សហព័ន្ធកីឡាបាល់ទះកម្ពុជា បានធ្វើការចុះអនុស្សារណៈយោគយល់គ្នា (MOU) ជាមួយសមាគមកីឡាកម្ពុជា-អាមេរិក នៅព្រឹកថ្ងៃសុក្រ ទី២៨ ខែតុលា ឆ្នាំ២០២២ នេះ ខណៈភាគីទាំង២មានកិច្ចការដែលត្រូវធ្វើចំពោះមុខជាមួយគ្នា និងការងារនៅថ្ងៃអនាគតជាបន្តដើម្បីជម្រុះវិស័យកីឡាបាល់ទះជាតិឱ្យកាន់តែឆ្ពោះទៅមុខ។
ក្រោយចប់ពិធីចុះអនុស្សារណៈយោគយល់គ្នា តាមប្រព័ន្ធអនឡាញ លោកបណ្ឌិត អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា បានថ្លែងប្រាប់អ្នកសារព័ត៌មានថា អ្វីដែលភាគីទាំង២ត្រូវធ្វើចំពោះមុខគឺការត្រៀមខ្លួនឱ្យបានល្អក្នុងព្រឹត្តិការណ៍កីឡាស៊ីហ្គេម ដែលនឹងមកដល់នៅខែឧសភា ឆ្នាំក្រោយនិងផែនការរយៈពេលវែងទៅថ្ងៃអនាគតទៀត។
លោកអគ្គលេខាធិការបានលើកឡើងពីបញ្ហាចំពោះមុខពោលគឺត្រៀមការប្រកួតស៊ីហ្គេម២០២៣ ថា៖«អនុស្សារណៈយោគយល់គ្នា នៅថ្ងៃនេះ ក្នុងគោលបំណងសំខាន់ធំនោះគឺធ្វើយ៉ាងណាឱ្យវិស័យបាល់ទះនៅស្រុកខ្មែរយើងមានការរីកចម្រើន ប៉ុន្តែក្នុងនោះខ្ញុំផ្តោតលើការងារចំបង២។ ទី១ គឺពាក់ព័ន្ធជាមួយវិញ្ញាសាឆ្នេរខ្សាច់។ កីឡាការិនីប្រភេទឆ្នេរខ្សាច់នៅប្រទេសកម្ពុជា របស់យើង អត់ដែលមានទេ ភាគច្រើនគឺវាពាក់ព័ន្ធទៅនឹងវប្បធម៌ប្រពៃណី ក៏ថាបានដែរ។ ចំណែកបណ្ដាប្រទេសអាស៊ានមួយចំនួន ក៏អ៊ីចឹងដែរ ការស្លៀកប៊ីគីនី មិនអាចលេងបានទេ។ ខ្ញុំជឿជាក់ថា វប្បធម៌ អរិយធម៌យើង ត្រូវតែថែរក្សាហើយ ប៉ុន្តែពិភពលោកសកលភាវូបនីយកម្ម ក៏យើងមិនត្រូវតែបុរាណនិយមពេកទេ ក្នុងន័យតែមួយអភិរក្ស ប៉ុន្តែត្រូវមានការអភិវឌ្ឍ។ អ៊ីចឹង យើងបានសំណូមពរបណ្ដាអត្តពលិកកម្ពុជា របស់យើង មិនត្រឹមតែនៅអាមេរិកទេ បណ្ដានៅលើពិភពលោកទាំងអស់ ឲ្យតែគាត់មានឆន្ទៈស្រឡាញ់ជាតិ ចង់ជួយជាតិ ជ្រោងកីឡាជាតិ គឺយើងស្វាគមន៍ ក្នុងករណីដែលគាត់មានទេពកោសល្យគ្រប់គ្រាន់ ដើម្បីក្លាយជាកីឡាករ-កីឡាការិនី តំណាងជាតិរបស់យើង មកចូលរួមជាមួយកីឡាការិនីនៅក្នុងប្រទេស ដើម្បីធ្វើម៉េច ឲ្យយើងទទួលបាននូវលទ្ធផលល្អប្រសើរ នៅពេលដែលយើងទទួលធ្វើជាម្ចាស់ផ្ទះស៊ីហ្គេម លើកទី៣២ នៅកម្ពុជាយើងនេះ»។
