ក្រោយពីមានការរិះគន់ចំពោះការសម្ដែងរបស់ខ្លួន លោក កាវីន (Kavin) តួឯកប្រុសក្នុងរឿង «តម្លង់៧សន្តាន» បានចេញមកឆ្លើយតបនិងបកស្រាយឱ្យអ្នកទស្សនាបានយល់ពីការសម្ដែងរបស់ខ្លួន។
សូមចុចអាន៖ បទ «ស្នាមស្នេហ៍សមុទ្ររាម» ច្រៀងដោយ ឱក សុគន្ធកញ្ញា និង ចែម ស្រីល័ក្ខ ចូលចិត្តបែបណាជាង?
វីដេអូឈុតក្រៅឆាកដែលតារាសម្ដែងសឿនផាន ផាភួង បានបង្ហោះលើផេករបស់ខ្លួនកាលពីថ្ងៃទី១ មិថុនា កន្លងទៅទទួលបានការកោតសរសើរច្រើន ចំពោះរូបសម្រស់របស់តួឯកប្រុសស្រី ដែលស្អាតស្រស់និងសង្ហាស័ក្តិសមគ្នា។ ប៉ុន្តែនៅក្នុងនោះក៏មិនអត់អ្នករិះគន់ដែរ ដោយពាក្យរិះគន់ភាគច្រើនធ្លាក់ទៅលើតួឯកប្រុសលោក កាវីន។ លោក រងនូវការស្ដីថាខ្លាំងពីសំណាក់អ្នកបញ្ចេញមតិ ដែលបានសង្កត់ធ្ងន់ទៅលើអត្តចរិត និង ការសម្ដែងរបស់លោកថា សម្ដែងដូចគល់ឈើ នៅរឹង នៅឆ្គង សម្ដែងស្ពឹក និង សម្ដែងដូចគ្មានវិញ្ញាណក្នុងខ្លួនជាដើម។
មានឱកាសបានជួបសម្ភាសន៍តាមរយៈសារអេឡិចត្រូនិច សារព័ត៌មានត្រយងបានសាកសួរលោក កាវីន ពីបញ្ហាខាងលើនេះ ដោយសាមីខ្លួនបានទទួលស្គាល់ថាលោក ក៏បានឃើញនូវមតិរិះគន់អស់ទាំងនោះដូចគ្នា ប៉ុន្តែលោកសុំយកឱកាសនេះធ្វើការបកស្រាយចំពោះការសម្ដែងរបស់លោកក្នុងឈុតនោះថា៖
«នៅក្នុងវីដេអូដែលបានបង្ហាញទៅខាងក្រៅនោះគឺ តួអង្គជេស្ដាដែលលោកសម្ដែងកំពុងតែខូចចិត្តព្រោះតែគូស្នេហ៍របស់លោកស្លាប់ ដូច្នេះហើយពេលនោះតួអង្គរបស់លោកកំពុងតែខូចចិត្តយ៉ាងខ្លាំង ប្រៀបដូចជាមនុស្សគ្មានកម្លាំងកំហែងក្នុងខ្លួន វិញ្ញាណហាក់ហោះចេញពីរូបកាយ ហេតុនេះហើយទើបពេលបានជួបតួស្រីឈ្មោះសំណាង លោកមិនមានអារម្មណ៍និងកម្លាំងនិយាយស្ដីតបតជាមួយនឹងតួឯកស្រី ដែលសម្ដែងដោយកញ្ញា អាំង សុជាតានោះ»
កាវីនក៏បានឆ្លៀតឱកាសផ្ដាំផ្ញើចំពោះទស្សនិកជនដែរថា សូមមេត្តាកុំអាលរិះគន់លោកដោយគ្រាន់តែឃើញវីដេអូខ្លីដែលដកស្រង់ត្រឹមតែមួយជ្រុងនៃរឿង និងមិនទាន់បានដឹងពីដំណើរដើមទងចងជាសាច់រឿងប្រទាក់ក្រឡាគ្នានៅឡើយ។ តួឯកប្រុសវ័យក្មេងរូបនេះបានថែមទាំងពោលដោយជំនឿចិត្តថា៖
«ខ្ញុំជឿថារឿងនេះពេលចាក់បញ្ចាំងលើកញ្ចក់ទូរទស្សន៍ប្រាកដជាទទួលបានការគាំទ្រខ្លាំងព្រោះ មានការចូលរួមសម្ដែងពីតារាជើងចាស់ជាច្រើនរូប ជាពិសេសលោកពូ ទេព រិនដារ៉ូ ដែលជាតារាជើងចាស់មានឈ្មោះបោះសំឡេងជាច្រើនជំនាន់មកហើយ។ មួយវិញទៀតរឿងនេះទៀតសោត ក៏មានឈុតឆាកកំប្លែងសើចដែលនឹងធ្វើឱ្យអ្នកទស្សនាផ្ទុះសំណើចគ្រប់វគ្គ ព្រោះសូម្បីតែលោកនិងតួសម្ដែងផ្សេងៗទៀត សម្ដែងខ្លួនឯងនៅសើចខ្លួនដែរ»។
គួរដឹងដែរថាលោក កាវីន ឬ ជេស្ដាក្នុងរឿង «តម្លង់៧សន្តាន» មានឈ្មោះពិតថា ង៉ែត សុវណ្ណេត គឺជានិស្សិតបញ្ចប់ការសិក្សាផ្នែក Financial and Banking មានស្រុកកំណើតនៅក្នុងខេត្តពោធិ៍សាត់ ហើយរឿងដំបូងដែលធ្វើឱ្យទស្សនិកជនស្គាល់លោកនោះគឺតាមរយៈរឿង «កំហឹងអ្នកស្រុក»៕
