កីឡាករChristian Eriksen បានដួលសន្លប់នៅចុងតង់ទី១ ក្នុងប្រកួតរវាងក្រុមជម្រើសជាតិដាណឺម៉ាក របស់ខ្លួនជាមួយក្រុមភ្ញៀវហ្វាំងឡង់ វគ្គជម្រុះពូល B នៃពានរង្វាន់បាល់ទាត់ជើងឯកទ្វីបអឺរ៉ុប UEFA Euro 2020លើទីលានកីឡដ្ឋាន Parken Stadium ក្នុងទីក្រុង Copenhagen ខណៈរូបគេត្រូវបានដឹងខ្លាំងវិញក្រោយបញ្ជូនទៅដល់មន្ទីរពេទ្យភ្លាមៗ។
អ្នកគាំទ្រនៅទីលាន កីឡាករនៃគូប្រកួតទាំងសងខាង លោក Gianni Infantino ប្រធានសហព័ន្ធកីឡាបាល់ទាត់អន្តរជាតិ (FIFA) ក្រុមបាល់ទាត់អាល្លឺម៉ង់ ជាពិសេសកីឡាករ Romelu Lukaku របស់បែលហ្ស៊ិក ដែលជាមិត្តរួមក្រុមនៅក្លិប Inter Milan សុទ្ធតែផ្ញើសារជូនពរឱ្យChristian Eriksen ឱ្យឆាប់ជាសះស្បើយឡើងវិញ។ យ៉ាងណាក្តីនៅក្នុងការប្រកួតនេះ ត្រូវបានគណៈកម្មការសម្រេចឱ្យកីឡាកររូបនេះជាប់ឈ្មោះជាកីឡាករឆ្នើមក្នុងការប្រកួត (Man of the match)។
អត្ថបទពាក់ព័ន្ធ៖យ៉ូរ៉ូ៖អ៊ីតាលី ឈ្នះថ្ងៃបើកឆាក ខណៈស៊ុយអែត ថែមបម្រុង៦នាក់ជំនួសអ្នកចាស់កើតកូវីដ-១៩
លោកអាជ្ញាកណ្ដាលជនជាតិអង់គ្លេស Anthony Taylor បានសម្រេចឱ្យដំណើរការប្រកួតនេះឡើងវិញ ក្រោយពេលកីឡាករ Christian Eriksen បញ្ជូនដល់មន្ទីរពេទ្យសុវត្ថិភាព។ កីឡាករ Joel Pohjanpalo របស់ហ្វាំងឡង់ បានរកគ្រាប់បាល់ក្នុងប្រកួតនេះ នៅនាទី៦០ ហើយលទ្ធផលបានរក្សារហូតដល់បញ្ចប់ការប្រកួត ក្រោមក្រសែភ្នែកទស្សនិកជនប្រមាណជាង១ម៉ឺន៥ពាន់នាក់។
សរុបលទ្ធផលប្រកួតនៅយប់ថ្ងៃសៅរ៍៖
វ៉ែល ១-១ ស្វីស
ដាណឺម៉ាក ០-១ ហ្វាំងឡង់
បែលហ្សិក ៣-០ រុស្ស៊ី
សម្រាប់ប្រកួតនៅយប់ថ្ងៃអាទិត្យ នេះវិញ៖
អង់គ្លេស Vs ក្រូអាត ម៉ោង៨យប់
អូទ្រីស Vs កោះម៉ាសេដូនីខាងជើង ម៉ោង១១យប់
ហុល្លង់ Vs អ៊ុយក្រែន ម៉ោង២យប់