សហព័ន្ធបាល់ទាត់អាស៊ី ដែលហៅកាត់ថា AFC បានបញ្ចេញតារាងចំណាត់ថ្នាក់ក្លិបតំណាងឱ្យប្រទេសជាសមាជិកខ្លួនចូលរួមប្រកួតប្រជែង ហៅថា AFC Club Competition Ranking ទាំងឆ្នាំ២០២៤-២៥ និងឆ្នាំ២០២៥-២៦ ស្របពេលដែលក្លិបទៅពីកម្ពុជា ត្រូវធ្លាក់ទៅលេងពានរង្វាន់កម្រិតទី៣ ម្តងទៀតក្រោយខកខានអស់រយៈពេល៧ឆ្នាំ។
ពានរង្វាន់កម្រិតទី៣ប្រចាំទ្វីបអាស៊ី លើកមុនឈ្មោះថា AFC President’s Cup បង្កើតឡើងនៅឆ្នាំ២០០៤ ហើយផ្អាកនៅឆ្នាំ២០១៤ ហើយកម្ពុជា មានឈ្មោះចូលរួមប្រកួតប្រជែងគ្រប់ឆ្នាំ ដោយនៅឆ្នាំ២០០៦ ក្លិបខេមរាកីឡា ធ្លាប់ឡើងដល់វគ្គពាក់កណ្តាលផ្ដាច់ព្រ័ត្រ ១លើក ហើយនៅឆ្នាំ២០១១ ក្លិបភ្នំពេញក្រោន ធ្លាប់ឡើងដល់វគ្គផ្ដាច់ព្រ័ត្រ១លើក។
ក្រោយពេលរំសាយពានរង្វាន់ AFC President’s Cup សហព័ន្ធបាល់ទាត់អាស៊ី បានសម្រេចឱ្យក្លិបតាមបណ្តាប្រទេសជាសមាជិកចូលរួមប្រកួតពានរង្វាន់កម្រិតទី២ គឺ AFC Cup ទាំងអស់គិតពីឆ្នាំ២០១៧ មក ដោយប្រទេសខ្លះមានឈ្មោះប្រកួតក្នុងវគ្គជម្រុះតាមកម្រិតដែលបានកំណត់ ហើយប្រទេសខ្លះមានក្រុមចាំនៅវគ្គចែកពូល។ ប៉ុន្តែចាប់ពីរដូវកាល២០២៣-២៤ តទៅសហព័ន្ធបាល់ទាត់អាស៊ី បានសម្រេចបង្កើតពានរង្វាន់កម្រិតទី៣ប្រចាំទ្វីបឡើងវិញ ដោយប្រើឈ្មោះថា AFC Challenge League ក្នុងនោះការវាយតម្លៃរបស់សហព័ន្ធបាល់ទាត់អាស៊ី តម្រូវឱ្យកម្ពុជា ចូលរួមប្រកួតក្នុងពានរង្វាន់នេះ២រដូវកាលជាប់ៗគ្នា ដល់រដូវកាល២០២៥-២៦ ខាងមុខ។
ក្នុងនាមជាក្រុមជើងឯកលីគកំពូលកម្ពុជា Cambodian Premier League 2023-24 ក្លិបព្រះខ័នរាជស្វាយរៀងនឹងតំណាងឱ្យកម្ពុជា ចូលរួមប្រកួតក្នុងពានរង្វាន់ AFC Challenge League រដូវកាល២០២៤-២៥ ខណៈការប្រកួតគ្រោងដំណើរការពីចុងខែកក្កដា ២០២៤ ដល់ខែមេសា ២០២៥ ខាងមុខ។
ដូច្នេះសម្រាប់ព្រះខ័នរាជស្វាយរៀង មានពានរង្វាន់ចំនួន៦ នៅក្នុងដៃ ដែលត្រៀមប្រកួតប្រជែងនៅរដូវកាលក្រោយ ក្នុងនោះមានពានរង្វាន់បើករដូវកាល Cambodian Super Cup, Cambodian League Cup, Cambodian Premier League, ពានរង្វាន់សម្តេចតេជោ ហ៊ុន សែន បូករួមទាំងពានរង្វាន់អន្តរជាតិប្រចាំតំបន់អាស៊ាន Asean Club Championship និងពានរង្វាន់កម្រិតទ្វីបអាស៊ី AFC Challenge League។
ចំណែកក្លិបក្នុងប្រទេសតំបន់អាស៊ាន ដែលមានកូតាចូលប្រកួតពានរង្វាន់ AFC Challenge League រដូវកាល២០២៤-២៥ មាន១ក្រុមដូចៗ គ្នាក្នុងនោះក្លិបតំណាងប្រទេសឥណ្ឌូណេស៊ី, មីយ៉ាន់ម៉ា, កម្ពុជា, ឡាវ, ប្រ៊ុយណេ និងទីម័រខាងកើត។ ចំណែករដូវកាលឆ្នាំ២០២៥-២៦ ខាងមុខប្រទេសទាំង៦ដដែលទៀត។
ដូចនេះរងចាំតាមដានទាំងអស់គ្នាថា ក្រុមព្រះខ័នរាជស្វាយរៀង ដែលតំណាងឱ្យកម្ពុជា នឹងបន្តធ្វើបានល្អកម្រិតណានៅរដូវកាលថ្មីខាងមុខ?
