នៅក្នុងកិច្ចប្រជុំគណៈកម្មការជំនាញ ស្តីពីការរៀបចំការប្រកួតកីឡាជាតិ លើកទី៣ និងកីឡាជនពិការជាតិ លើកទី១ ឆ្នាំ២០២២ នៅសាលប្រជុំមជ្ឈមណ្ឌលជាតិហ្វឹកហ្វឺនកីឡា ថ្ងៃទី១៩ ខែវិច្ឆិកា ឆ្នាំ២០២២។
ឯកឧត្ដម ស សុខា រដ្ឋលេខាធិការ ក្រសួងអប់រំ យុវជន និងកីឡា និងជាអនុប្រធានអចិន្ត្រៃយ៍រៀបចំព្រឹត្តិការណ៍ប្រកួតកីឡាជាតិ លើកទី៣ ឆ្នាំ២០២២ បានថ្លែងក្នុងកិច្ចប្រជុំដូច្នេះថា៖«ខ្ញុំយកឱកាសនេះថ្លែងអំណរគុណចំពោះឯកឧត្ដម លោកជំទាវ អស់លោក លោកស្រី គ្រប់ភាគីពាក់ព័ន្ធ សម្រាប់កិច្ចការកន្លងមក ក្នុងរាល់ដំណើរការនៃការត្រៀមលក្ខណៈរៀបចំព្រឹត្តិការណ៍កីឡាជាតិ លើកទី៣ ដ៏មានសារៈសំខាន់សម្រាប់មួយនេះ ពិសេសដើម្បីឈានទៅសម្រេចជោគជ័យក្នុងការរៀបចំព្រឹត្តិការណ៍ស៊ីហ្គេម ឆ្នាំ២០២៣ ខាងមុខ ដែលកម្ពុជា ទទួលធ្វើម្ចាស់ផ្ទះ»។
ជាមួយគ្នានោះដែរឯកឧត្តម ស សុខា ក្នុងនាមអនុប្រធានអចិន្ត្រៃយ៍គណៈកម្មការរៀបចំការប្រកួតកីឡាជាតិ លើកទី៣ បានស្នើសុំទៅកាន់គណ:កម្មការរៀបចំការប្រកួតកីឡាជាតិលើកទី៣ ចំនួន១១ចំណុចដូចជា៖
១. គណៈកម្មការរៀបចំការប្រកួត របស់ក្រសួង ត្រូវត្រៀមខ្លួនរួចរាល់សម្រាប់ការងារ ដូចដែលបានចាត់តាំងទៅតាមគ្រប់ផ្នែកក្នុងលិខិតឧទ្ទេសនាម ដើម្បីឆ្លើយតបទៅនឹងការទទួលខុសត្រូវ ដែលថ្នាក់ដឹកនាំក្រសួង បានប្រគល់ជូន
២. សហព័ន្ធកីឡាជាតិ ទាំង៣៨ ដែលមានគណៈកម្មការបច្ចេកទេស របស់ខ្លួន ត្រូវយកចិត្តទុកដាក់ដឹកនាំការប្រកួត ផ្តល់សុក្រិតភាព សុភវិនិច្ឆ័យ ជូនដល់កីឡាករ កីឡាការិនី ក៏ដូចជាអង្គភាព ស្ថាប័នដែលចូលរួម ចៀសវាងនូវការរៀបចំលទ្ធផលទុកជាមុន ដែលអាចប៉ះពាល់ដល់មនសិកាវិជ្ជាជីវៈ។ ដូច្នេះត្រូវអនុវត្តការដឹកនាំ ការកាត់សេចក្តីឱ្យបានល្អ ដើម្បីជាម៉ែត្រវាស់សមត្ថភាពក្នុងការងារ ដែលនឹងត្រូវដឹកនាំ ក៏ដូចជាត្រៀមខ្លួនក្នុងគណៈកម្មការបច្ចេកទេស កម្រិតអន្តរជាតិ សម្រាប់ការប្រកួតកីឡាស៊ីហ្គេម ឆ្នាំ២០២៣ និងការប្រកួតអន្តរជាតិនានា។
៧. គណៈកម្មការព័ត៌មាន និងផ្សព្វផ្សាយ ត្រូវប្រកាសចេញកម្មវិធីប្រកួត តាមប្រភេទកីឡានីមួយៗ ប្រកាសលទ្ធផលប្រកួតផ្លូវការឱ្យបានទាន់ពេលវេលា រួមមានជារូបភាពនានា ក៏ដូចជារូបភាពជាវីដេអូទាក់ទងនឹងបណ្តាអង្គភាព ឬស្ថាប័នសារព័ត៌ មាន ដើម្បីចុះផ្សាយនូវសកម្មភាពក្នុងព្រឹត្តិការណ៍ នៃការប្រកួតទាំងមូល។
