វគ្គជម្រុះពានរង្វាន់ជើងឯកពិភពលោក 2026 FIFA World Cup បានបញ្ចប់ការប្រកួតវគ្គជម្រុះជុំទី២ ហើយដូចនេះក្រុមទាំង១៨ ដែលមានឈ្មោះឡើងទៅជុំទី៣ នឹងបន្តប្រកួតគ្នាក្នុងពូលដើម្បីស្វែងរកក្រុមខ្លាំងបន្តឡើងទៅជុំទី៤ និងទី៥ មុនកក់សំបុត្រយន្តហោះទៅជុំផ្ដាច់ព្រ័ត្រ។
![](https://cdn.troryorng.com/wp-content/uploads/2024/06/13105157/Untitled.png)
សម្រាប់ក្រុមទាំង១៨ ដែលជាក្រុមខ្លាំង តាមពូល ទាំង៩ និងជាក្រុមដែលរកបានពិន្ទុច្រើនជាងគេ នឹងបន្តឡើងទៅជុំទី៣មានដូចជា៖ ក្រុមជម្រើសជាតិអូស្ត្រាលី, បារ៉ែន, ចិន, ឥណ្ឌូនេស៊ី, អ៊ីរ៉ង់, អ៊ីរ៉ាក់, ជប៉ុន, ហ្ស៊កដានី, គុយវ៉ែត, កៀហ្ស៊ីស៊ីស្ថាន, កូរ៉េខាងជើង, អូម៉ង់, ប៉ាឡេស្ទីន, កាតា, អារ៉ាប៊ីសាអូឌីត, កូរ៉េខាងត្បូង, អារ៉ាប់រួម, អ៊ូសបេគីស្ថាន។
សម្រាប់រូបមន្តប្រកួតគឺក្រុមដែលឈរលេខ១និងលេខ២តាមពូលនីមួយៗនៅជុំទី២ នឹងបន្តទៅប្រកួតជុំទី៣ ដោយក្រុមទាំង១៨នេះ ត្រូវបែងចែកជា៣ពូលទៀត ដើម្បីប្រកួតសន្សំពិន្ទុយកក្រុមលេខ១និងលេខ២ នឹងទទួលសិទ្ធិស្វ័យប្រវត្តិទៅប្រកួត 2026 FIFA World Cup ខណៈក្រុមលេខ៣និងលេខ៤ ត្រូវបន្តទៅប្រកួតជុំទី៤។
![](https://cdn.troryorng.com/wp-content/uploads/2024/06/13105128/2-1024x575.png)
ចំពោះរូបមន្តប្រកួតនៅជុំទី៤ វិញគឺយកក្រុមលេខ៣និងលេខ៤ទាំង៣ពូលមាន៦ក្រុម ចាប់ឆ្នោតបែងចែកជា២ពូល ប្រកួតគ្នា ស្វែងករកអ្នកឈរលេខ១តាមពូល បន្តបានសំបុត្រទៅ 2026 FIFA World Cup ជាមួយក្រុមទាំង៦មុន ក្នុងជុំទី៣។ ចំណែកក្រុមលេខ២ក្នុងពូលទាំង២ ត្រូវបន្តសិទ្ធិទៅប្រកួតជុំទី៥។
ជុំទី៥នេះយកក្រុមលេខ២ ទាំង២ពូលនៅជុំទី៤ ប្រកួតគ្នាចំនួន២ជើង (Home/Away) រកអ្នកឈ្នះតំណាងឱ្យទ្វីបអាស៊ី ទៅប្រកួតជាមួយក្រុមណាមួយមកពីទ្វីបផ្សេង រកអ្នកឈ្នះបន្តឱកាសទៅ 2026 FIFA World Cup។
![](https://cdn.troryorng.com/wp-content/uploads/2024/06/13105135/image-1024x576.jpg)
ខាងក្រោមនេះជាចំនួនកៅអីដែលបណ្តាលទ្វីប នីមួយៗទទួលបានមុនទៅចូលនៅ World Cup ឆ្នាំ២០២៦៖
១. ទ្វីបអាស៊ី ទទួលបាន ៨កៅអី កើនឡើងចំនួន ២កៅអី
២. ទ្វីបអាហ្រ្វិក ទទួលបាន ៩កៅអី កើនឡើងចំនួន ៥កៅអី
៣. ទ្វីបអាមេរិកខាងជើង ទទួលបាន ៣កៅអី (ដកម្ចាស់ផ្ទះ៣ប្រទេស)
៤. ទ្វីបអាមេរិកខាងត្បូង ទទួលបាន ៦កៅអី កើនឡើងចំនួន ២កៅអី
៥. ទ្វីបអឺរ៉ុប ទទួលបាន ១៦កៅអី កើនឡើងចំនួន ៣កៅអី
៦. ទ្វីបអូសេអានី ទទួលបាន ១កៅអី។
![](https://cdn.troryorng.com/wp-content/uploads/2024/06/13105303/%E1%9F%A4-2-1024x576.png)
បើមិនមានអ្វីប្រែប្រួលនោះទេ នោះការប្រកួតជុំផ្តាច់ព្រ័ត្រនៃពានរង្វាន់បាល់ទាត់ពិភពលោក FIFA World Cup ២០២៦ នឹងចាប់ផ្តើមនៅខែមិថុនា ដល់ខែកក្កដា ឆ្នាំ២០២៦ ដែលរៀបចំឡើងនៅសហរដ្ឋអាមេរិក កាណាដា និងម៉ិកស៊ិក ដោយមាន ៤៨ក្រុម មកពី៦ទ្វីប ជុំវិញពិភពលោក៕
ដូចនេះយើងរងចាំមើលថា តើក្រុមណាខ្លះនឹងតំណាងទ្វីបអាស៊ី ទៅប្រកួតជុំផ្តាច់ព្រ័ត្រ នៅឆ្នាំ២០២៦ ?
![](https://cdn.troryorng.com/wp-content/uploads/2024/04/27142737/Troryorng-Telegram-1-1024x126-1-1-1-1.jpg)