ភាពយន្តភាគបុរាណថ្មី និងខ្នាតធំរបស់លោក ហ្វៃ សំអាង ដែលបានបញ្ចេញចំណងជើងឱ្យមហាជនដឹងគឺ «អប្សរាមហាអង្គរ» បានប្រមូលតួសម្ដែងល្បីៗជាច្រើនដួងឱ្យចូលរួមនៅក្នុងការថតភាពយន្តនេះ។ ក្នុងនោះដែរ គេបានឃើញលោក ហ្វៃ សំអាង ក៏បានកៀរគរបវរកញ្ញាម្ចាស់មកុដ និងជាតំណាងឱ្យកម្ពុជាទាំង ៥ រូប ក៏នឹងមានវត្តមានចូលរួមសម្តែងក្នុងភាពយន្តភាគនេះដែរ រួមមាន៖ កញ្ញា ប៉ូគឹមថេង សុតធីតា កញ្ញា សេង រដ្ឋា កញ្ញា ពេជ្រ វត្តីសារ៉ាវឌ្ឍី កញ្ញា រឿន ណាត និង កញ្ញា ប៊ី សុធារី។
លោក ហ្វៃ សំអាង បានបង្ហោះរូបភាពបវរកញ្ញាទាំង ៥ រូបម្ដងម្នាក់ៗ និងប្រាប់ពីអត្តចរិតតួនីមួយដែលពួកគេត្រូវសម្ដែងនៅក្នុងខ្សែភាពយន្តភាគខ្នាតធំរឿង «អប្សរាមហាអង្គរ» របស់ផលិតកម្ម ហង្សមាស នៅក្នុងរបត់ថ្មីទំនើប។ ជាដំបូងលោកបានបង្ហោះពី ៖
កញ្ញា ពេជ្រ វត្តីសារ៉ាវឌ្ឍី Miss Grand Cambodia 2022
សម្តែងជាតួអង្គពីររូប(ភ្លោះ) ជាតួនាង ឆោម ឆវី និង តួនាង ឆោម ឆផ្កា។ លោកបានជ្រើសរើសយកកញ្ញាមកសម្ដែងតួអង្គនេះមុនពេលកញ្ញាចូលរួមប្រកួតបវរកញ្ញា Miss Grand Cambodia 2022 ទៅទៀត ។ លោកថា លោកពិតជាភ្ញាក់ផ្អើលនៅពេលឃើញកញ្ញាចូលរួមប្រកួត ហើយទទួលបានតំណែងលេខ១ ក្នុងការប្រកួត។
កញ្ញា ប៉ូគឹមថេង សុតធីតា Miss Grand Cambodia 2021
សម្តែងជាតួព្រះជាយាទី ១ ព្រះនាមថា កែវ មណី ជាអង្គក្សត្រិយមានព្រះហទយ:ធំទូលាយប្រៀបបាននឹងលំហមេឃ ជ្រៅជាងជ្រោះ ល្វឹងល្វើយដូចមហាសមុទ្រ ស្វែងរកព្រះជាយាមកថ្វាយព្រះ ភស្តា អ្នកណាក៏កោតស្ញប់ស្ញែង និង សរសើរ។ អត្តចរិតតួរបស់កញ្ញាគឺ ស្រលាញ់ ខ្នាញ់ ខឹង ស្អប់ ដែលជាទេពកោសល្យថ្មីដ៏រស់រវើក នៅក្នុងភាពយន្តភាគខ្នាតធំមួយនេះ កញ្ញាមិនធ្លាប់បង្ហាញពីមុនមក។
កញ្ញា សេង រដ្ឋា អតីតMiss Grand 2020
បវរកញ្ញាមកពីខេត្ត កំពង់ធំ រូបនេះសម្តែងជាតួភ្លោះ។ កញ្ញាត្រូវសម្តែងជាតួអង្គពីរដែលមានព្រះរាជចរិយាខុសគ្នាដូចមេឃហើយនិងដី ជារាជបុត្រីដែលមានព្រះនាមថា ព្រះធីតា វរនន្ទ អម្ពរពេជ្រ ព្រះធីតា វរនន្ទ អម្ពរមាស បើនិយាយពីព្រះរូបឆោមវិញដូចជាស្រីទេពអប្សរច្បុតមកពីឋានសួគ៍។ ប្រិយមិត្តអ្នកគាំទ្រកញ្ញានឹងបានឃើញទេពកោសល្យដ៏ថ្មីសន្លាងរបស់កញ្ញា ទ្រង់ព្រះនច្ចារបាំអប្សរានៅក្នុងខ្សែភាពយន្តភាគខ្នាតធំនេះតាមរយៈអ្នកដឹកនាំសម្ដែងនិងក្រុមការងារដែលផ្តល់ទំនុកចិត្ត នៅលើកញ្ចក់ទូរទស្សន៍ និងប្រព័ន្ធផ្សព្វផ្សាយរបស់ ផលិតកម្មហង្សមាសនិងរស្មីហង្សមាស។
កញ្ញា រឿន ណាត Miss Universe Cambodia 2018
កញ្ញាសម្តែងជាតួអង្គកំពូលក្សត្រិយ ដែលជាតួអង្គមួយមានព្រះទ័យ ព្រះវិសារទៈបូជាព្រះជន្មដើម្បីព្រះនគរ ព្រះនាងជ័យរាជទេវី ព្រះមហេសី ព្រះបាទជ័យវរ្ម័នទី ៧។ លោក ហ្វៃ សំអាង បានបញ្ជាក់ដែរថា កញ្ញា រឿន ណាត គឺពិតជាស័ក្ដសមជាតួអង្គនេះណាស់ ហើយលោករំពឹងថា អ្នកគាំទ្រទាំងអស់ពិតជាពេញចិត្តពេញថ្លើមចំពោះការសម្ដែងរបស់កញ្ញា ព្រោះថា កញ្ញាធ្លាប់បានប្រឡូកវិស័យភាពយន្តខ្មែរ ដែលទទួលបានគាំទ្រខ្លាំងទាំងរូបសម្រស់ និងទេសពកោសល្យសម្ដែង។
កញ្ញា ប៊ី សុធារី អតីត Miss Universe 2017 និង ជា Miss Charm Cambodia 2021
កញ្ញាសម្តែងជាតួអង្គ នាងខ្មុក និង អ្នកម្នាង ប្រភា របត់ថ្មីដែលកញ្ញាមិនធ្លាប់បានសម្តែងកន្លងមក កញ្ញាត្រូវតស៊ូអធនជាមួយនឹងការលាបខ្លួនឲ្យខ្មៅ អត្តចរិតក្រមិចក្រមើម បង្កប់ភាពច្រណែននិន្ទា ឈ្នានីស ញញឹមចាប់ដៃ សម្លក់ជាន់ជើងមានមហិច្ឆតាឥតស្កប់ស្កល់។ កញ្ញាត្រូវត្រៀមខ្លួនដោយរងរំពាត់ខ្សែតី ដំបងគល់ឬស្សីនៅក្នុងឈុតឆាកសម្តែង។ ល។
ក្រៅពីបង្ហាញមុខរបស់បវរកញ្ញាទាំង ៥ រូបនេះនៅក្នុងភាពយន្តហើយនោះ ថ្មីៗនេះលោក ហ្វៃ សំអាង ក៏បានបង្ហាញមុខ Super Star លំដាប់ប្រទេស ៣ ដួងទៀត រួមមាន ៖ លោក ទេព រិនដារ៉ូ លោកស្រី អម្ពរទេវី និងលោកស្រី លី ម៉ារីណា ។ តាមរយៈការរៀបរាប់របស់លោក ហ្វៃ សំអាង ជាអ្នកដឹកនាំរឿងបានលើកឡើងថា Super stars លោក ទេព រិនដារ៉ូ លោកស្រី អម្ពរទេវី រាប់រយរឿងដែលបានសម្តែងរួមគ្នាទាំងឈុតឆាកកុងកាច់លេបខាយពាក្យសម្តី ក្រមិចក្រមើម ស្នេហាផ្អែមល្ហែម ។ ល។ តារាទាំងពីរដួងនេះបានឃ្លាតឆ្ងាយពីគ្នានៅក្នុងការសម្ដែងយ៉ាងយូរធ្វើឱ្យប្រិយមិត្តអ្នកគាំទ្រស្ទើរតែភ្លេចរសជាតិ។ នៅក្នុងខ្សែភាពយន្តភាគខ្នាតធំរឿង «អប្សរាមហាអង្គរ» ដែលផលិតដោយផលិតកម្ម ហង្សមាស តារាទាំងពីរដួងត្រូវបានអ្នកដឹកនាំសម្ដែង ហ្វៃ សំអាងចាប់ឱ្យចរចួបគ្នាជាថ្មីម្តងទៀតដោយអមមកជាមួយឈុតឆាកស្នេហា ផ្អែមល្ហែម ល្វីងជូរចត់ និយាយរួមទៅគឺមានគ្រប់រសជាតិដើម្បីផ្តាំចាស់នៅលើមាគ៌ាសិល្ប:ភាពយន្តនេះ។
