សហព័ន្ធកីឡាបាល់ទះកម្ពុជា នឹងរៀបចំកម្មវិធីប្រកួតបាល់ទះមិត្តភាពចំនួន២គូ នៅរសៀលថ្ងៃសុក្រ ទី២៤ ខែឧសភា ឆ្នាំ២០២៤ លើទីលានវិមានពហុកីឡដ្ឋានជាតិ ក្នុងរាជធានីភ្នំពេញ ព្រមទាំងបើកឱ្យមហាជនចូលទស្សនាដោយសេរី។
សម្រាប់កម្មវិធីប្រកួតមាន៖
គូទី១៖ ម៉ោង៣រសៀល ក្រុមយុវជនក្រោមអាយុ២១ឆ្នាំកម្ពុជា ប៉ះ ក្រុមស្នងការនគរបាលរាជធានីភ្នំពេញ
គូទី២៖ ម៉ោង៥ល្ងាច ក្រុមបាល់ទះវិសាខា ប៉ះក្រុម Lavie Long An របស់វៀតណាម
សូមបញ្ជាក់ថាការប្រកួតមិត្តភាពទាំង២ខាងលើនេះ មានផ្សាយផ្ទាល់នៅលើបណ្តាញសង្គមហ្វេសប៊ុក និង Youtube របស់សារព័ត៌មានត្រយង ព្រមទាំងផ្សាយបន្តទៅកាន់ដៃគូសហការនានារបស់សហព័ន្ធកីឡាបាល់ទះកម្ពុជា ទៀតផង។
សម្រាប់ក្រុមយុវជនក្រោមអាយុ២០ឆ្នាំរបស់កម្ពុជា កំពុងត្រៀមខ្លួនចេញទៅប្រកួតជម្រុះពានរង្វាន់ជើងឯកទ្វីបអាស៊ី Asian Men’s U20 Volleyball Championship ទល់នឹងក្រុមវៀតណាម នៅប្រទេសថៃ ដែលមានការដឹកនាំដោយលោកគ្រូបង្វឹកជនជាតិចិន Li Jun។
ចំណែកក្រុមបាល់ទះវិសាខា វិញកំពុងតែត្រៀមខ្លួនដើម្បីចេញទៅប្រកួតក្នុងពានរង្វាន់ Win+ Steak Volleyball Invitational ហៅកាត់ (WSVI) Tournament នៅកោះតៃវ៉ាន់ ដែលក្លិបបាល់ទះ Win Streak ធ្វើជាម្ចាស់ផ្ទះ គ្រោងនឹងចាប់ផ្តើមពីថ្ងៃទី២៩ ខែឧសភា ឆ្នាំ២០២៤ រហូតដល់ថ្ងៃទី២ ខែមិថុនា ឆ្នាំ២០២៤ ខាងមុននេះ៕