ទីក្រុងបាងកក៖ រដ្ឋមន្ត្រីសុខាភិបាលថៃ បានប្រាប់កាសែតរ៉យទ័រ ក្នុងបទសម្ភាសន៍មួយថា ប្រទេសថៃនឹងហាមឃាត់ការប្រើប្រាស់កញ្ឆានៅដំណាច់ឆ្នាំនេះ ប៉ុន្តែនៅតែបន្តអនុញ្ញាតឱ្យប្រើប្រាស់ចាំបាច់សម្រាប់គោលបំណងវេជ្ជសាស្រ្ត។ នេះបើយោងតាមការចេញផ្សាយដោយសារព័ត៌មាន CNA នាថ្ងៃព្រហស្បតិ៍ ទី២៩ ខែកុម្ភៈ ឆ្នាំ២០២៤។
ចុចអាន៖ រដ្ឋាភិបាលថៃ គ្រោងហាមឃាត់ការប្រើប្រាស់កញ្ឆាសម្រាប់ការកម្សាន្ដ
បន្ទាប់ពីប្រទេសថៃ បានក្លាយជាប្រទេសដំបូងគេនៅអាស៊ីអាគ្នេយ៍ ដែលអនុញ្ញាតការប្រើប្រាស់ជាឱសថក្នុងឆ្នាំ២០១៨ ហើយបន្ទាប់មកការប្រើប្រាស់សម្រាប់ការកម្សាន្តនៅឆ្នាំ២០២២ ដោយហាងកញ្ឆារាប់ម៉ឺនកន្លែង បានចាប់ផ្ដើមបើករីកដុះដាលនៅក្នុងឧស្សាហកម្មដែលគ្រោងនឹងមានតម្លៃរហូតដល់ ១.២ពាន់លានដុល្លារនៅឆ្នាំក្រោយ។
ក្រុមអ្នករិះគន់បាននិយាយថា ច្បាប់មួយចំនួនត្រូវបានប្រញាប់ប្រញាល់ចេញ និងអនុម័តក្នុងរយៈពេល ១សប្តាហ៍នៃការកាត់ទោស ហើយរដ្ឋាភិបាលបានព្រាងច្បាប់ថ្មីមួយ ដើម្បីគ្រប់គ្រងការប្រើប្រាស់កញ្ឆាដែលរំពឹងថា នឹងចូលជាធរមាននៅចុងឆ្នាំនេះ។
ទាក់ទិននឹងបញ្ហានេះ រដ្ឋមន្ត្រីក្រសួងសុខាភិបាល លោក Cholnan Srikaew បាននិយាយថា សេចក្តីព្រាងច្បាប់នេះ នឹងបញ្ជូនទៅគណៈរដ្ឋមន្ត្រី ដើម្បីអនុម័តនៅខែក្រោយ មុនពេលធ្វើដំណើរទៅកាន់សភា ដើម្បីអនុម័តមុនដំណាច់ឆ្នាំ។
លោក Cholnan បាននិយាយកាលពីថ្ងៃពុធ ដោយសំដៅទៅលើការប្រើប្រាស់សម្រាប់ការកម្សាន្តថា «បើគ្មានច្បាប់គ្រប់គ្រងកញ្ឆាទេ វានឹងត្រូវបានគេប្រើប្រាស់ខុសផ្លូវ»។ លោកបានបន្ថែមថា៖ «ការប្រើប្រាស់កញ្ឆាខុសមានឥទ្ធិពលអវិជ្ជមានដល់កុមារនៅប្រទេសថៃ ក្នុងរយៈពេលវែង ហើយវាអាចនាំទៅរកថ្នាំផ្សេងៗទៀត»។
លោក Cholnan បន្ថែមថា ហាងកញ្ឆា ដែលដំណើរការដោយខុសច្បាប់នឹងមិនត្រូវបានអនុញ្ញាតឱ្យបន្តទៀតទេ ខណៈកញ្ឆាដែលដាំដុះតាមផ្ទះ ក៏នឹងត្រូវបានលើកទឹកចិត្តឱ្យបញ្ឈប់ផងដែរ។
រដ្ឋមន្រ្តីក្រសួងសុខាភិបាលរូបនេះ និយាយថា «នៅក្នុងច្បាប់ថ្មី កញ្ឆា នឹងក្លាយជារុក្ខជាតិដែលគ្រប់គ្រង ដូច្នេះការដាំដុះវាត្រូវទាមទារឱ្យមានការអនុញ្ញាតត្រឹមត្រូវ។ យើងគាំទ្រការដាំដុះកញ្ឆា សម្រាប់តែគោលបំណងវេជ្ជសាស្ត្រ និងសម្រាប់សុខភាពប៉ុណ្ណោះ»។
រដ្ឋាភិបាលអាណត្តិមុន បានបរាជ័យក្នុងការជំរុញច្បាប់តាមរយៈសភាមុនការបោះឆ្នោតសកល កាលពីខែឧសភា កន្លងទៅ ដោយទុកឱ្យប្រទេសថៃ មិនមានច្បាប់ ដើម្បីគ្រប់គ្រងការប្រើប្រាស់។
សេចក្ដីព្រាងច្បាប់បានកំណត់ការផាកពិន័យរហូតដល់ ៦០,០០០បាត (ស្មើនឹង ១,៧០០ដុល្លារអាមេរិក) ចំណែកអ្នកលក់ចែកចាយ ឬផ្សព្វផ្សាយពាណិជ្ជកម្មកញ្ឆា អាចប្រឈមទោសជាប់ពន្ធនាគារមួយឆ្នាំ ឬ ពិន័យជាប្រាក់រហូតដល់ ១០០,០០០បាត។
ច្បាប់នេះក៏រឹតបន្តឹង និងផ្តន្ទាទោសចំពោះការដាំកញ្ឆាដោយគ្មានអាជ្ញាប័ណ្ណ អាចប្រឈមទោសជាប់ពន្ធនាគារពី ១ឆ្នាំទៅ៣ឆ្នាំ ព្រមទាំងពិន័យជាប្រាក់ចាប់ពី ២០,០០០បាតទៅ ៣០០,០០បាត៕
