ក្រុមវាយកូនបាល់ជម្រើសជាតិកម្ពុជា បានបន្តឈ្នះក្រុមប៊ូតាន ៣-០ និងម៉ុងហ្គោលី ៣-០ ក្នុងប្រកួតពូល A នៃពានរង្វាន់វាយកូនបាល់អន្តរជាតិប្រចាំទ្វីបអាស៊ីនិងមហាសមុទ្រប៉ាស៊ីហ្វិក Davis Cup 2022 កម្រិតទី៤ (Asia/Oceania Group IV) នៅទីលាន Bahrain Tennis Federation Courts ក្នុងទីក្រុង Isa Town ប្រទេសបារ៉ែន។
ពានរង្វាន់វាយកូនបាល់អន្តរជាតិប្រចាំទ្វីបអាស៊ីនិងមហាសមុទ្រប៉ាស៊ីហ្វិក Davis Cup 2022 កម្រិតទី៤ កម្ពុជា ស្ថិតក្នុងពូល A ជាមួយក្រុមតួកមេនីស្ថាន ម៉ុងហ្គោលី និង ប៊ូតាន។ រីឯពូល B គឺមានក្រុមខ្លាំងគុយវ៉ែត សិង្ហបុរី ឡាវ កោះហ្គាំ និងក្រុមម្ចាស់ផ្ទះបារ៉ែន ដែលការប្រកួតត្រូវធ្វើឡើង ពីថ្ងៃទី១៧ រហូតដល់ថ្ងៃទី២២ ខែតុលា ចុងសប្ដាហ៍នេះ។
កម្ពុជា នឹងបន្ដជួបក្រុមតួកមេនីស្ថាន នាថ្ងៃទី២០ ខែតុលា ខាងមុខ។ ការប្រកួតនេះ បន្ទាប់ពីបញ្ចប់វគ្គសន្សំពិន្ទុ ក្រុមឈរលេខ១ និងលេខ២ នៃពូលនីមួយៗ នឹងត្រូវប្រកួតខ្វែងពូល ដើម្បីស្វែងរកបេក្ខភាព វគ្គពាក់កណ្ដាលផ្ដាច់ព្រ័ត្រ ក៏ដូចជាវគ្គផ្ដាច់ព្រ័ត្រ។ សម្រាប់ក្រុមជើងឯក នឹងទទួលបានកៅអី ក្រុម៣ នៃព្រឹត្តិការណ៍ Davis Cup 2023។
ក្រុមវាយកូនបាល់របស់កម្ពុជា ធ្លាប់មានឈ្មោះឡើងទៅលេងកម្រិត Asia/Oceania Group III បានប៉ុន្មានឆ្នាំគឺចន្លោះឆ្នាំ២០១៣ ដល់ឆ្នាំ២០១៦ ទើបធ្លាក់ចេញទៅ Asia/Oceania Group IV វិញមកទល់សព្វថ្ងៃ៕