អម្ពរទេវី ជាតួអង្គព្រះនាម អ្នកអង្គម្ចាស់ស្ត្រី កាមល ជារាជនាដកាអប្សរា ជារាជគ្រូបង្ហាត់បង្ហាញព្រះកេរមរតកដ៏មហាអស្ចារ្យរបស់ជាតិខ្មែរ។ ទេព រិនដារ៉ូ ជាតួអង្គបណ្ឌិតអក្សរសាស្ត្រ ឈ្មោះ ខីណាព្រាហ្មណ៍។ រាជនាដកាអប្សរា លង់ព្រះហទយ:ស្នេហ៍ស្និទ្ធបណ្ឌិតអក្សរសាស្ត្រ នៅរៀងរាល់យប់ថ្ងៃ១៥កើតខែពេញបូរណ៍មី អ្នកអង្គម្ចាស់ស្ត្រី កាមលតែងតែយាងមកទ្រង់ព្រះសណ្តាប់រឿងនិទានបេះដូងរបស់បណ្ឌិត ខីណាព្រាហ្មណ៍ ធ្វើឲ្យនាង បារមី ដែលជានាដកាប្សរាដែរ មានចិត្តច្រណែន និន្ទាឈ្នានីសព្រោះតែបេះដូងរបស់នាងបានធ្លាក់ចូលទៅក្នុងជ្រោះស្នេហ៍របស់បណ្ឌិតអក្សរសាស្ត្រនោះដោយដកមិនរួច។ សង្គ្រាមបេះដូងក៏បានផ្ទុះឡើងពេញផ្ទៃរឿង ទាំងមូល។ តួអង្គនាងបារមីត្រូវបានធ្លាក់ទៅលើតារាសម្តែង លី ម៉ារីណា ជាអ្នកគ្រង តែមកលើកនេះត្រូវអ្នកដឹកនាំសម្ដែងផ្លាស់ប្ដូររសជាតិសម្តែងរបស់គាត់ដែលបងប្អូនមិនធ្លាប់បានឃើញគាត់សម្ដែងបែបនេះពីមុនមកទេ រង់ចាំតាមដានតារាទាំងបីដួងនៅលើថ្នាលស្នេហាត្រីកោណ លោកអ្នកនឹងមានអារម្មណ៍ ស្រលាញ់ ស្អប់ ខ្នាញ់ ខឹង លន្លង់លន្លោចទៅតាមផ្ទៃរឿង។
នៅមិនទាន់អស់តួសម្ដែងទេ គ្រប់គ្នានៅចាំអ៊ុតថា តើមានតារារូបណាខ្លះទៀតចូលរួមសម្ដែង ព្រោះបើតាមការប្រកាសពីមុនមក អ្នកដឹកនាំរឿងបង្ហើបថា មានតារាសិល្បៈចូលរួមសម្ដែងដល់ទៅរាប់រយនាក់ ដែឡជាការប្រមូលតួទ្រង់ទ្រាយធំជាងរឿងមុន។ លោកថា រឿងភាគនេះ លោកបានគ្រោងផលិតតាំងពី ១០ឆ្នាំមុន ខណៈនិពន្ធអស់រយៈពេលជិត ៤ ឆ្នាំចុងក្រោយនេះ។ ស្នាដៃបន្ទាប់ពីរឿង «ចៅពស់កេងកង» មួយនេះ អ្នកដឹកនាំរឿងថា ជាការឧទ្ទិសស្នាដៃដល់ សម្តេចព្រះរៀម នរោត្តម បុប្ផាទេវី ដែលទ្រង់ជា «ទេពនាថវដ្តីឯក» និងជាតួឯកក្នុងរបាំអប្សរា លើកតម្កើងវប្បធម៌ពណ្ណរាយជាតិ ថ្កើងថ្កាន ល្បីល្បាញ រន្ទឺទូទាំងពិភពលោក។