ក្រុមអង្គរថាយហ្គឺរ (Angkor Tiger FC) បានចែកផ្លូវជាមួយកីឡាករមួយចំនួនក្រោយចប់បេសកម្មក្នុងរដូវកាលឆ្នាំ២០២២ នេះ ខណៈលោក Alistair Heath គ្រូបង្វឹកជនជាតិអង់គ្លេស បញ្ជាក់ថាលោកកំពុងតែរៀបចំរចនាសម្ព័ន្ធ ក្នុងក្លិបដែលមានថៅកែជាជនជាតិជប៉ុន នេះឡើងវិញ។
នៅលើហ្វេសប៊ុករបស់ក្រុមដែលមានមូលដ្ឋាននៅខេត្តសៀមរាប មួយនេះលោក Alistair Heathបានលើកឡើងថា៖«ខ្ញុំមានសារសំខាន់ចង់ចែករំលែកទៅកាន់អ្នកទាំងអស់គ្នា ក៏ដូចជាកីឡាករ ដោយជាដំបូងខ្ញុំ សូមអរគុណចំពោះការគាំទ្រ និងនៅតែបន្តគាំទ្រ។ ចំពោះ កីឡាករចាស់ៗដែលបានចាកចេញពីពួកយើង កាលពីរយៈពេលថ្មីៗចុងក្រោយនេះ ខ្ញុំសូមអរគុណសម្រាប់ការប្រឹងប្រែង ចូលរួមជាចំណែករបស់ពួកគេក្នុងរដូវកាលកន្លងទៅនេះ ដែលមានរឿងជាច្រើនទាំងពេលវេលាល្អ និង មិនល្អរួមគ្នាជាច្រើន ហើយសម្រាប់រឿងនោះ ខ្ញុំពិតជាដឹងគុណលើការលះបង់និងយកចិត្តទុកដាក់ក្នុងការហ្វឹកហាត់ និងលេងជាក្រុមខ្លាំងណាស់។ ខ្ញុំសូមជូនពរឱ្យពួកគេទទួលបានជោគជ័យក្នុងអាជីពនាពេលអនាគតរបស់ពួកគេជាបន្តបន្ទាប់»។
អតីតគ្រូបង្វឹករបស់ក្រុមយុវជនក្លិប Leicester City នៅអង់គ្លេស បានបន្តថា៖«ទោះជាយ៉ាងណាក៏ដោយ អ្វីដែលយើងបានបង្ហាញ គឺ ការ រៀបចំ រចនាសម្ព័ន្ធ ឡើងវិញ ដែលខ្ញុំធ្លាប់បាននិយាយអំពី រដូវកាលមុន ឥឡូវនេះយើងក៏កំពុង ដំណើរការ ដើម្បីបំពេញចំនុចខ្វះខាត។ ការសម្រេចចិត្តដ៏លំបាកជាច្រើនបានកើតមាន និងកំពុងត្រូវបានដំណើរការដោះស្រាយ។ គួរបញ្ជាក់ថាទោះបីជាខ្ញុំនឹងធ្វើការដាក់កំហិត រឹតត្បិតក្នុងការអនុវត្តនូវ ការដឹកនាំ និងវិន័យថ្មីៗសម្រាប់ក្រុមអោយកាន់តែប្រសើរ ដូចអ្វីដែលខ្ញុំចង់បាន ពីមួយថ្ងៃទៅមួយថ្ងៃ ខ្ញុំកំពុងធ្វើការលើទម្រង់ដឹកនាំថ្មី និងកែតម្រូវពីចំណុចខ្វះខាតចាស់ នៃរចនាសម្ព័ន្ធក្លិបឡើងវិញនេះឱ្យអស់ពីសមត្ថភាព ហើយនឹងបន្តធ្វើដូច្នេះទៅមុខទៀតដើម្បីលទ្ធផលកាន់តែប្រសើរ»។
អត្ថបទពាក់ព័ន្ធ៖ដោះដូរកីឡាករ៖ អង្គរថាយហ្គឺរ ចែកផ្លូវជាមួយកីឡាករ៦នាក់
ក្រុមអង្គរថាយហ្គឺរ បានបញ្ចប់រដូវកាលនេះដូចជា៖
-លីគកំពូលកម្ពុជា Cambodian Premier League ឈរចំណាត់ថ្នាក់លេខ៧
-ពានរង្វាន់សម្តេចតេជោ ឆ្នាំ២០២២ របូតចេញត្រឹមវគ្គ ១៦ក្រុមចុងក្រោយ
-ពានរង្វាន់ Cambodian League 2022 ធ្លាក់ត្រឹមវគ្គចែកពូល
