ក្លិបបាល់ទាត់វិសាខា បានយកឈ្នះ ព្រះខ័នរាជស្វាយរៀង ក្នុងលទ្ធផល ១-០ នៅកីឡដ្ឋានព្រីនស៍ ក្នុងពានរង្វាន់ជម្រើសជើងឯកខេមបូឌានព្រីមៀរលីគ ឆ្នាំ២០២២ សប្តាហ៍ទី២៣ ក្រោមក្រសែលភ្នែកអ្នកគាំទ្រ ១,០១៧នាក់។
១គ្រាប់ជ័យជម្នះដោយខ្សែការពារស្លាប ឆេង ម៉េង នៅនាទី៤៦’ ដើមវគ្គទី២ ជួយឱ្យវិសាខាកាត់គម្លាតកាន់តែជិតក្រុមកំពូលតារាង ព្រះខ័នរាជស្វាយរៀង ពី៦ពិន្ទុ មកសល់តែ៣ពិន្ទុប៉ុណ្ណោះ។
ខណ:ក្លិបបាល់ទាត់បឹងកេត ចែកគ្នាម្នាក់១ពិន្ទុជាមួយ ភ្នំពេញក្រោន ក្រោយបញ្ចប់លទ្ធផល៩០នាទីពេញ ០-០ នៅកីឡដ្ឋាន Cambodia Airway ក្រោមក្រសែលភ្នែកអ្នកគាំទ្រ ១,៤១៧នាក់។
ពេលនេះតំណែងកំពូលតារាងរបស់ក្រុមមានមូលដ្ឋាននៅខេត្តស្វាយរៀងហាក់កាត់បន្ថយកាន់តែកៀកទៅៗ និងជួបគ្រោះថ្នាក់គ្រប់ពេលបើភ្លាត់ ស្មើ ឬបន្តចាញ់ បច្ចប្បន្នលើសវិសាខា៣ពិន្ទុ ខណៈនៅសល់៤ប្រកួតទៀត។
បច្ចុប្បន្នព្រះខ័នរាជស្វាយរៀង របស់លោក Conor Nestor ស្ថិតនៅកំពូលតារាង ជាមួយ៤៦ពិន្ទុ ពីការលេង២៣ប្រកួត ឈ្នះ១៤ ស្មើ៤ និងចាញ់៥ ខណ:វិសាខា ក្រោមការដឹកនាំរបស់លោក មាស ចាន់ណា កំពុងស្ថិតនៅលេខរៀងទី២ ជាមួយ៤៣ពិន្ទុ ក្រោយឆ្លងកាត់២៣ប្រកួត ឈ្នះ១៣ ស្មើ៤ និងចាញ់៦។
ភ្នំពេញក្រោន របស់លោក Oleg Starynskyi ស្ថិតនៅកំពូលតារាង ជាមួយ៤០ពិន្ទុ ពីការលេង២៣ប្រកួត ឈ្នះ១១ ស្មើ៧ និងចាញ់៥ ខណ:បឹងកេត ក្រោមការដឹកនាំរបស់លោក ហៅ សុជាតិ កំពុងស្ថិតនៅលេខរៀងទី៤ ជាមួយ៣៩ពិន្ទុ ក្រោយឆ្លងកាត់២៣ប្រកួត ឈ្នះ១១ ស្មើ៦ និងចាញ់៦៕