ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ បានណែនាំម្ចាស់ទីតាំងសណ្ឋាគារ និងផ្ទះសំណាក់ទាំងអស់ក្នុងរាជធានីភ្នំពេញ ផ្តល់កិច្ចសហការឱ្យបានច្បាស់លាស់ជាមួយសមត្ថកិច្ច និងអាជ្ញាធរដែន ដីតាមរយៈការកំណត់អត្តសញ្ញាណភ្ញៀវដែលចូលស្នាក់នៅក្នុងសណ្ឋាគារ ឬផ្ទះសំណាក់របស់ខ្លួនរួមទាំងផ្តល់បញ្ជីឈ្មោះជាប្រចាំថ្ងៃដល់អាជ្ញាធរ។
ការថ្លែងរបស់ឯកឧត្តមអភិបាលរាជធានីភ្នំពេញ បានធ្វើឡើងក្នុងកិច្ចប្រជុំជាលើកចុងក្រោយ ដើម្បីពិនិត្យលើវឌ្ឍនភាពនៃការរៀបចំពង្រឹងសន្តិសុខសណ្តាប់ធ្នាប់ និងសោភ័ណភាពបរិស្ថាន របៀបរៀបរយសាធារណៈក្នុងរាជធានីភ្នំពេញ មុនពេលកិច្ចប្រជុំកំពូលអាស៊ានលើកទី៤០ និង៤១ព្រមទាំងកិច្ចប្រជុំកំពូលពាក់ព័ន្ធមួយចំនួនទៀតចាប់ផ្តើមពីថ្ងៃទី១០ដល់ថ្ងៃទី១៣វិច្ឆិកាឆ្នាំ២០២២។
ក្នុងអំឡុងពេលកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធដែលមានគណៈប្រតិភូមិមកពី៣២ប្រទេស និងស្ថាប័នចូលរួមនោះ មានសណ្ឋាគារចំនួន៧ ត្រូវបានកងរាជអាវុធហត្ថលើផ្ទៃប្រទេសកំណត់ជាគោលដៅត្រូវបង្កើនការយកចិត្តទុកដាក់ការពារន្តិសុខ និងសណ្ដាប់ធ្នាប់សាធារណៈ។ នេះបើតាមឧត្តមសេនីយ៍ អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសថ្លែងក្នុងវីដេអូមួយបង្ហោះនាថ្ងៃម្សិលមិញនេះ។
បើតាមឧត្តមសេនីយ៍ អេង ហ៊ី សណ្ឋាគារទាំងនោះ រួមមានសណ្ឋាគារសុខាភ្នំពេញដែលជាសណ្ឋាគារត្រូវបានកំណត់ជាកន្លែងប្រជុំកំពូលអាស៊ាន និងបណ្ដាសណ្ឋាគារផ្សេងទៀត រួមមានសណ្ឋាគារហ្គាដិនស៊ីធី សណ្ឋាគារឡឺរ៉ូយ៉ាល់ សណ្ឋាគារភ្នំពេញ សណ្ឋាគាររ៉ូសវ៉ូដភ្នំពេញ សណ្ឋាគារហៃយ៉ាត់រីជិនស៊ី សណ្ឋាគារសូហ្វីតែលភ្នំពេញភូគីត្រា និងសណ្ឋាគារកាំបូឌីយ៉ាណា។
ពាក់ព័ន្ធនឹងការពង្រឹងសន្តិសុខ និងសណ្ដាប់ធ្នាប់សាធារណៈនេះដែរ ក្នុងកិច្ចប្រជុំចុងក្រោយកាលពីថ្ងៃទី៧ ខែវិច្ឆិកាដដែលនោះ ឯកឧត្តម ឃួង ស្រួង ក៏បានសង្កត់ធ្ងន់ដែរថា ដងវិថីសំខាន់ៗដែលប្រតិភូត្រូវ ធ្វើដំណើរឆ្លងកាត់ ពិសេសមហាវិថីសហព័ន្ធរុស្ស៊ី រាល់ស្ថានីយប្រេងឥន្ទនៈ ទីតាំងលក់រថយន្ត,ការដ្ឋានសំណង់ផ្សេងៗត្រូវផ្អាកដំណើរការជាបណ្តោះអាសន្ន ,ទីតាំងKTV,ក្លឹបកម្សាន្ត ទីតាំងផ្ញើម៉ូតូ.ឡានឬចតតាមចិញ្ចើមថ្នល់ត្រូវបានហាម មិនឱ្យមានឡើយ៕
