កាលពីថ្ងៃទី៣០ ខែសីហា មេធាវីអតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រា កំពុងរៀបចំឯកសារដើម្បីព្រាងសំណើសុំការលើកលែងទោសពីព្រះមហាក្សត្រ ប៉ុន្តែត្រូវគោរពតាមការសម្រេចចិត្តរបស់លោក ថាក់ស៊ីន មុននឹងត្រូវបានដាក់ទូលថ្វាយព្រះមហាក្សត្រ។ នេះបើយោងតាមការចេញផ្សាយដោយសារព័ត៌មាន CNA នាថ្ងៃ ព្រហស្បតិ៍ ទី៣១ ខែសីហា ឆ្នាំ២០២៣។
លោក ថាក់ស៊ីន បានត្រឡប់ចូលប្រទេសថៃវិញកាលពីសប្តាហ៍មុន បន្ទាប់ពីបាននិរទេសខ្លួនទៅរស់នៅបរទេសរយៈពេល ១៥ឆ្នាំ។ ក្រោយពីចុះចតក្នុងអាកាសយានដ្ឋានដនមឿន លោកត្រូវបានបញ្ជូនទៅដាក់ទោសឲ្យជាប់ពន្ធនាគាររយៈពេល៨ឆ្នាំពីបទរំលោភអំណាច និងទំនាស់ផលប្រយោជន៍ដែលនៅសេសសល់តាំងពីពេលលោកកាន់អំណាច។ ប៉ុន្ដែក្នុងយប់ដំបូងនៃការវិលត្រឡប់ចូលប្រទេសថៃ លោក ថាក់ស៉ីន ត្រូវបានគេបញ្ជូនទៅមន្ទីរពេទ្យប៉ូលិសដោយសារមានអាការៈ ឈឺទ្រូង និងលើសឈាម។
បើទោះជាបានឃ្លាតឆ្ងាយពីប្រទេសអស់រយៈពេល ១៥ឆ្នាំក៏ដោយ លោក ថាក់ស៊ីន នៅតែប្រកាន់យកនយោបាយថៃ ដែលល្បីខាងនយោបាយប្រជានិយម ដូចជាការថែទាំសុខភាពជាសកល និងការចែកសាច់ប្រាក់ជាដើម។
ថ្វីត្បិតមេធាវី លោក ថាក់ស៊ីន កំពុងដំណើរការឯកសារដាក់ស្នើទៅព្រះមហាក្សត្រដើម្បីសុំព្រះរាជាទានទោសយ៉ាងណាក្ដី ក៏សំណើរនេះស្ថិតនៅក្នុងការសម្រេចចិត្តរបស់លោក ថាក់ស៊ីន ផងដែរ។
ទាក់ទិននឹងបញ្ហានេះ ក្រុមប្រឆាំងលោកថាក់ស៊ីន បានដាក់ញត្តិទៅនាយកដ្ឋានកែតម្រូវ ដើម្បីរារាំងរាល់ការស្វែងរកការលើកលែងទោស ដោយលើកឡើងថា ករណីពុករលួយមិនគួរទទួលបានការលើកលែងទោសនោះទេ។
សូមជម្រាបថា កាលពីប៉ុន្មានម៉ោងបន្ទាប់ពីការវិលចូលប្រទេសកំណើតរបស់លោក ថាក់ស៊ីន លោកស្រី Srettha Thavisin មកពីគណបក្សភឿថៃ ដែលគាំទ្រដោយគ្រួសារ Shinawatra បានឆ្លងផុតការបោះឆ្នោតសភា ដើម្បីក្លាយជានាយករដ្ឋមន្ត្រីថ្មីរបស់ប្រទេស៕