ករណីទី២ នោះលោកបន្តថា «ទី២ ក៏យើងស្នើសុំដែរក្នុងការស្វែងរកកីឡាការិនីក្នុងសាលបន្ថែមទៀត។ កីឡាការិនីរបស់យើង គឺនៅមានកម្រិតទាបខ្លាំង ដែលយើងពិបាកប្រកួតប្រជែងជាមួយបណ្ដាប្រទេសជិតខាង។ ហើយយើងអត់មានប្រវត្តិបង្កើតក្រុមជម្រើសជាតិកម្ពុជា វិញ្ញាសានារីនេះ ធ្វើការប្រកួតប្រជែងជាមួយនឹងបរទេសដែរ ក្រោយស្រុកទេសចប់សង្រ្គាមស៊ីវិល។ ដូច្នេះហើយ បានជាសហព័ន្ធកីឡាបាល់ទះកម្ពុជា របស់យើង បង្កើតជ្រើសរើសបាន១៤នាក់ ដើម្បីទៅហ្វឹកហាត់នៅប្រទេសចិន។ និយាយដោយស្មោះត្រង់ គុណផលរបស់យើង គឺនៅមានកម្រិតទាបបំផុត ដោយសារការប្រកួតប្រជែងវិញ្ញាសាបាល់ទះនារីរបស់យើង គឺមិនសម្បូរបែប ខុសពីបុរស។ អ៊ីចឹង គឺយើងទាមទារឲ្យជនរួមជាតិរបស់យើង ដែលជាជនជាតិខ្មែរ និងបណ្ដាប្រទេសនៅលើពិភពលោក ដែលគាត់មានគុណផលល្អ មានទេពកោសល្យល្អ ហើយជាអត្តពលិកតំណាងសាកលវិទ្យាល័យ វិទ្យាល័យ នៅស្រុកគេ ដែលគាត់ធ្វើការប្រកួតប្រជែងបានច្រើន គាត់អាចមកចូលរួម ហើយសហព័ន្ធស្វាគមន៍ និងច្របាច់បញ្ចូលគ្នា រវាងជនជាតិខ្មែរនៅតាមបណ្ដាប្រទេស មកចូលរួមជាមួយនឹងកីឡាការិនីដែលយើងទើបតែរើសបាន ១៤នាក់ ដើម្បីធ្វើឱ្យមានគុណផលនៃការប្រកួតល្អ»។
«ចំណែកផែនការទៅមុខទៀត ក្រោយចប់ស៊ីហ្គេមនោះ យើងចង់បន្តនាំគ្នាអភិវឌ្ឍន៍បាល់ទះកម្ពុជា ដោយតាមរយៈសមាគមនឹងជាស្ពានមួយសម្រាប់បាល់ទះកម្ពុជា និងអាមេរិក។ ដោយអាចស្នើសុំអត្តពលិកខាងអាមេរិក មកប្រកួតនៅយើង ឬ យើងទៅប្រកួតអាមេរិក។ កាលណាប្រកួតប្រជែងអន្តរជាតិច្រើន យើងអាចពង្រឹងកីឡាករយើងបានកាន់តែខ្ពស់ទៀត។ ក្រៅពីទំនាក់ទំនងទាំងនេះយើងក៏ផ្តោតលើការចែករំលែកពីសំណាក់គ្រូបង្វឹក និងមន្រ្តីបច្ចេកទេស ជាដើម»។ លោកអគ្គលេខាធិការបន្ថែម។
លោកបណ្ឌិត អាំង សិរីពិសិដ្ឋ បន្តថា៖«ក្រោយចុះ MOU នេះភាគីខ្មែរនៅអាមេរិក គាត់ចាប់ផ្តើមប្រកូកប្រកាសស្វែងរកកូនខ្មែរដែលនៅតាមបណ្តារដ្ឋ នៅអាមេរិក ដែលមានសមត្ថភាព ហើយខ្ញុំជឿជាក់ថាពួកគាត់អាចជ្រើសរើសរកអ្នកមានគុណផលល្អ មកជួយដល់យើង»។
យ៉ាងណាក្តីលោកវាយតម្លៃបានថា៖«នេះមិនមែនជារឿងថ្មីទេ ប៉ុន្តែនេះជាជំហានថ្មីរបស់សហព័ន្ធ។ មួយរយៈចុងក្រោយនេះយើងបានធ្វើកិច្ចការងារជាច្រើនជាមួយសហព័ន្ធកីឡាបាល់ទះអាស៊ាន អាស៊ី និងអន្តរជាតិ។ មិនតែប៉ុណ្ណោះយើងបានអញ្ញើញមិត្តអាស៊ាន គឺសិង្ហបុរី មកប្រកួតមិត្តភាពអន្តរជាតិ ព្រមទាំងបានធ្វើកិច្ចការជាមួយភាគីមិត្តគុយបា ទាំងការនាំយកគ្រូបង្វឹក និងការប្រកួតមិត្តភាពជាមួយគ្នា ផងដែរ។ ប៉ុន្មានថ្ងៃមុនឯកឧត្តម ប្រធានសហព័ន្ធបានធ្វើកិច្ចប្រតិបត្តិការជាមួយនឹងប្រធានសហព័ន្ធបារាំង ជាដើម»៕
