នៅសល់តែ១សប្តាហ៍ប៉ុណ្ណោះ ពានរង្វាន់លីគកំពូលកម្ពុជា Cambodian Premier League 2022 នឹងបញ្ចប់ការប្រកួតវិលជុំសន្សំពិន្ទុហើយ ក្នុងចំណោម សមាជិកទាំង៨ក្រុម ខណៈអាជ្ញាកណ្ដាល១១នាក់ ពិន័យកាតចំនួនសរុបចំនួន៣២៣សន្លឹក ក្នុងនោះមានកាតក្រហម១៧សន្លឹក។
ចំណែកកីឡាករ Clyde O’Connell ជនជាតិអៀរឡង់ របស់ក្រុមព្រះខ័នរាជស្វាយរៀង បានក្លាយជាម្ចាស់កាតក្រហមទី១៧ ក្នុងពានរង្វាន់លីគកំពូលកម្ពុជា រដូវកាលនេះក្រោយត្រូវបានលោកអាជ្ញាកណ្ដាល ជី សាមឌី ពិន័យកាតលឿង២ដង ក្នុងជំនួបទទួលក្រុមអង្គរថាយហ្គឺរ លើទឹកដីកីឡដ្ឋានខេត្តស្វាយរៀង របស់ខ្លួន នាថ្ងៃសៅរ៍ ថ្មីៗប្រចាំសប្ដាហ៍ទី២០។
កីឡាករវ័យ២៤ឆ្នាំ ម្ចាស់អាវលេខ៤ រូបនេះ រកបានគ្រាប់បាល់បាន២គ្រាប់ម្នាក់ឯង ក្នុងចំណោមលទ្ធផលជ័យជម្នះ ៦ទល់០ លើក្រុមមកពីខេត្តសៀមរាប អង្គរថាយហ្គឺរ។ ២គ្រាប់របស់គេរកបាននៅនាទី ១០ និងនាទី៦៤ ខណៈដែលរូបគេត្រូវលោកអាជ្ញាកណ្ដាល ជី សាមឌី ពិន័យកាតលឿងទី១ នៅនាទី ៣០ ហើយនៅនាទី៨៧ បន្តពិន័យកាតលឿងទី២ និងកាតក្រហម តែម្តង។
ចំណែកបញ្ជីឈ្មោះកីឡាករ/គ្រូបង្វឹក និងថ្នាក់ដឹកនាំក្រុមដែលត្រូវពិន័យកាតក្រហម រាប់ពីពិន័យកាតច្រើន ចុះក្រោយ សរុបទាំងអស់មាន៖
១) ស៊ុក វឌ្ឍនា របស់ Tiffy Army FC សរុប ៩ សន្លឹក (ក្រហម១សន្លឹក)
២) Cristian Roque របស់ណាហ្គាវើល សរុប៦សន្លឹក (ក្រហម១សន្លឹក)
៣) Clyde O’Connell របស់ស្វាយរៀង សរុប៦សន្លឹក (ក្រហម១សន្លឹក)
៤) ទូច ម៉ាណាន់ របស់គីរីវង់ សរុប៥សន្លឹក (ក្រហម១សន្លឹក)
៥) ឆុំ ភីសា របស់ភ្នំពេញក្រោន សរុប៥សន្លឹក (ក្រហម១សន្លឹក)
៦) Taher របស់បឹងកេត សរុប៤សន្លឹក (ក្រហម១សន្លឹក)
៧) ផាត សុខា ណាហ្គាវើល សរុប៤សន្លឹក (ក្រហម១សន្លឹក)
៨) Alishtair Heath គ្រូអង្គរថាយហ្គឺរ សរុប៤សន្លឹក (ក្រហម១សន្លឹក)
៩) រ៉ៃ វិកទ័រ អ្នកចាត់ការក្រុមណាហ្គាវើល សរុប៣សន្លឹក (ក្រហម១សន្លឹក)
១០) កែវ សារ៉ាត អង្គរថាយហ្គឺរ សរុប៣សន្លឹក (ក្រហម១សន្លឹក)
១១) ហៅ សុជាតិ គ្រូបឹងកេត សរុប៣សន្លឹក (ក្រហម១សន្លឹក)
១២) Súper ណាហ្គាវើល សរុប ៣សន្លឹក (ក្រហម១សន្លឹក)
១៣) Anderson Zogbe ណាហ្គាវើល ២សន្លឹក (ក្រហម១សន្លឹក)
១៤) ឈិន ឈឿន Tiffy Army FC ២សន្លឹក (ក្រហម១សន្លឹក)
១៥) នេន សុធារ័ត្ន របស់ណាហ្គាវើល សរុប១សន្លឹក (ក្រហម១សន្លឹក)
១៦) កយ សាលីម របស់បឹងកេត សរុប១សន្លឹក (ក្រហម១សន្លឹក)
១៧) លី រ៉ាវី គ្រូជំនួយបឹងកេត សរុប១សន្លឹក (ក្រហម១សន្លឹក)
គិតត្រឹមពេលនេះមានកីឡាករសរុប១៥៦នាក់ហើយ ដែលត្រូវពិន័យកាតលឿង និងក្រហម ខណៈកីឡាករដែលត្រូវពិន័យកាតច្រើនជាងគេ គឺកីឡាករជនជាតិជប៉ុន Yuta Kikuchi របស់ Tiffy Army FC សរុបមានកាតលឿង៩សន្លឹកម្នាក់ឯង៕
រូបថត៖ CPL
