Dy Sao គឺជាអ្នកលេងក្បាច់គុនដ៏ស្ទាត់ជំនាញមួយរូប ដោយសារតែទេពកោសល្យដ៏ប៉ិនប្រសប់នេះហើយទើបធ្វើឱ្យលោកមានឱកាសបោះជំហានចូលក្នុងវិស័យភាពយន្តហូលីវូដក្នុងឋានៈជា Stuntman។ តស៊ូព្យាយាមលើវិថីនេះជាច្រើនឆ្នាំទីបំផុតលោកបានក្លាយជាតួឯកជាលើកដំបូងក្នុងភាពយន្ត «Hanuman: Shadow Master»។
ភាពយន្តបែបវាយតប់ប្រើប្រាស់ក្បាច់គុនជាគោលនេះត្រៀមនឹងបញ្ចាំងនៅអាល្លឺម៉ង់ នៅថ្ងៃទី២៥ ខែវិច្ឆិកា ខាងមុខនេះហើយ។ Trailer ដំបូងនៃភាពយន្តនេះបានបង្ហោះកាលពីថ្ងៃទី១៥ ខែតុលា ខណៈដែល Trailer កម្រិត HD នឹងបង្ហោះជូនទស្សនានៅថ្ងៃទី១៨ ខែវិច្ឆិកា ឆ្នាំ២០២២ខាងមុខនេះ។
បើនិយាយពី Dy Sao លោកកើតនៅថ្ងៃទី៣ ខែតុលា ឆ្នាំ១៩៧៩ បុរសដែលមានឈាមជ័រជាជនជាតិខ្មែរសុទ្ធសាធរូបនេះ គឺជាតារាមួយរូបដែលមានបទពិសោធជោគជាំលើវិថីសិល្បៈភាពយន្តបែបវាយតប់ ព្រោះក្រៅពីជា Stuntman លោកក៏ជាអ្នកជំនាញក្បាច់គុនមួយរូបដែលបានបង្ហាត់ក្បាច់គុនដល់តួឯក Simu Liu ពីភាពយន្ត Shangchi and the Legend of the Ten Rings របស់ផលិតកម្ម Marvel កាលពីឆ្នាំ២០២១ ផងដែរ។
ក្រោយសម្ងំដុសខាត់និងសំលៀងជំនាញក្បាច់គុនជាច្រើនឆ្នាំ តាមរយៈការចូលរួមសម្ដែងក្នុងភាពយន្តជាច្រើនរឿង បុរសដែលមានដើមកំណើតមកពីខេត្តបាត់ដំបងរូបនេះ ក្ដោបក្ដាប់បានឱកាសសម្ដែងជាតួឯកនៅក្នុងភាពយន្ត «Fast Vengeance» រួមជាមួយនឹង DMX និង Ba Ling ។ Dy Sao ធ្លាប់បានសម្ដែងជាមួយនឹង Bai Ling ក្នុងភាពយន្តឈ្នះពានរង្វាន់ How War Ends កាលពីឆ្នាំ២០២១ ដែលរឿងនេះនិយាយពីបងប្អូនពីរនាក់រួចរស់ជីវិតពីរបបប៉ុលពត និងការចងចាំដ៏គួរឱ្យភ័យខ្លាចដែលដក់ជាប់ក្នុងអារម្មណ៍។
ក្រៅពីនេះ លោកក៏មានឱកាសសម្ដែងជាមួយនឹង big name នៅក្នុងវិស័យភាពយន្តហូលីវូដដូចជា Jamie Lee Curtis និង Michelle Yeoh នៅក្នុងភាពយន្ត Everywhere All at Once នាឆ្នាំ២០២២នេះផងដែរ។ សម្រាប់កូនខ្មែរដែលធំធាត់នៅក្នុងទឹកដី Long Beach រដ្ឋកាលីហ្វ័រញ៉ារូបនេះ បានចាប់ផ្ដើមវិថីក្បាច់គុនរបស់ខ្លួនតាមរយៈហាត់ធ្វើតាមរៀមច្បងជាអ្នកគុននិយមចិនដូចជា Bruce Lee (លី សៀវឡុង) និង Donnie Yen នៅលើកំរាលព្រំនៅក្នុងផ្ទះរបស់គេ។ បន្តមកទៀត លោកបានចាប់ផ្ដើមស្វែងយល់ពីក្បាច់គុន និង ហ្វឹកហាត់គុន Kickboxing របស់អាមេរិកនិងក្បាច់គុនល្បុក្កតោរបស់ខ្មែរ រួមជាមួយនឹងក្បាច់កុងហ្វូរបស់និងក្បាច់គុនប្រើប្រាស់អាវុធចិនបុរាណ។
បើនិយាយដល់ការសិក្សាកាលពីឆ្នាំ ២០១៣ Dy Sao បានបញ្ចប់ការសិក្សាបរិញ្ញាប័ត្រជំនាញចិត្តវិទ្យា ហើយនៅក្នុងឆ្នាំដដែលនោះលោកក៏ជាកីឡការជម្រើសជាតិអាមេរិកតំណាងឱ្យក្រុម វ៉ូស៊ូកុងហ្វូ នៅក្នុងកម្មវិធីប្រកួត World Games Macau ប្រទេសចិន។ ឱកាសហ្វឹកហាត់ក្បាច់គុន និង សម្ដែងភាពយន្តរបស់លោកបានចាប់ផ្ដើមនៅពេលដែលលោកមានឱកាសបានចួប Jet Li និង Jackie Chan ហើយបានក្លាយជាកូនសិស្សរបស់វិហារសៅលីង ដែលជាទីតាំងល្បីល្បាញផ្នែកវិជ្ជាគុនរបស់ប្រទេសចិន។
អ្នកគាំទ្រមើលឃើញថាការដែលកូនខ្មែររូបនេះបន្តបានឱកាសសម្ដែងភាពយន្តក្នុងផលិតកម្មហូលីវូដ គឺជាសញ្ញាវិជ្ជមានមួយក្នុងការចូលរួមជួយផ្សព្វផ្សាយពីក្បាច់គុនខ្មែរ អត្តសញ្ញាណជនជាតិខ្មែរតាមរយៈស្នាដៃសិល្បៈនៅលើឆាកអន្តរជាតិ។
«Hanuman: Shadow Master» និយាយពីបុរសម្នាក់ឈ្មោះ អាន វឿន សម្ដែងដោយ Dy Sao ត្រូវបានគេតាមសម្លាប់នៅក្នុងសង្គ្រាមបងធំនៅក្នុងកន្លែងដែលលោករស់នៅ ប៉ុន្តែក្រោយមកបុរសរូបនេះបានលេចមុខត្រលប់មកវិញជាមួយនឹងសមត្ថភាពពិសេស មានកម្លាំងដូចជាសត្វចម្លែក ហើយស្វែងរកសងសឹកចំពោះឧក្រិដ្ឋជនដែលបានឆក់យកជីវិតគេ៕
