ឯកឧត្ដម វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា មានប្រសាសន៍ថា ការរៀបចំធ្វើជាម្ចាស់ផ្ទះព្រឹត្តិការណ៍កីឡាយុទ្ធគុនចម្រុះជើងឯកអាស៊ី លើកទី២ ឆ្នាំ២០២៤ គឺក្នុងគោលបំណងសំខាន់ៗចំនួន២។
ឯកឧត្ដម រដ្ឋលេខាធិការ ក្រសួងអប់រំ យុវជន និងកីឡា លម្អិតពីគោលបំណងបែបនេះ៖
ទី១. ជួយដល់ កីឡាករ កីឡាការិនី មានឱកាសចូលរួមប្រកួតកីឡា កម្រិតខ្ពស់នៅអាស៊ី ជាប្រទេស នៃ ប្រភព ក្បាច់គុន។ កម្ពុជាក៏ជាប្រភពក្បាច់គុនដ៏ចំណាស់ក្នុងប្រវត្តិសាស្ត្រដែរ ព្រោះបានទទួលឥទ្ធិពលក្បាច់គុនដើមពីឥណ្ឌា តែមិនមែនមានន័យថា យកក្បាច់គុណពី ឥណ្ឌាទាំងស្រុងនោះទេ សូម្បី ចិន កូរ៉េ អីក៏មានឥទ្ធិពលពីឥណ្ឌាដែរ។ អ៊ីចឹងវាជាឱកាសនៃការលើកតម្កើងក្បាច់គុនយើង។
ទី២. ធ្វើសមាហរណកម្ម ក្បាច់គុនបញ្ចូលគ្នា និង ដឹងពីក្រមនៃការប្រកួត។ ការប្រកួតនេះមិនមែនសំដៅទាំងស្រុងទៅលើការឈ្នះចាញ់នោះទេ គឺដើម្បីកិត្តិយស វាយអស់ពីសមត្ថភាព វាយយកពិន្ទុ និងដើម្បីគោរពគោលការណ៍បទបញ្ញត្តិការប្រកួតអាស៊ី”។
ឯកឧត្ដម វ៉ាត់ ចំរើន បន្តទៀតថា សកម្មភាពនេះក៏ជាការឆ្ពោះទៅរកការដាក់បញ្ចូលក្នុងកម្រិតកីឡាអូឡាំពិក។ ដូច្នេះប្រកួតដើម្បីឱ្យមានការផ្សព្វផ្សាយទូលំទូលាយ។ ជាក់ស្ដែង គុនចម្រុះអាស៊ីនេះ នឹងមានក្នុងព្រឹត្តិការណ៍កីឡា Asian Games នៅ Nagoya ប្រទេសជប៉ុន ឆ្នាំ២០២៦។ បន្ទាប់ពីនេះទៅ ក៏នឹងឡើងទៅមួយកម្រិតទៀតក្នុង២០២៨ គឺព្រឹត្តិការណ៍កីឡាអូឡាំពិក Los Angeles សហរដ្ឋអាមេរិក។
សម្រាប់កម្ពុជាវិញ អ្វីដែលជាគោលបំណងធំដែរនោះ គឺដើម្បីសមាហរណកម្មកីឡាករ កីឡាការិនី គុនចម្រុះខ្មែរទៅលើឆាកអន្តរជាតិជាផ្លូវការ។ គិតមកទល់ពេលនេះ មានជាង១៧ប្រទេសបានចុះឈ្មោះចូលរួម ហើយរំពឹងថា នឹងបានជាង២០ប្រទេសពេលផុតកាលបរិច្ឆេទចុះឈ្មោះនាពេលប៉ុន្មានថ្ងៃខាងមុខនេះ។
ក្នុងនោះកម្ពុជាត្រៀម កីឡាករ កីឡាការិនី ១៦នាក់ មានដូច ផេង សុបញ្ញា, ឡុង ឡា, រិន សារ័ត្ន, ហ៊ុន គឹមហៀង, មាស ម៉ើ, សែន ច័ន្ទឫទ្ធិគុន, ហ៊ុន ចន្ទរាជ, ធាន អាន, ចាន់ រតនា, អេ វីរៈខាំឈីត, ហាត ភី, ខៀវ ចិន្ដារ័ត្ន, នៅ ស្រីពៅ, គន្ធ វ៉ាន់នីតា, អ៊ុ ថារ័ត្ន និង ទួន ស្រីភីន។
គួរដឹងដែរថា ព្រឹត្តិការណ៍កីឡាយុទ្ធគុនចម្រុះជើងឯកអាស៊ីលើកទី២ ឆ្នាំ២០២៤ នឹងប្រព្រឹត្តពីថ្ងៃទី១១ដល់ថ្ងៃទី១៣ ខែកក្កដា នា ពហុកីឡដ្ឋានជាតិ ក្រោមអធិបតីដ៏ខ្ពង់ខ្ពស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃ ព្រះរាជាណាចក្រកម្ពុជា។ការប្រកួតនេះក៏ជាការជម្រុះទៅ Asian Indoor Martial Games នៅប្រទេសថៃ ថ្ងៃទី២១ ខែវិច្ឆិកា ឆ្នាំ២០២៤៕
អត្ថបទ៖ NOCC