ខ្សែប្រយុទ្ធក្លិបបាល់ទាត់ Tottenham Hotspur កីឡាករ Son Heung-Min នៅមិនទាន់ច្បាស់ថាអាចជួយក្រុមជម្រើសជាតិកូរ៉េខាងត្បូង ក្នុងព្រឹត្តិការណ៍ FIFA World Cup 2022 នៅប្រទេសកាតា នោះឡើយ បន្ទាប់ពីរបួសប្រេះឆ្អឹងជិតភ្នែក។
Son Heung-Min បានរបួសបាក់ឆ្អឹងមុខនៅពាក់កណ្តាលតង់ទី១ ពោលគឺនាទី២៩’ ដោយប្តូរជំនួសមកវិញដោយកីឡាករ Yves Bissouma ការប្រកួតចុងក្រោយវគ្គសន្សំពិន្ទុនៃពានរង្វាន់ Champions League ដែលក្រុមមាន់ខ្នាយមាស Tottenham បានយកឈ្នះលើក្រុមម្ចាស់ផ្ទះ Marseille បន្ទាប់ពីការប៉ះទង្គិចគ្នាជាមួយខ្សែការពារ Chancel Mbemba។ ខ្សែប្រយុទ្ធវ័យ៣០ឆ្នាំរូបនេះ តម្រូវឱ្យមានការសង្គ្រោះបឋមយ៉ាងយូរនៅលើទីលាន មុនពេលត្រូវបានប្តូរចេញ។
ក្រោយចប់ការប្រកួតក្លិបបាល់ទាត់ Tottenham Hotspur បានបញ្ជាក់នៅលើគេហទំព័រផ្លូវការរបស់ខ្លួនថា៖«យើងអាចបញ្ជាក់បានថា Son Heung-min នឹងត្រូវធ្វើការវះកាត់ដើម្បីរក្សាលំនឹងដោយសារការបាក់ឆ្អឹងជុំវិញភ្នែកខាងឆ្វេងរបស់គេ។ ហើយបន្ទាប់ពីការវះកាត់បញ្ចប់ Son នឹងត្រូវចាប់ផ្តើមការស្តារនីតិសម្បទាជាមួយបុគ្គលិកពេទ្យរបស់យើង ហើយយើងនឹងធ្វើបច្ចុប្បន្នភាពដល់អ្នកគាំទ្របន្ថែមទៀតនៅពេលក្រោយ»។
ព្រឹត្តិការណ៍ World Cup 2022 នៅប្រទេសកាតា នឹងចាប់ផ្តើមដំណើរការប្រកួតរបស់ខ្លួននៅថ្ងៃទី២០ ខែវិច្ឆិកា រហូតដល់ថ្ងៃទី១៨ ខែធ្នូ ខាងមុខនេះ។ ខណៈក្រុមជម្រើសជាតិកូរ៉េខាងត្បូងស្ថិតក្នុងពូល H រួមជាមួយព័រទុយហ្គាល់ ហ្គាណា និងអ៊ុយរូហ្គាយ។
សម្រាប់ការប្រកួតបើកឆាករបស់ក្រុមជម្រើសជាតិកូរ៉េខាងត្បូង ត្រូវជួបជាមួយ ក្រុមជម្រើសជាតិអ៊ុយរូហ្គាយ នៅថ្ងៃទី២៤ ខែវិច្ឆិកា ឆ្នាំ២០២២ វេលាម៉ោង ៨:០០នាទីយប់ នៅកីឡដ្ឋាន Education City៕