៨. គណៈកម្មការហូបចុក ស្នាក់នៅ ត្រូវធានាថា ការហូចចុករបស់ប្រតិភូកីឡា ដែលចូលរួមអាចទទួលយកបាន ពោលគឺសំដៅលើអាហារដែលមានថាមពលសម្រាប់ការប្រកួត។ រីឯការស្នាក់នៅវិញ សូមឱ្យប្រកបដោយផាសុកភាព និងមិនមានការរំខាននានា។
៩. ថ្នាក់ដឹកនាំកីឡាមកពីបណ្ដារាជធានីខេត្តត្រូវក្ដោបក្ដាប់ព័ត៌មានអំពីក្រុមកីឡារបស់ខ្លួនអោយបានល្អបំផុត ចៀសវាងហេតុការណ៍អាក្រក់ណាមួយកើតឡើងអំឡុងការស្នាក់នៅ និង ប្រកួត។ កីឡាករក៏អីចឹងដូចគ្នា ពេលទៅណាមកណា ត្រូវរាយការណ៍ដល់ថ្នាក់ដឹកនាំរបស់ខ្លួន មិនអាចទៅណាស្រេចចិត្តទេ អំឡុងពេលប្រកួត ១០ ថ្ងៃនេះរួមទាំងពិធីបើក-បិទ។
១០. ស្នើអោយមានសាមគ្ដីភាពគ្រប់ផ្នែកដើម្បីឈ្នះទាំងអស់គ្នា និងជោគជ័យធំបំផុតនៅស៊ីហ្គេមក្នុងប្រទេសរបស់យើង។ ក្រុមកីឡាករសាមគ្ដី និងដាក់ចិត្តប្រកួតអោយល្អមើលបំផុត, គណៈកម្មការរៀបចំការប្រកួតត្រូវសាមគ្ដីរៀបចំអោយល្អបំផុត, និងភាគីពាក់ព័ន្ធត្រូវសាមគ្ដីគ្នាធ្វើការល្អបំផុត នោះលទ្ធផលរបស់យើងច្បាស់ល្អបំផុតមិនខាន។
១១. កុំប៉ែងជើងគ្នា កុំមើលបំណាំគ្នា កុំជាន់ពន្លិចគ្នាអំឡុងពេលប្រកួត និង រៀបចំព្រឹត្តិការណ៍កីឡាជាតិនេះអោយសោះ។ ព្រោះវាជាមោទកភាពជាតិយើងទាំងអស់គ្នាទេ។
សូមបញ្ជាក់ដែរថា យោងតាមសេចក្តីប្រកាសព័ត៌មានរបស់ក្រសួងអប់រំ យុវជន និងកីឡា សហការជាមួយគណៈកម្មាធិការជាតិប៉ារ៉ាឡាំពិក កម្ពុជា រួមជាមួយសហព័ន្ធកីឡាជាតិ ចំនួន ៣៨ បានជម្រាបជូនដំណឹងដល់សាធារណជន និងអ្នកស្នេហាវិស័យកីឡាទាំងអស់ថា ក្រសួង បានរៀបចំការប្រកួតកីឡាជាតិ លើកទី៣ ឆ្នាំ២០២២ ដែលនឹងប្រព្រឹត្តទៅ ចាប់ពីថ្ងៃទី១៩ រហូតដល់ថ្ងៃទី៣០ ខែវិច្ឆិកា ឆ្នាំ២០២២ ដោយមាន ៣៨ ប្រភេទកីឡា និងប្រភេទកីឡាប៉ារ៉ាឡាំពិក ចំនួន ៧ ដែលមានវិញ្ញាសា ចំនួន ៤០៥ ប្រកួតលើទីតាំង ចំនួន ៥រាជធានី ខេត្ត រួមមាន៖ ភ្នំពេញ ខេត្តកែប កំពត ព្រះសីហនុ និងខេត្តសៀមរាប។
សូមបញ្ជាក់ផងដែរថា ព្រឹត្តិការណ៍កីឡាជាតិ លើកទី៣ ឆ្នាំ២០២២ ប្រព្រឹត្តទៅ ចាប់ពីថ្ងៃទី១៩ រហូតដល់ថ្ងៃទី៣០ ខែវិច្ឆិកា ឆ្នាំ២០២២ ។ ចំពោះពិធីបើក និងបិទ ប្រព្រឹត្តុទៅក្រោមអធិបតីភាពដ៏ខ្ពង់ខ្ពស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន នៅពហុកីឡដ្ឋានជាតិមរតកតេជោ ដោយមានប្រតិភូកីឡា ចូលរួម ៤,៥៥៩នាក់ ព្រមទាំងថ្នាក់ដឹកនាំ និងមហាជនទូទៅ ទាំងពិធីបិទ និងពិធីបើក ប្រមាណ ៤៣,០០០នាក់៕