គិតត្រឹមពេលនេះមានប្រទេសសមាជិកតំបន់អាស៊ានចំនួន២ហើយក្នុងនោះមានវៀតណាម និងទីម័រខាងកើត បានតែងតាំងគ្រូបង្វឹកសម្រាប់ក្រុមបាល់ទាត់បុរសឈុតធំរបស់ខ្លួននៅអំឡុងខែឧសភា នេះ ដើម្បីត្រៀមបេសកកម្មក្នុងឆ្នាំ២០២៤ ទាំងពានរង្វាន់តំបន់អាស៊ាននិងទ្វីបអាស៊ី ជាដើម។
សម្រាប់វៀតណាម វិញនៅថ្ងៃទី៦ ខែឧសភា ឆ្នាំ២០២៤ បានប្រកាសតែងតាំងលោក Kim Sang-sikជនជាតិកូរ៉េខាងត្បូង ជាគ្រូបង្វឹករបស់ក្រុមជម្រើសជាតិបុរសរបស់ខ្លួន។ បើតាមសារព័ត៌មាន vietnamnet បានបញ្ជាក់ថាបុរស៤៨ឆ្នាំរូបនេះ បានចុះកុងត្រាដឹកនាំក្រុមជម្រើសជាតិវៀតណាម និងឈុត U23 ចាប់ពីថ្ងៃទី៦ ឧសភា ២០២៤ ដល់ ខែមីនា ២០២៦ ខាងមុខ។
ចំពោះមុខលោក Kim Sang-sik ត្រៀមដឹកនាំក្រុមជម្រើសជាតិវៀតណាម ក្នុងការប្រកួតជម្រុះជើងឯកពានរង្វាន់ទ្វីបអាស៊ី 2026 AFC U23 Asian Cup, ស៊ីហ្គេម២០២៥ នៅប្រទេសថៃ និងពានរង្វាន់ AFF Championship 2024 ចុងឆ្នាំនេះជាដើម។
លោក Kim Sang-sik ធ្លាប់លេងជាខ្សែបម្រើកណ្តាល នៅក្លិបល្បីៗមួយចំនួនក្នុងស្រុក ព្រមទាំងធ្លាប់ជាប់ជម្រើសជាតិ៥៩លើក ចន្លោះឆ្នាំ២០០០-២០១២។ កាលនៅជាកីឡាករលោកធ្លាប់ឈ្នះមេដាយសំរឹទ្ធជើងឯកទ្វីបអាស៊ី AFC Asian Cup ចំនួន២លើកគឺនៅឆ្នាំ២០០០ និង២០០៧ ខណៈលោកធ្លាប់ជួយក្លិប Jeonbuk Hyundai Motors ឈ្នះជើងឯករងពានរង្វាន់ទ្វីបអាស៊ី AFC Champions League នៅឆ្នាំ២០១១ ផងដែរ។
ក្រោយចូលនិវត្តន៍នៅឆ្នាំ២០២០ លោក Kim Sang-sik បានតែងតាំងឱ្យធ្វើជាគ្រូបង្វឹកក្រុមយក្ស Jeonbuk Hyundai Motors មុនបន្តមកកាន់តំណែងជាគ្រូធំរបស់វៀតណាម។
ដោយឡែកក្រុមជម្រើសជាតិទីម័រខាងកើត វិញបានតែងតាំងលោក Simón Elissetche ជនជាតិឈីលី ជាគ្រូបង្វឹកក្រុមរបស់ខ្លួនជាលើកទី២ នេះបើតាមការផ្សាយរបស់ទូរទស្សន៍ RTTL។ បុរសវ័យ៤៦ឆ្នាំរូបនេះធ្លាប់ដឹកនាំក្រុមទីម័រខាងកើត ម្តងរួចហើយចន្លោះខែតុលា-វិច្ឆិកា ឆ្នាំ២០១៧ កន្លងទៅ។
លោក Simón Elissetche បានធ្វើដំណើរមកកាន់តំបន់អាស៊ាន តាំងពីឆ្នាំ២០១២ មកម៉្លេះ ដោយចុះកុងត្រាដឹកនាំក្លិប PSSB Bireuen សមាជិកលីគទី២ឥណ្ឌូណេស៊ី មុនបន្តដឹកនាំក្រុម Persita Tangerang និង Persikutim East Kutai ជាដើម។ រហូតដល់ឆ្នាំ២០១៧ លោកដឹកនាំក្រុម Karketu Dili សមាជិកលីគទី២ទីម័រខាងកើត ហើយនៅចុងឆ្នាំជាមួយគ្នានោះដែរលោកបានដឹកនាំក្រុមជម្រើសជាតិទីម័រខាងកើត តែម្តង។ នៅឆ្នាំ២០២០ លោកបានចូលដឹកនាំក្រុម Lalenok United នឹងឈ្នះជើងឯកពានរង្វាន់ 2020 FFTL Copa champion ថែមទៀតផង។
ដូច្នេះបញ្ជីឈ្មោះគ្រូបង្វឹកសមាជិកតំបន់អាស៊ាន ទាំង១២ក្រុមមាន៖
*ប្រ៊ុយណេ៖ Mario Rivera (អេស្ប៉ាញ)
*កម្ពុជា៖ Félix Dalmás (អាហ្សង់ទីន)
*ឥណ្ឌូណេស៊ី៖ Shin Tae-yong(កូរ៉េខាងត្បូង)
*ឡាវ៖ ទំនេរ
*ម៉ាឡេស៊ី៖ Kim Pan-gon (កូរ៉េខាងត្បូង)
*មីយ៉ាន់ម៉ា៖ Michael Feichtenbeiner (អាល្លឺម៉ង់)
*ទីម័រខាងកើត៖ Simon Elissetche (ឈីលី)
*ថៃ៖ Masatada Ishii (ជប៉ុន)
*សិង្ហបុរី៖ Tsutomu Ogura (ជប៉ុន)
*ហ្វីលីពីន៖ Tom Saintfiet (បែលហ្សិក)
*វៀតណាម៖ Kim Sang-sik (កូរ៉េខាងត្បូង)
*អូស្ត្រាលី៖ Graham Arnold (អូស្ត្រាលី)
