សិល្បៈអន្តរជាតិ៖ អ្នកគាំទ្រ Taylor Swift នៅដើមសប្ដាហ៍នេះកំពុងតែជ្រួលច្រាលដណ្ដើមគ្នាទិញសំបុត្រការប្រគំតន្ត្រីរបស់តារាសំណព្វចិត្ត។ ប៉ុន្តែមនុស្សជាច្រើនមានការសោកស្ដាយដោយសារតែដណ្ដើមទិញមិនទាន់គេ។ ដំណឹងល្អសម្រាប់អ្នកដែលទិញមិនទាន់ នៅមានឱកាសអាចទិញតាមអនឡាញតាមរយៈ Website Stubhub ប៉ុន្តែដំណឹងអាក្រក់ កន្លែងអង្គុយដែលមានទីតាំងល្អមានតម្លៃខ្ពស់រហូតអាចទិញបានផ្ទះវីឡាកូនកាត់មួយល្វែងនៅស្រុកខ្មែរ។
តាមដឹងសំបុត្រជួរទី៤៨ នៃការប្រគំតន្ត្រីនៅខែឧសភា នាកីឡាដ្ឋាន Metlife ក្នុងក្រុងញូវយក ញូវជឺស៊ី អារីណា មួយសំបុត្រមានតម្លៃរហូតដល់ 76221$។ ដោយឡែកសំបុត្រដែលលក់សម្រាប់ការប្រគំតន្ត្រីនៅថ្ងៃទី៤ ខែមិថុនា មួយកៅអីតម្លៃ 45000$ ចំណែកសំបុត្រនៅ Glendale Arizona ដែលនឹងប្រគំតន្ត្រីនៅថ្ងៃទី១៧ ខែមីនា មានតម្លៃឡើងដល់ 16200$។
អ្នកគាំទ្រជាច្រើនដែលទៅឈរតម្រង់ជួរទិញសំបុត្រកាលពីថ្ងៃអង្គារកន្លងទៅរាប់ម៉ោង បានបង្ហាញអារម្មណ៍ម៉ួម៉ៅ ដែមិនអាចទិញសបុត្រសម្រាប់ខនសឺតឆ្នាំ២០២៣ខាងមុខនេះបាន។ កម្មវិធីប្រគំតន្ត្រីទេសចរណ៍នេះនឹងចាប់ផ្ដើមពីខែមីនា ឆ្នាំ២០២៣ ខាងមុខនេះទៅនៅទូទាំងសហរដ្ឋអាមេរិក ដោយផ្ដើមពីអារីហ្សូណា និងបញ្ចប់នៅខែសីហា នៅកីឡដ្ឋាន SoFi នាទីក្រុងឡូអែនជឺឡែស។
មុនពេលដែលការលក់សំបុត្របែប Live Stream អាចធ្វើទីបានវែបសាយ Ticketmaster បានជួបនឹងបញ្ហាបច្ចេកទេស រហូតដល់គាំងវែបសាយជាលើកដំបូង ដោយសារមានចំនួន Users រាប់សិបលានគណនីព្យាយាមចុចចូលដើម្បីទិញសំបុត្រសម្រាប់ការប្រគំតន្ត្រី TaylorSwiftTix Presale។ អ្នកដែលមិនអាចទិញសំបុត្របាន បានបញ្ចេញកំហឹងរបស់ខ្លួនចំពោះវែបសាយ Ticketmaster នៅលើបណ្ដាញសង្គម Twitter ដោយក្នុងនោះក៏មានលោកស្រី Alexandria Ocasio Cortez ដែលជាតំណាងរាស្ត្រមកពីបក្សប្រជាធិបតេយ្យអាមេរិកម្នាក់ផងដែរ។
នៅក្នុងការប្រគំតន្ត្រីរបស់ Taylor Swift នាឆ្នាំ២០២៣ខាងមុខនេះ ក៏មានតារាកិត្តិយសចូលរួមក្នុងនោះដែរមានដូចជា Phoebe Bridgers, Paramore and GAYLE ផងដែរ។ ការប្រគំតន្ត្រីនិងមានរយៈពេល៥២ដង នៅក្នុងទីក្រុងចំនួន២០ខុសៗគ្នា៕
ប្រភព៖ newsweek
