អតីតគ្រូបង្វឹកក្រុមបាល់ទាត់ព្រះខ័នរាជស្វាយរៀង លោក សំ វ៉ាន់ដេត បានបង្ហាញទស្សនៈមួយពីលទ្ធផល តែទំនងសំដៅលើលទ្ធផលប្រកួតរបស់ក្រុមជ្រើសជាតិកម្ពុជា ដែលបញ្ចប់កាលពីពេលថ្មីៗ ក្នុងវគ្គជម្រុះជុំទី២នៃពានរង្វាន់បាល់ទាត់ជើងឯកពិភពលោក 2022 FIFA World Cup Qatar ប្រចាំទ្វីបអាស៊ី។
៨ប្រកួតរបស់កម្ពុជា ក្នុងពូល C ជាមួយក្រុមអ៊ីរ៉ាក់ អ៊ីរ៉ង់ បារ៉ែន ហុងកុង បានរបូតគ្រាប់បាល់ដល់ទី៤៤គ្រាប់ ហើយបានទាត់ចូលទីគូប្រកួតវិញ២គ្រាប់។ ប្រកួតទាំងនោះដូចជា៖
*ជើងទី១
-៥ កញ្ញា ២០១៩ កម្ពុជា ១-១ ហុងកុង
-១០ កញ្ញា ២០១៩ កម្ពុជា ០-១ បារ៉ែន
-១០ តុលា ២០១៩ អ៊ីរ៉ង់ ១៤-០ កម្ពុជា
-១៥ តុលា ២០១៩ កម្ពុជា០-៤ អ៊ីរ៉ង់
*ជើងទី២
-១៩ វិច្ឆិកា ២០១៩ ហុងកុង ២-០ កម្ពុជា
-៣ មិថុនា ២០២១ បារ៉ែន ៨-០ កម្ពុជា
-៧ មិថុនា ២០២១ អ៊ីរ៉ាក់ ៤-១ កម្ពុជា
-១១ មិថុនា ២០២១ កម្ពុជា ០-១០ អ៊ីរ៉ង់
នៅព្រឹកថ្ងៃសៅរ៍ ទី១២ ខែមិថុនា ឆ្នាំ២០២១ លោក សំ វ៉ាន់ដេត បានលើកឡើងថា៖«ខ្ញុំទទួលស្គាល់ថាទំរង់លេង ឬចង្វាក់លេងមានការរីកចម្រើន ប៉ុន្តែ៥ទៅ១០ឆ្នាំទៀតវានឹង រសាយ ឬអាចល្អជាងនឹងតែលទ្ធផល បែបនេះ៥០ទៅ១០០ឆ្នាំវានៅតែបន្សល់ទុកទាំងអាម៉ាស់»។
លោកបន្តថា៖«ត្រៀមសម្រាប់ថ្ងៃមុខតើគួបោះបង់អ្វីៗនៅថ្ងៃនេះទេបើអ្នកគិតថាល្អខ្ញុំនឹងជូនពរអ្នកដោយក្តីសង្ឃឹម។មិនមែនរិះគន់ទេគ្រាន់តែជាទស្សនៈគ្រូបាល់ទាត់តូចតាចម្នាក់ដែលសឹងថាពាក់កណ្តាលជីវិតយល់ពីបាល់ទាត់។ សង្ឃឹមយ៉ាងខ្លាំងថាប្រកួតក្នុងតំបន់យើងនឹងកែប្រែនិងកំណត់ត្រាថ្មីដូច២ឆ្នាំមុន។ សំណាងល្អ ! ខ្ញុំស្រលាញ់និងគាំទ្របាល់ទាត់ជាតិខ្មែរព្រោះខ្ញុំជាខ្មែរ»៕