងការបង្ហាញខ្លួន៣១ប្រកួត។
បច្ចុប្បន្នក្លិបបាល់ទាត់ Man United ក្រោមការដឹកនាំរបស់លោក Erik ten Hag កំពុងស្ថិតនៅលេខរៀងទី៥ ក្រោយឆ្លងកាត់៨ប្រកួត ឈ្នះ៥ និងចាញ់៣ មាន១៥ពិន្ទុ ខណ: Arsenal ស្ថិតនៅកំពូលតារាង ជាមួយ២៤ពិន្ទុ៕