ឯកឧត្តម ខូវ ឆាយ ប្រធានសហព័ន្ធកីឡាប្រដាល់គុនខ្មែរ បានមានប្រសាសន៍ថា មកដល់ពេលនេះ យើងនៅមិនទាន់បានសម្រេច ១០០% ដែរថាយើងចូលរួមឬក៏មិនចូលរួម នៅក្នុងការប្រកួតកីឡាស៊ីហ្គេមឆ្នាំក្រោយនៅប្រទេសថៃ សម្រាប់វិញ្ញា Muay Thai នៅឡើងទេ។ កាលលើកឡើងដូចនេះ ធ្វើឡើង នៅក្នុងកម្មវិធី នាទីវែកញែកកីឡា កាលពីថ្ងៃទី១៤ មិថុនា កន្លងទៅ។
ពាក់ព័ន្ធជុំរឿងនេះឯកឧត្តម ខូវ ឆាយ ក៏បានបញ្ជាក់ថា ដោយសារតែយើងនិយាយដោយត្រង់ទៅគឺយើងត្រូវសុំគោលការណ៍ពីថ្នាក់ដឹកនាំ ព្រោះទាក់ទងជាមួយនយោបាយ ថាតើយើងគួរតែចូលរួមឬអត់ក្នុងវិញ្ញាសាមួយហ្នឹង ក្នុងនាមជាប្រទេសជិតខាង។
ឯកឧត្តមបានបន្តថា បើយោងតាមការអ្វីដែលប្រជាពលរដ្ឋមួយចំនួនគាត់មិនចង់អោយយើងចូលរួមទេ ប៉ុន្តែក្នុងនាមនយោបាយកាទូត ក្នុងនាមកីឡាក្នុងតំបន់អាស៊ីអាគ្នេយ៍ និងនៅតែបន្តការជះទឹកទៅវិញទៅមក មិនចូលរួមទៅវិញទៅមក រឿងនេះមិនអាចចប់ឡើយ តែបើយើងចង់បញ្ចប់គឺត្រូវតែមានការចរចាណាមួយដើម្បីមានការសម្របសម្រួល ព្រមព្រៀងគ្នា បន្ទោនឥរិយាបថដើម្បីរួបរួមគ្នាឡើងវិញ។
ប្រធានសហព័ន្ធកីឡាប្រដាល់គុនខ្មែរបានបន្ថែមថា កន្លងមកខ្ញុំក៏ទទួលរង់នូវការរិ:គន់ច្រើនពីអ្នកគាំទ្រ ថាខ្ញុំគាំទ្រភាគីថៃ ប៉ុន្តែក្នុងនាមយើងជាពលរដ្ឋកម្ពុជា គឺយើងមិនយកនរណាជាសត្រូវឡើង និងរាប់អានទាំងអស់ចំពោះប្រទេសដែលជាភូមិផងរបងជាមួយ។
គួរបញ្ជាក់ថា ការប្រកួតកីឡាស៊ីហ្គេម លើកទី៣៣ នឹងត្រូវធ្វើឡើងនៅប្រទេសថៃ ដែលគ្រោងប្រារព្ធពិធីបើកនៅថ្ងៃទី០៩ ខែធ្នូ ឆ្នាំ២០២៥នឹងត្រូវបិទបញ្ចប់នៅថ្ងៃទី២០ ខែធ្នូ ឆ្នាំ២០២៥។ តាមការគ្រោងទុក ក្នុងនោះមាន ១១ប្រទេសនៅក្នុងតំបន់អាស៊ានបានចូលប្រកួតប្រជែងដណ្ដើមមេដាយ និងដាក់អោយចូលរួមប្រកួតប្រជែងមាន ៤៣ប្រភេទកីឡា៕