ក្រុមបាល់ទាត់អង្គរថាយហ្គឺរ បានប្រកាសចែកផ្លូវជាមួយកីឡាករ៦នាក់ នៅថ្ងៃចន្ទ ទី១៤ ខែវិច្ឆិកា ឆ្នាំ២០២២ នេះ ក្រោយចប់បេសកកម្មក្នុងរដូវកាលឆ្នាំ២០២២ នេះ ពោលគឺអស់ឱកាសទាំងក្នុងពានរង្វាន់ Cambodian League Cup 2022, Hun Sen Cup 2022 និង Cambodian Premier League 2022។
កីឡាករដែលក្លិបដែលមានថៅកែជាជនជាតិជប៉ុន ប្រកាសចែកផ្លូវនោះមាន៖
១) ជម្រើសជាតិទីម័រខាងកើត Mouzinho Barreto de Lima
២) កីឡាករ រដ្ឋ សំណាង
៣) កីឡាករ មិត សាម៉ើយ
៤) កីឡាករ ចាន់ សុភា
៥) កីឡាករ កែវ សារ៉ាត់
៦) កីឡាករ ឡាក់ សុភ័ក្ត្រា
នេះជាការប្រកាសចែកផ្លូវបន្ថែមទៀត ក្រោយពីក្លិបបានចប់កិច្ចសន្យាខ្ចីជើងកីឡាករ ម៉ៅ ពិសិដ្ឋ ដូច្នេះហើយកីឡាកររូបនេះទៅចូលរួមជាមួយក្រុមចាស់ភ្នំពេញក្រោន វិញ។
ក្រុមអង្គរថាយហ្គឺរ មានមូលដ្ឋាននៅខេត្តសៀមរាប ដោយបញ្ចប់រដូវកាលនេះឈរចំណាត់ថ្នាក់លេខ៧ ក្នុងចំណោមក្រុមជាសមាជិក៨ក្រុម ក្នុងពានរង្វាន់លីគកំពូលកម្ពុជា Cambodian Premier League 2022 ខណៈក្នុងពានរង្វាន់សម្តេចតេជោ ឆ្នាំ២០២២ ក្រុមនេះរបូតចេញត្រឹមវគ្គ ១៦ក្រុមចុងក្រោយ បន្ទាប់ពីចាញ់ក្រុមខេត្តកោះកុង ដោយលទ្ធផលទាំង២ជើង ៥ទល់២។ ចំណែកក្នុងពានរង្វាន់ Cambodian League 2022 ក្រុមរបស់លោក Akihiro Kato បានធ្លាក់ត្រឹមវគ្គចែកពូល៕