សេអ៊ូល៖ កូរ៉េខាងត្បូងបាន ក្រើនរំឭកប្រជាជនដែលរស់នៅក្បែរព្រំដែនជាមួយកូរ៉េខាងជើង ឱ្យមានការប្រុងប្រយ័ត្ន បន្ទាប់ពីប្រព័ន្ធផ្សព្វផ្សាយបានរាយការណ៍ថា កូរ៉េខាងជើងបានបញ្ជូនប៉េងប៉ោងដែលមានផ្ទុកនូវវត្ថុផ្សេងៗគ្នា ដែលនៅក្នុងនោះដូចជា សំរាម និងលាមក ចូលមកក្នុងទឹកដីរបស់ខ្លួន។ នេះបើយោងតាមការចេញផ្សាយដោយសារព័ត៌មាន The Guardian នាថ្ងៃពុធ ទី២៩ ខែឧសភា ឆ្នាំ២០២៤។
នៅក្នុងប្រព័ន្ធផ្សព្វផ្សាយរបស់កូរ៉េខាងត្បូង បានបង្ហាញឱ្យឃើញ ថា មានប៉េងប៉ោងពណ៌ ស ហោះចូលមកក្នុងប្រទេសដោយប៉េងប៉ោងនោះ មានចងថង់ប្លាស្ទិកចងជាប់នឹងវា ដែលមើលទៅហាក់បីដូចជាសំរាម និងលាមក។
![](https://cdn.troryorng.com/wp-content/uploads/2024/05/29131759/image-2523.png)
![](https://cdn.troryorng.com/wp-content/uploads/2024/05/29132002/image-2531.png)
គិតត្រឹមថ្ងៃពុធនេះ ប៉េងប៉ោងជាង១៥០ ត្រូវបានគេរកឃើញ នេះបើយោងតាមទីភ្នាក់ងារសារព័ត៌មានយ៉ុនហាប់ ដោយបានបន្ថែមដោយដកស្រង់ពីប្រភពយោធាកូរ៉េខាងត្បូង។
ប៉េងប៉ោងមួយចំនួនបានធ្វើដំណើរក្នុងរយៈចម្ងាយឆ្ងាយរហូតដល់ខេត្ត South Gyeongsang ភាគអាគ្នេយ៍នៃប្រទេសកូរ៉េខាងត្បូង។
![](https://cdn.troryorng.com/wp-content/uploads/2024/05/29131829/image-2526.png)
មន្ត្រីនៃអគ្គសេនាធិការរួម (JCS) បាននិយាយថា ប៉េងប៉ោងដែលធ្លាក់នោះទំនងជាបានដឹកសំរាមជាច្រើនមុខ រួមទាំងដបប្លាស្ទិក អាគុយ គ្រឿងបន្លាស់ស្បែកជើង និងរបស់ដែលគេជឿថា ជាលាមកសត្វ។
យោធាបាននិយាយថា យើងបានដាស់តឿនប្រជាជនកុំឱ្យទៅជិតវត្ថុទាំងនោះ ហើយសូមរាយការណ៍ពីកន្លែងដែលប៉េងប៉ោងនោះហោះធ្លាក់ ដល់យោធា ឬប៉ូលិសក្នុងតំបន់។
បើតាមទីភ្នាក់ងារព័ត៌មានក្នុងស្រុក យ៉ុនហាប់, មន្ត្រីនៃអគ្គសេនាធិការរួម (JCS) បាននិយាយថា «ទង្វើទាំងនេះរបស់កូរ៉េខាងជើង ច្បាស់ជាបំពានច្បាប់អន្តរជាតិ និងគំរាមកំហែងយ៉ាងធ្ងន់ធ្ងរដល់សុវត្ថិភាពប្រជាជនរបស់យើង»។ «យើងព្រមានកូរ៉េខាងជើង យ៉ាងម៉ឺងម៉ាត់ ឱ្យបញ្ឈប់ជាបន្ទាន់នូវអំពើអមនុស្សធម៌ និងទង្វើជេរប្រមាថទាំងនេះ ជាបន្ទាន់»។
![](https://cdn.troryorng.com/wp-content/uploads/2024/05/29131843/image-2527.png)
![](https://cdn.troryorng.com/wp-content/uploads/2024/05/29131901/image-2528.png)
ការបង្ហោះប៉េងប៉ោងកខ្វក់នេះ បានកើតឡើង សុន្ទរកថារបស់អនុរដ្ឋមន្ត្រីក្រសួងការពារជាតិក្រុងសេអ៊ូល ដែលរៀបរាប់ថា នឹងមានការធ្វើសមយុទ្ធការពារជាតិខ្នាតធំមួយ នៅថ្ងៃចន្ទ ដើមសប្ដាហ៍នេះ និងធ្វើឡើងបន្ទាប់ពីការព្រមានរបស់លោក Kim Kang-il អនុរដ្ឋមន្ត្រីការពារជាតិកូរ៉េខាងជើង ថា កូរ៉េខាងជើងអាចនឹងបញ្ជូនរបស់កខ្វក់ ឬសំរាមចូលតំបន់ព្រំដែន ដើម្បីជាការឆ្លើយតបនឹងសកម្មជនកូរ៉េខាងត្បូងមួយចំនួន នឹងជាការសងសឹកជាការឆ្លើយតបទៅនឹងខិត្តប័ណ្ណប្រឆាំងកូរ៉េខាងជើង ដែលបានហោះហើរឆ្លងកាត់ព្រំដែន។
![](https://cdn.troryorng.com/wp-content/uploads/2024/05/29131926/image-2529.png)
ជាច្រើនឆ្នាំមកនេះ សកម្មជនកូរ៉េខាងត្បូង និងជនចំណាកស្រុកកូរ៉េខាងជើង បាននាំគ្នាបង្ហោះប៉េងប៉ោងចូលទៅកាន់កូរ៉េខាងជើង ដោយកាន់ខិត្តប័ណ្ណរិះគន់របបដឹកនាំរបស់លោក គីម ជុងអ៊ុន និងជំរុញឱ្យប្រជាជនកូរ៉េខាងជើងក្រោកឡើងប្រឆាំងនឹងរបប គីម ដែលបានគ្រប់គ្រងប្រទេសអស់ជាច្រើនទសវត្សរ៍។ ពួកគេក៏បានផ្ញើបន្ទះ USB ផ្ទុកនូវវីដេអូចម្រៀង K-pop ដែលជាចម្រៀងត្រូវបានហាមឃាត់នៅភាគខាងជើងនៃប្រទេសផងដែរ។
![](https://cdn.troryorng.com/wp-content/uploads/2024/05/29131946/image-2530-1024x576.png)
សូមជម្រាបថា ការប្រើប្រាស់ប៉េងប៉ោងដើម្បីជាការឃោសនា គឺជាប្រភពនៃភាពតានតឹងយូរមកហើយរវាងកូរ៉េខាងជើង និងកូរ៉េខាងត្បូង បើទោះជាមានកិច្ចព្រមព្រៀងឈប់បាញ់ ដើម្បីបញ្ចប់សង្គ្រាមកូរ៉េចាប់តាំងឆ្នាំ១៩៥០-១៩៥៣ ក៏ដោយ ដោយពួកគេបានបញ្ចប់ក្នុងកិច្ចព្រមព្រៀងឈប់បាញ់ ប៉ុន្តែមិនមែនជាសន្ធិសញ្ញាសន្តិភាពនោះទេ៕
![](https://cdn.troryorng.com/wp-content/uploads/2024/04/27142737/Troryorng-Telegram-1-1024x126-1-1-1-1.jpg)