ក្រុមបាល់ទាត់ព្រះខ័នរាជស្វាយរៀង បានក្លាយជាម្ចាស់ជើងឯកពានរង្វាន់លីគកំពូលកម្ពុជា Cambodian Premier League 2023-24 ក្រោយប្រកួតវិលជុំសន្សំពិន្ទុចំនួន៣ជុំ និងបន្តប្រកួត Top 4 មាន៧៦ពិន្ទុច្រើនជាងក្រុមទាំង៩ផ្សេងទៀត។
ក្នុងចំណោម៣០ប្រកួតពេញ១រដូវកាលក្រុមព្រះខ័នរាជស្វាយរៀង រកបានជ័យជម្នះចំនួន២៤ប្រកួត ស្មើគ្នា៤ប្រកួត និងចាញ់២ប្រកួតខណៈក្រុមជើងឯករងគឺភ្នំពេញក្រោន ប្រកួត៣០លើក ឈ្នះ២១លើក ស្មើ៥លើកនិងចាញ់៤លើក ហើយក្រុមលេខ៣វិសាខា ប្រកួត៣០លើក ឈ្នះ១៥លើក ស្មើ៣លើកនិងចាញ់១២លើក។
នេះជាលើកទី៣ហើយដែលក្រុមព្រះខ័នរាជស្វាយរៀង ឈ្នះជើងឯកពានរង្វាន់លីគកំពូលកម្ពុជា ក្រោយឈ្នះលើកទី១នៅឆ្នាំ២០១៣ និងលើកទី២ ឈ្នះនៅឆ្នាំ២០១៩ ខណៈក្រុមដែលមានមូលដ្ឋាននៅខេត្តស្វាយរៀង មួយនេះធ្លាប់ឈ្នះជើងឯករង៣លើក នៅឆ្នាំ២០១០, ២០២០,២០២១ និងធ្លាប់ឈ្នះលេខ៣ នៅឆ្នាំ២០០៩,២០១១,២០១២,២០១៧ និង២០២២ ផងដែរ។
បើងាកទៅមើលលទ្ធផលនៃការប្រកួតលីគកំពូលតាមបណ្តាប្រទេសអាស៊ាន (AFF) ទាំង១២ឃើញថាមានប្រទេសចំនួន៣ហើយ រកម្ចាស់ជើងឯកឃើញ ឬ អាចនិយាយបានថាបញ្ចប់រដូវកាល២០២៣-២៤ ខណៈប្រទេសខ្លះបានចាប់ផ្តើមរដូវកាលឆ្នាំ២០២៤-២៥ បណ្តើរៗដែរហើយ។
សារព័ត៌មានត្រយង សូមលើកយកពីទិន្នន័យលីគកំពូលតាមបណ្តាសមាជិក AFFមាន៖
*លីគកំពូលវៀតណាម 2023–24 V.League 1៖ ចប់ខែកក្កដា
*លីគកំពូលថៃ 2023–24 Thai League 1៖ ចប់២៦ ឧសភា ២០២៤
*លីគកំពូលមីយ៉ាន់ម៉ា 2024 Myanmar National League៖ មិថុនា ២០២៤ ដល់កុម្ភៈ ២០២៥
*លីគកំពូលឡាវ 2024 Lao League 1៖ មិនទាន់ចាប់ផ្តើម
*លីគកំពូលប្រ៊ុយណេ 2024 Brunei Super League ៖ មិនទាន់ចាប់ផ្តើម
*លីគកំពូលហ្វីលីពីន 2024 Philippines Football League៖ ចប់ខែមិថុនា
*លីគកំពូលសិង្ហបុរី 2024–25 Singapore Premier League៖ ចប់ខែឧសភា ២០២៥
*លីគកំពូលឥណ្ឌូណេស៊ី 2023–24 Liga 1៖ ជើងឯកក្លិប Borneo Samarinda
*លីគកំពូលម៉ាឡេស៊ី 2024–25 Malaysia Super League៖ ១០ ឧសភា ២០២៤-មិនច្បាស់ថ្ងៃបញ្ចប់
*លីគកំពូលកម្ពុជា 2023-24 Cambodian Premier League៖ ជើងឯកក្លិបព្រះខ័នរាជស្វាយរៀង
*លីគកំពូលទីម័រខាងកើត 2024 Liga Futebol Amadora Timor Leste៖ មិនទាន់ដំណើរការ
*លីគកំពូលអូស្រ្តាលី 2023–24 A-League Men៖ ជើងឯកក្លិប Central Coast Mariners