បាងកក៖ គំនិតផ្តួចផ្តើមមនុស្សធម៌ថ្មីមួយដែលដឹកនាំដោយប្រទេសថៃ មានគោលបំណងត្រួសត្រាយផ្លូវសម្រាប់កិច្ចចរចារវាងភាគីជម្លោះ នៅក្នុងប្រទេសមីយ៉ាន់ម៉ា ដែលគ្រប់គ្រងដោយរបបយោធា ៣ឆ្នាំបន្ទាប់ពីរដ្ឋប្រហារបានបង្កឱ្យប្រទេសមួយនេះមានអស្ថិរភាព និងអំពើហិង្សា។ នេះបើយោងតាមការចេញផ្សាយដោយសារព័ត៌មាន The Straits Times នាថ្ងៃអង្គារ ទី៦ ខែកុម្ភៈ ឆ្នាំ២០២៤។
អនុរដ្ឋមន្ត្រីការបរទេសថៃ លោក Sihasak Phuangketkeow (ស៊ីហាសាក់ ភួងកេតកែវ) បាននិយាយថា ប្រទេសថៃ បានផ្ដួចផ្ដើមគំនិតបង្កើតតំបន់សុវត្ថិភាពមនុស្សធម៌មួយនៅក្នុងខែកុម្ភៈ នៅតាមបណ្ដោយព្រំដែនរបស់ខ្លួនជាមួយប្រទេសមីយ៉ាន់ម៉ា ស្ថិតនៅក្បែរប៉ុស្ដិ៍ព្រំដែន ម៉ែ សុត-មីយ៉ាវ៉ាដឌី (Mae Sot-Myawaddy) ដើម្បីផ្ដល់ស្បៀងអាហារ និងការផ្គត់ផ្គង់ថ្នាំពេទ្យដល់សហគមន៍នៅតាមតំបន់នេះ រួមទាំងមនុស្សជាង ២០,០០០នាក់ ដែលបានរត់ភៀសខ្លួនគេចចេញពីជម្លោះ។
លោក ស៊ីហាសាក់ បានបន្ថែមថា ផែនការនេះក៏នឹងជួយបង្កើនដល់កិច្ចខិតខំប្រឹងប្រែងដោយសមាជិកអាស៊ានទាំង១០ ក្នុងការស្វែងរកចាប់ផ្តើមកិច្ចចរចាសន្តិភាពរវាងយោធា និងភាគីជម្លោះក្នុងប្រទេស ដោយផ្ដោតសំខាន់លើការធ្វើយ៉ាងណាឱ្យជម្លោះស្ថិតនៅក្រោមការគ្រប់គ្រង និងបើកចំហកិច្ចសន្ទនា។
អនុរដ្ឋមន្រ្តីការបរទេសរូបនេះ បានបន្ដថា «យើងមិនចង់ឃើញប្រទេសមីយ៉ាន់ម៉ា មានអស្ថិរភាពទៀតទេ» លោកបានបន្ថែមថា «ដំណើរការត្រូវតែមានប្រសិទ្ធភាព អាចជឿទុកចិត្តបាន និងមានតម្លាភាព»។
លោក ស៊ីហាសាក់ បាននិយាយថា ផែនការដែលដឹកនាំដោយប្រទេសថៃ អាចនាំឱ្យមានការចរចាពីភាគី របបយោធា ក្រុមប្រដាប់អាវុធជនជាតិភាគតិច និងស្រមោលរដ្ឋាភិបាលរួបរួមជាតិ ដែលជាសម្ព័ន្ធមិត្តជាមួយកងជីវពលគាំទ្រលទ្ធិប្រជាធិបតេយ្យ ប៉ុន្ដែលោក ស៉ីហាសាក់ មិនបាននិយាយថា តើរបបយោធាបានយល់ព្រមក្នុងការចរចាបែបនេះឬយ៉ាងណានោះទេ។
លោក ស៊ីហាសាក់ បាននិយាយថា «ដំណើរការនៃកិច្ចចរចាមួយចំនួន គួរចាប់ផ្តើមប្រហែលយ៉ាងហោចណាស់នៅពាក់កណ្តាលឆ្នាំ។ ប្រទេសថៃ បានពិគ្រោះជាមួយដៃគូអន្តរជាតិ រួមទាំងប្រទេសជិតខាងផ្សេងទៀតរបស់មីយ៉ាន់ម៉ា គឺ ឥណ្ឌា និងចិន ផងដែរ»។ យ៉ាងណាម៉ិញ លោក ស៊ីហាសាក់ បានបន្តថា៖ «វាជាការត្រួសត្រាយផ្លូវសម្រាប់មីយ៉ាន់ម៉ា ក្នុងការចូលរួមជាមួយពួកយើងសារជាថ្មីម្តងទៀត រួមទាំងចូលរួមក្នុងការស្ថាបនាជាមួយសហគមន៍អន្តរជាតិផងដែរ»។
ក្រោមការសង្កេតរបស់ស្ថាប័នជំនួយមនុស្សធម៌របស់អាស៊ាន គំនិតផ្តួចផ្តើមនេះត្រូវបានអនុម័តកាលពីសប្តាហ៍មុន ដោយរដ្ឋមន្ត្រីការបរទេសអាស៊ាន និងតំណាងមកពីប្រទេសមីយ៉ាន់ម៉ា ហើយឃើញកាកបាទក្រហមថៃ និងមីយ៉ាន់ម៉ា ផ្តល់ការផ្គត់ផ្គង់ ។
គួរបញ្ជាក់ថា ប្រទេសមីយ៉ាន់ម៉ា ត្រូវបានជាប់គាំងនៅក្នុងជម្លោះ ចាប់តាំងពីយោធាបានធ្វើរដ្ឋប្រហារដណ្តើមអំណាចកាលពីឆ្នាំ២០២១ ខណៈអង្គការសហប្រជាជាតិបាននិយាយថា ប្រជាជនមីយ៉ាន់ម៉ា យ៉ាងហោចណាស់មនុស្ស ២.៦លាននាក់ បានរត់ភៀសខ្លួនគេចចេញពីជម្លោះ និងច្រើនជាង ១៨លាននាក់កំពុងត្រូវការជំនួយជាចាំបាច់៕