ក្រុមបាល់ទះជម្រើសជាតិកម្ពុជា បានយកឈ្នះ ក្រុមបាល់ទះជម្រើសជាតិគុយបា ក្នុងលទ្ធផល៣សិតទល់នឹង១ (២៥-២៣,៣០-២៨,១៨-២៥,២៥-២៣) កាលពីយប់ថ្ងៃទី២០ ខែតុលា នាទីលានបាល់ទះកីឡដ្ឋានព្រីនស៍ ជំនួបមិត្តភាពអន្តរជាតិ ពោលគឺ៥ថ្ងៃក្រោយយកឈ្នះក្រុមជម្រើសជាតិសិង្ហបុរី ២សិតទល់នឹង១។
មូលហេតុនៃការសហព័ន្ធកីឡាបាល់ទះកម្ពុជា អញ្ជើញក្រុមជម្រើសជាតិគុយបា U21 ប្រកួតមិត្តភាពអន្តរជាតិ គឺដើម្បីបង្កើនគុណភាពបច្ចេកទេស ឱ្យកាន់តែរឹងមាំ ត្រៀមឆ្ពោះទៅទទួលរៀបចំធ្វើម្ចាស់ផ្ទះ ការប្រកួតកីឡាស៊ីហ្គេម លើកទី៣២ ឆ្នាំ២០២៣ ជាប្រវត្តិសាស្ត្រដំបូងរបស់កម្ពុជា បន្ទាប់ពីរង់ចាំអស់រយៈពេល ៦៤ ឆ្នាំមកនោះ។
ក្នុងនោះផងដែរឯកឧត្តម ស សុខា ក្នុងនាមក្រសួងអប់រំ យុវជន និងកីឡា បានស្នើសុំទៅកាន់ភាគីគុយបា មួយចំនួនដូចជា៖
-នៅសល់មិនដល់២០០ថ្ងៃទៀតទេ កម្ពុជា នឹងរៀបចំព្រឹត្តិការណ៍កីឡាស៊ីហ្គេម ហើយ។ កម្ពុជា ដាក់ផែនការយកមេដាយសរុបពាក់កណ្ដាលតារាងនៃប្រទេសជាសមាជិក។ ដូច្នេះស្នើសុំប្រទេសគុយបា ជួយជំរុញនិងគាំទ្រលើគ្រប់រូបភាពសម្រាប់វិស័យកីឡានៅកម្ពុជា និងជួយការងារបន្ទាន់ៗមុនស៊ីហ្គេម២០២៣ តាមអាចធ្វើទៅបាន។
-ដូចមានក្នុងលទ្ធផលនៃកិច្ចប្រជុំរវាងក្រសួងអប់រំយុវជននិងកីឡា និងវិទ្យាស្ថានជាតិកីឡា អប់រំកាយនិងការលេងកម្សាន្ត នៃសាធារណរដ្ឋគុយបា នាថ្ងៃទី៤ ខែ តុលា ឆ្នាំ២០២២ ថ្មីៗនេះ សូមស្នើភាគីគុយបា ពន្លឿនការងារជួយរៀបចំមជ្ឍមណ្ឌលកីឡាករកម្ពុជា ប្រហាក់ប្រហែលគុយបា និងជួយបញ្ជូនមន្រ្តីមករៀបចំមុនការប្រកួតស៊ីហ្គេមឆ្នាំ២០២៣ ខាងមុខ។
-សូមស្នើសុំអាហារូបករណ៍បន្ថែម តាមដែលរដ្ឋាភិបាលគុយបា អាចផ្តល់ជូនបានសម្រាប់មុខវិជ្ជាវិទ្យាសាស្ត្រកីឡានិងវិស័យអប់រំ ដូចដែលធ្លាប់ផ្ដល់ជូនដល់កម្ពុជា នាពេលកន្លងមក។ មុខវិជ្ជាវិទ្យាសាស្ត្រកីឡា ជាអាទិភាពនិងចាំបាច់បំផុតមួយ សម្រាប់កម្ពុជា ដើម្បីអភិវឌ្ឍន៍ស្មើមុខស្មើមាត់ក្នុងតំបន់អាស៊ី និងអន្តរជាតិ។
-តាមដឹងមកប្រទេសគុយបា មានប្រភេទកីឡាខ្លាំងៗរបស់ខ្លួនដូចជា បេសស្បល ប្រដាល់សាកល បាល់ទះ ចំបាប់ បាល់បោះ និងទូកក្តោង ជាដើម។ ស្នើឱ្យគុយបា ជួយពង្រឹងបន្ថែមលើវិស័យកីឡា ដែលជាភាពខ្លាំងរបស់គុយបា ដល់កម្ពុជា នាពេលបច្ចុប្បន្ននិងថ្ងៃអនាគតខាងមុខដ៏ខ្លី៕
