ក្រុមវាយកូនបាល់របស់ជម្រើសជាតិកម្ពុជា និងក្រុមស្រីលង្កា បានដឹកដៃគ្នាឡើងទៅប្រកួត 2023 Davis Cup Asia/Oceania Zone Group IIIខាងមុខ ក្រោយដណ្តើមកៅអីបានជាក្រុមខ្លាំងក្នុង Group IV ថ្មីៗនេះ។
ពានរង្វាន់ Davis Cup ប្រកួតជុំវិញពិភពលោកតាមទ្វីបនីមួយៗ ខណៈទ្វីបអាស៊ី បែងចែកជា ៤ Group ផ្សេងៗគ្នា។ សម្រាប់ Group ទី៤ ឆ្នាំនេះប្រកួតពីថ្ងៃទី១៧ ដល់២២ ខែតុលា ឆ្នាំ២០២២ ព្រមទាំងមាន១៦ក្រុម ដោយបែងចែកការប្រកួតជា២ ពូល ក្នុងនោះ៖
-បារ៉ែន, បង់ក្លាដេស, ប្រ៊ុយណេ, ប៊ូតាន់, កម្ពុជា, ហ្គាម, អ៊ីរ៉ាក់, គុយវែត និងតាជីគីស្ថាន ប្រកួតនៅBahrain Tennis Federation ក្នុងទីក្រុង Isa Town ប្រទេសបារ៉ែន។
-ឡាវ, ម៉ាល់ឌីវ,ម៉ុងហ្គោលី,សិង្ហបុរី, ស្រីលង្កា, ទួរមេនីស្ថាន និងយេមែន ប្រកួតនៅ Sri Lanka Tennis Association Courts ក្នុងទីក្រុង Colombo ប្រទេសស្រីលង្កា។
ក្រុមជម្រើសជាតិដែលមិនបានចូលរួមការប្រកួតក្នុង Group IV នេះមានម៉ាកាវ, មីយ៉ាន់ម៉ា,អូម៉ង់,ហ្វីលីពីន, កាតារ, តាហ្ស៊ីគីស្ថាន។
ដូច្នេះជាលទ្ធផលប្រចាំតំបន់ទាំង២នេះ ឃើញថាក្រុមជម្រើសជាតិកម្ពុជា និងស្រីលង្កា ដឹកដៃគ្នាឡើងទៅ Group III ជំនួសក្រុមជម្រើសជាតិស៊ីរី និងស្រីលង្កា ដែលធ្លាក់ចេញពី Group III នៅឆ្នាំនេះ។
សម្រាប់ក្រុមវាយកូនបាល់កម្ពុជា បានចូលរួមប្រកួតក្នុងពានរង្វាន់ Davis Cup លើកដំបូងនៅឆ្នាំ២០១២ ស្ថិតក្នុង Group IV ហើយនៅឆ្នាំ២០១៣ ទទួលបានឱកាសឡើងទៅប្រកួតក្នុង Group III ជាបន្ត ព្រមទាំងរក្សាកៅអីរហូតដល់ឆ្នាំ២០១៧ ទើបធ្លាក់ទៅលេង Group IV វិញ ខណៈរង់ចាំរហូតដល់៦ឆ្នាំទើបទទួលបានឱកាសឡើងទៅ Group III ម្តងទៀតពោលគឺនៅឆ្នាំ២០២៣ ខាងមុខ៕