បាល់ទះនារីវៀតណាម នឹងតំណាងឱ្យទ្វីបអាស៊ី ទៅប្រកួតពានរង្វាន់កម្រិតពិភពលោក ពានរង្វាន់ 2024 FIVB Volleyball Women’s Challenger Cup ក្រោយឈ្នះលើក្រុមកាហ្សាក់ស្ថាន ដោយលទ្ធផល ៣សិតទល់នឹង០ នៃពានរង្វាន់កម្រិតទ្វីប Women’s AVC Challenge Cup 2024 កាលពីថ្ងៃទី២៩ ខែឧសភា ឆ្នាំ២០២៤ កន្លងទៅ។
មុនឈ្នះមេដាយមាសនៃព្រឹតិ្តការណ៍ Women’s AVC Challenge Cup 2024 ក្រុមជម្រើសជាតិនារីវៀតណាម គឺបានយកឈ្នះលើក្រុមជម្រើសជាតិនារីអូស្ត្រាលី ដោយលទ្ធផល ៣ទល់នឹង០ នៅវគ្គពាក់កណ្តាលផ្តាច់ព្រ័ត្រ កាលពីថ្ងៃទី២៨ ខែឧសភា ឆ្នាំ២០២៤ កន្លងទៅ។
ដូច្នេះក្រុមជម្រើសជាតិនារីវៀតណាម នឹងតំណាងឱ្យទ្វីបអាស៊ី១កៅអីឡើងទៅប្រកួតពានរង្វាន់កម្រិតពិភពលោក 2024 FIVB Volleyball Women’s Challenger Cup ដែលធ្វើឡើងនៅប្រទេសហ្វីលីពីន ដើមខែកក្កដា ខាងមុខ ដែលមានក្រុមខ្លាំងៗចំនួន៧ ក្រុមកំពុងអង្គុយចាំ។
គួរឱ្យដឹងថា ពានរង្វាន់បាល់ទះផ្នែកនារី 2024 Asian Women’s Volleyball Challenge Cup ដែលរៀបចំឡើងដោយសហព័ន្ធកីឡាបាល់ទះអាស៊ី (AVC) បានចាប់ផ្ដើមដំណើរការពីថ្ងៃទី២២ ខែឧសភា និងបានបញ្ចប់ជាផ្លូវការនៅថ្ងៃទី២៩ ឧសភា ២០២៤ ដោយមានក្រុមចូលរួមចំនួន១០ ធ្វើឡើងនៅប្រទេសហ្វីលីពីន។
១០ក្រុម ដែលចូលរួមប្រកួតប្រជែងនៅក្នុងពានរង្វាន់ 2024 Asian Women’s Volleyball Challenge Cup គឺបានបែងចែកជា២ពូលមានដូចជា៖
ពូលA៖ ហ្វីលីពីន, ចិនតៃប៉ិ, ឥណ្ឌា, អ៊ីរ៉ង់ និង អូស្ត្រាលី
ពូលB៖ វៀតណាម, ឥណ្ឌូណេស៊ី, កាហ្សាក់ស្ថាន, សិង្ហបុរី និង ហុងកុង។
នេះជាពានរង្វាន់ឯកត្តជន នៃពានរង្វាន់បាល់ទះនារី Women’s AVC Challenge Cup 2024៖
- កីឡាការនីល្អប្រចាំការប្រកួត បានលើ Nguyễn Thị Bích Tuyền របស់វៀតណាម
- អ្នកបាល់ល្អ ជាងគេ បានលើកីឡាការនី Jia De Guzman របស់ហ្វីលីពីន
- អ្នកវាយសេវាល្អជាងគេបានលើ កីឡាការនី Caitlin Tipping របស់អូស្ត្រាលី និង Sana Anarkulova របស់កាហ្សាក់ស្ថាន
- អ្នកធ្វើរនាំងល្អជាងគេបានលើកីឡាការនី Lê Thanh Thúy របស់វៀតណាម និងYuliya Yakimova របស់កាហ្សាក់ស្ថាន
- អ្នកវាយប្រយុទ្ធល្អជាងគេបានលើកីឡាការនី Angel Canino របស់ហ្វីលីន
- កីឡាការនី សេរីល្អជាងគេ Best libero បានលើ Nguyễn Khánh Đang របស់វៀតណាម
សម្រាប់ពានរង្វាន់បាល់ទះ 2024 FIVB Volleyball Women’s Challenger Cup មាន៨ក្រុម មកពី៥ទ្វីបជុំវិញពិភពលោក ខណៈការប្រកួតគ្រោងនឹងចាប់ផ្តើមជាផ្លូវការនៅថ្ងៃទី៤ ដល់ថ្ងៃទី៧ ខែកក្តដា ឆ្នាំ២០២៤ ខាងមុខ នៅប្រទេសហ្វីលីពីន៕
