ក្លិបបាល់ទះវិសាខា របស់ប្រទេសកម្ពុជា ទទួលបានការអញ្ជើញឱ្យចូលរួមប្រកួតក្នុងពានរង្វាន់ Win+ Streak Volleyball Invitational Tournament ជាលើកទី២ ដោយឆ្នាំ២០២៤ នេះធ្វើឡើងនៅកោះតៃវ៉ាន់ របស់ប្រទេសចិន ខណៈឆ្នាំ២០២៣ កន្លងទៅការប្រកួតធ្វើឡើងនៅប្រទេសម៉ាឡេស៊ី។
បើតាមប្រភពពីថ្នាក់ដឹកនាំក្លិបបាល់ទះវិសាខា បានប្រាប់ក្រុមការងារសារព័ត៌មានត្រយង ថាក្រុមទាំងមូល ចេញដំណើរពីកម្ពុជា ទៅតៃវ៉ាន់ នៅថ្ងៃចន្ទ ទី២៧ ខែឧសភា ឆ្នាំ២០២៤ ពោលគឺមុនការប្រកួត២ថ្ងៃ ដែលចាប់ផ្តើមពីថ្ងៃទី២៩ ខែឧសភា ដល់ ថ្ងៃទី២ ខែមិថុនា ឆ្នាំ២០២៤។
ពានរង្វាន់ Win+ Streak Volleyball Invitational Tournament ឆ្នាំ២០២៤ នេះមានក្រុមចូលរួមដូចជា៖ វិសាខា របស់កម្ពុជា, Flying Falcon (ម៉ាឡេស៊ី), Nature Med Club Tolun (ម៉ុងហ្គោលី), Win Streak (តៃវ៉ាន់), Long My Construction (តៃវ៉ាន់), Saitama Azalea (ជប៉ុន), Australian Volleyball Academy (អូស្រ្តាលី) និងHo Chí Minh Club (វៀតណាម)។
កម្មវិធីប្រកួតរបស់ក្រុមវិសាខា នៅក្នុងពានរង្វាន់នេះមានដូចជា៖
* ២៩ ឧសភា ២០២៤ ម៉ោង២រសៀល Australian Volleyball Academy ប៉ះវិសាខា
* ៣០ ឧសភា ២០២៤ ម៉ោង៧យប់ Win Streak ប៉ះវិសាខា
* ៣១ ឧសភា ២០២៤ ម៉ោង៣រសៀល Saitama Azalea ប៉ះវិសាខា
បញ្ជាក់៖ម៉ោងនៅតៃវ៉ាន់
សូមបញ្ជាក់ថាពានរង្វាន់បាល់ទះ Win+ Streak Volleyball Invitational Tournament ឆ្នាំ២០២៣ កន្លងទៅជើងឯកបានទៅក្រុមWin Streak របស់តៃវ៉ាន់ ដែលបច្ចុប្បន្នកីឡាករ វឿន វាសនា របស់កម្ពុជា កំពុងប្រកបអាជីពនៅទីនោះ៕
