ក្រុមវាយកូនបាល់ជម្រើសជាតិកម្ពុជា បានបន្តឈ្នះក្រុមទួកមេនីស្ថាន ២-១ បន្ទាប់ពីឈ្នះក្រុមប៊ូតាន ៣-០ និងម៉ុងហ្គោលី ៣-០ ក្នុងប្រកួតពូល A នៃពានរង្វាន់វាយកូនបាល់អន្តរជាតិប្រចាំទ្វីបអាស៊ីនិងមហាសមុទ្រប៉ាស៊ីហ្វិក Davis Cup 2022 កម្រិតទី៤ (Asia/Oceania Group IV) នៅទីលាន Bahrain Tennis Federation Courts ក្នុងទីក្រុង Isa Town ប្រទេសបារ៉ែន។
នារសៀលថ្ងៃសៅរ៍ ទី២២ ខែតុលា ក្រុមវាយកូនបាល់ជម្រើសជាតិកម្ពុជា លេខ១ពូល A និង សិង្ហបុរី លេខ១ពូល B ប្រកួតគ្នាវគ្គផ្តាច់ព្រ័ត្រ ដើម្បីយកក្រុមខ្លាំងមួយដំឡើងទៅកម្រិតទី៣ ប្រចាំតំបន់អាស៊ី Asia/Oceania Group III នៃព្រឹត្តិការណ៍វាយកូនបាល់ពិភពលោក Davis Cup ឆ្នាំ២០២២។
ពានរង្វាន់វាយកូនបាល់អន្តរជាតិប្រចាំទ្វីបអាស៊ីនិងមហាសមុទ្រប៉ាស៊ីហ្វិក Davis Cup 2022 កម្រិតទី៤ កម្ពុជា ស្ថិតក្នុងពូល A ជាមួយក្រុមតួកមេនីស្ថាន ម៉ុងហ្គោលី និង ប៊ូតាន។ រីឯពូល B គឺមានក្រុមខ្លាំងគុយវ៉ែត សិង្ហបុរី ឡាវ កោះហ្គាំ និងក្រុមម្ចាស់ផ្ទះបារ៉ែន ដែលការប្រកួតត្រូវធ្វើឡើង ពីថ្ងៃទី១៧ រហូតដល់ថ្ងៃទី២២ ខែតុលា ចុងសប្ដាហ៍នេះ។
ក្រុមវាយកូនបាល់របស់កម្ពុជា ធ្លាប់មានឈ្មោះឡើងទៅលេងកម្រិត Asia/Oceania Group III បានប៉ុន្មានឆ្នាំគឺចន្លោះឆ្នាំ២០១៣ ដល់ឆ្នាំ២០១៦ ទើបធ្លាក់ចេញទៅ Asia/Oceania Group IV វិញមកទល់សព្វថ្ងៃ។
ក្រុមវាយកូនបាល់កម្ពុជាចាត់ទុកការប្រកួតព្រឹត្តិការណ៍វាយកូនបាល់ពិភពលោក Davis Cup ឆ្នាំ២០២២ នេះ ជាការត្រៀមខ្លួនសម្រាប់កីឡាអាស៊ីអាគ្នេយ៍ លើកទី៣២ ឆ្នាំ២០២៣ លើទឹកដីខ្លួនឯងជាលើកដំបូងក្នុងប្រវត្តិសាស្ត្រ៕