កម្ពុជា នឹងរៀបចំព្រឹត្តិការណ៍ប្រកួតកីឡាអេឡិចត្រូនិកពានរង្វាន់អាស៊ីអាគ្នេយ៍ឆ្នាំ២០២៣ (Mobile Legends Bang Bang Southeast Asia Cup ឬ MSC 2023) ជាលើកដំបូង នៅរាជធានីភ្នំពេញ។ នេះជាការលើកឡើងរបស់ឯកឧត្តម ជា ច័ន្ទបរិបូរណ៍ រដ្ឋលេខាធិការក្រសួងព័ត៌មាន និងជាប្រធានសហព័ន្ធកីឡាអេឡិចត្រូនិកកម្ពុជា ក្នុងពិធីចុះហត្ថលេខាលើអនុស្សរណៈយោគយល់គ្នា រវាងសហព័ន្ធកីឡាអេឡិចត្រូនិកកម្ពុជា (EFC) និងក្រុមហ៊ុន MOONTON GAMES នៅថ្ងៃទី១៤ ខែមីនា ឆ្នាំ២០២៣។
ព្រឹត្តិការណ៍ MSC ឆ្នាំ២០២៣ នេះ នឹងប្រព្រឹត្តទៅនៅរាជធានីភ្នំពេញ ចាប់ពីថ្ងៃទី១០ ដល់ថ្ងៃទី១៨ ខែមិថុនា ឆ្នាំ២០២៣ ខាងមុខនេះ ដែលជាការប្រកួតលក្ខណៈអាជីព (Pro Team) មានការចូលរួមពីក្រុមអាជីពចំនួន ១២ក្រុម មកពីព្រះរាជាណាចក្រកម្ពុជា ឥណ្ឌូនេស៊ី ម៉ាឡេស៊ី សឹង្ហបុរី ហ្វីលីពីន វៀតណាម ឡាវ ថៃ អាមេរិកខាងជើង និងប្រទេសមជ្ឈិមបូព៌ា អាហ្រ្វិកខាងជើង និងតួគី។
ចំនួន Slot ដែលនឹងផ្តល់ជូនតាមប្រទេសនីមួយៗ រួមមាន៖
- ឥណ្ឌូនេស៊ី មាន ២ក្រុម
- ហ្វីលីពីន មាន ២ក្រុម
- ម៉ាឡេស៊ី មាន ១ក្រុម
- កម្ពុជា មាន ១ក្រុម
- សឹង្ហបុរី មាន ១ក្រុម
- មីយ៉ាន់ម៉ា មាន ១ក្រុម
- តួគី មាន ១ក្រុម
- មជ្ឈឹមបូព៌ា និងអាហ្រ្វិកខាងជើង មាន ១ក្រុម
- អាមេរិកខាងជើង មាន ១ក្រុម
- ប្រកួតជម្រុះតំបន់ទន្លេមេគង្គ (ថៃ ឡាវ និងវៀតណាម)- យក ១ក្រុមចំពោះការចំណាយ គឺជាបន្ទុករបស់ក្រុមហ៊ុន MOONTON GAMES។
នៅឆ្នាំ២០២៣នេះ MOONTON GAMES បានផ្តោតមកលើប្រទេសកម្ពុជា និងបានសហការជាមួយសហព័ន្ធកីឡាអេឡិចត្រូនិកកម្ពុជា រៀបចំព្រឹត្តិការណ៍ដ៏ធំមួយនេះ នៅរាជធានីភ្នំពេញ ខណៈនៅកម្ពុជាមានកីឡាករ កីឡាការិនី និងអ្នកគាំទ្រលើវិញ្ញាសា Mobile Legends Bang Bang នេះយ៉ាងច្រើនសន្ធឹកសន្ធាប់។
ឯកឧត្តម ជា ច័ន្ទបរិបូរណ៍ បានលើកឡើងថា ឱកាសធ្វើជាម្ចាស់ផ្ទះ រៀបចំព្រឹត្តិការណ៍ប្រកួតលំដាប់អន្តរជាតិដ៏ធំមួយនេះ គឺស្តែងឲ្យឃើញពីការអភិវឌ្ឍរបស់ព្រះរាជាណាចក្រកម្ពុជានិយាយជារួម និងលើវិស័យកីឡាអេឡិចត្រូនិក និយាយដោយឡែក ដោយឈរលើមូលដ្ឋាននៃកត្តាសុខសន្តិភាព សុខសុវត្ថិភាពពេញបរិបូរណ៍ ជាពិសេសគឺហេដ្ឋារចនាសម្ព័ន្ធនៅក្នុងប្រទេសកម្ពុជា ក៏ដូចជាការគ្រប់គ្រងបានយ៉ាងល្អ និងលុបបំបាត់ស្ទើរទាំងស្រុងនៃជំងឺកូវីដ-១៩។
ឯកឧត្តម បន្ថែមថា កន្លងមកយើងសង្កេតឃើញថា៖ « វិស័យកីឡាអេឡិចត្រូនិក មានការវិវឌ្ឍមួយជំហានទៀត ក្នុងក្របខណ្ឌនៃលីគអាជីព ពេញលេញមួយដោយមានការអញ្ជើញ គ្រូពីក្រៅប្រទេស ក៏ដូចជាកីឡាករបរទេសមកចូលរួមជាក្រុម ក្នុងប្រទេសកម្ពុជាផងដែរ។ ខ្ញុំសង្ឃឹមថា ក្រុមកីឡាករអេឡិចត្រូនិកកម្ពុជា នឹងធ្វើបានល្អនៅក្នុងព្រឹត្តិការណ៍មួយនេះ»។
គួររំលឹកថា ព្រឹត្តិការណ៍ MSC នេះត្រូវបានបង្កើតឡើងលើកដំបូងនៅឆ្នាំ២០១៧ រៀបចំដោយ MOONTON ធ្វើឡើងនៅទីក្រុងហ្សាកាតា ប្រទេសឥណ្ឌូនេស៊ី មានក្រុមកីឡាករអេឡិចត្រូនិកចំនួន ៨ក្រុមចូលរួម។ នៅឆ្នាំបន្តបន្ទាប់ មានការកែសម្រួលទម្រង់ថ្មី និងមានការចូលរួមពីបណ្តាប្រទេសផ្សេងទៀត ធ្វើឲ្យចំនួនក្រុមមានការកើនឡើងផងដែរ៕