ក្រោយឆ្លងកាត់២ប្រកួតជាប់ៗគ្នា ក្រុមបាល់ទះនារីចំនួន៣ប្រទេស មានជប៉ុន ចិន និងប្រេស៊ីល សុទ្ធតែរកបានជ័យជម្នះជាប់ៗគ្នា ក្នុងពានរង្វាន់បាល់ទះអន្តរជាតិ 2024 FIVB Volleyball Women’s Nations League ដែលរៀបចំឡើងដោយសហព័ន្ធកីឡាបាល់ទះអន្តរជាតិ នៅទីក្រុងបាងកក ប្រទេសថៃ។
ជ័យជម្នះ៣ប្រកួតរបស់ជប៉ុន បានយកឈ្នះតួកគី ៣សិតទល់២ ហើយបន្តឈ្នះប៊ុលហ្គារី ៣សិតទល់០ ខណ:ការប្រកួតបន្ទាប់ជប៉ុន ត្រូវជួបអាល្លឺម៉ង់ នៅថ្ងៃទី១៧ ខែឧសភា ឆ្នាំ២០២៤ វេលាម៉ោង ២:០០រសៀល។
ចំណែកក្រុមចិន វិញប្រកួតដំបូងឈ្នះកូរ៉េខាងត្បូង ៣សិតទល់០ បន្តឈ្នះអាមេរិក ម្ចាស់ជើងឯក៣ជំនាន់ ៣សិតទល់១ ខណ:ការប្រកួតបន្ទាប់ចិន ត្រូវជួបកាណាដា ថ្ងៃទី១៧ ខែឧសភា ឆ្នាំ២០២៤ វេលាម៉ោង ៥:៣០ល្ងាច។
រីឯក្រុមប្រេស៊ីល វិញប្រកួតបើកឆាកឈ្នះកាណាដា ៣សិតទល់១សិត បន្តឈ្នះកូរ៉េខាងត្បូង ៣សិតទល់០ ហើយការប្រកួតបន្ទាប់ប្រេស៊ីល ត្រូវជួបអាមេរិក ថ្ងៃទី១៧ ខែឧសភា ឆ្នាំ២០២៤ វេលាម៉ោង ៩:០០យប់។
ក្រុមទាំង១៦ ដែលចូលរួមប្រកួតប្រជែងនៅក្នុងពានរង្វាន់ 2024 FIVB Volleyball Women’s Nations League មានដូចជា៖ ប្រេស៊ីល, ប៊ុលហ្គារី, កាណាដា, ចិន, សាធារណរដ្ឋដូមីនីកែន, បារាំង, អាល្លឺម៉ង, អ៊ីតាលី, ជប៉ុន, ហូឡង់, ប៉ូឡូញ, ស៊ែប៊ី, កូរ៉េខាងត្បូង, តួកគី, សហរដ្ឋអាមេរិក និងថៃ ដោយបានចាប់ផ្ដើមដំណើរការតាំងពីថ្ងៃទី១៤ ឧសភា ដល់ថ្ងៃទី២៣ មិថុនា ២០២៤។
ពានរង្វាន់ FIVB Volleyball Men’s Nations League រៀបចំឡើងពីឆ្នាំ២០១៨មក ខណៈឆ្នាំដំបូង និងឆ្នាំទី២ ធ្វើឡើងនៅប្រទេសចិន ហើយក្រុមជម្រើសជាតិអាមេរិក ឈ្នះជើងឯកទាំង២លើក ស្របពេលឆ្នាំ២០២០ កន្លងទៅត្រូវបានរំសាយចោលដោយសារស្ថានភាពរីករាលដាលនៃជំងឺកូវីដ-១៩។
លុះដល់ឆ្នាំ ២០២១ ធ្វើនៅប្រទេសអ៊ីតាលី ជើងឯកបានទៅលើក្រុមជម្រើសជាតិអាមេរិកដដែល ចំណែកឯឆ្នាំ ២០២២ ធ្វើនៅប្រទេសតួកគី ជើងឯកបានទៅលើក្រុមជម្រើសជាតិអ៊ីតាលី និងចុងក្រោយឆ្នាំ ២០២៣ ធ្វើនៅប្រទេសអាមេរិក ជើងឯកបានទៅលើក្រុមជម្រើសជាតិតួកគី៕
