ក្រុមបាល់ទះជម្រើសជាតិកម្ពុជា អាយុក្រោម ២០ឆ្នាំ នឹងត្រូវជួបក្រុមជម្រើសជាតិ U20 វៀតណាម ក្នុងវគ្គជម្រុះលើទឹកដីកណ្ដាលនៅប្រទេសថៃ នៅថ្ងៃទី២៥ ខែមិថុនាខាងមុខ ដើម្បីប្រជែងកៅអីជុំផ្ដាច់ព្រ័ត្រការប្រកួតកីឡាបាល់ទះជើងឯកអាស៊ី យុវជនអាយុក្រោម ២០ឆ្នាំ ឆ្នាំ២០២៤ (Men’s Asian U20 Volleyball Championship 2024) នៅប្រទេសឥណ្ឌូណេស៊ី។
ខាងក្រោមនេះគឺជាសមាសភាពក្រុមបាល់ទះ U20 កម្ពុជា ទាំង១២នាក់៖
ក្រុមឈ្នះរវាង U20 កម្ពុជា និង U20 វៀតណាម (តំបន់អាស៊ាន) នឹងចូលទៅក្នុងពូល D ដែលមានក្រុម U20 ថៃ និង U20 កូរ៉េខាងត្បូង កំពុងរង់ចាំ ចំណែកឯ១ក្រុមទៀត គឺការប្រកួតជម្រុះរវាង U20 កាហ្សាក់ស្ថាន និង U20 អ៊ូសបេគីស្ថាន (តំបន់អាស៊ីកណ្តាល)។
ក្រោមការដឹងនាំត្រួតពិន្យរបស់លោក Li Jun គ្រូបង្វឹកក្រុមជម្រើសជាតិបាល់ទះកម្ពុជា ក្រុមកីឡាករបាល់ទះជម្រើសជាតិអាយុក្រោម ២០ឆ្នាំ ត្រូវបានធ្វើ តេស្ត ជ្រើសរើស ពីតាមបណ្ដាលក្លិបធំៗចំនួន ដូចជា ក្រុមយុវជនក្លិបបាល់ទះវិសាខា ក្រុមយុវជនសមាគមបាល់ទះក្រសួងមហាផ្ទៃ និងក្រុមយុវជន របស់ក្រុមបាល់ទះស្នងការដ្ឋាននគរបាលរាជធានីភ្នំពេញ។
កាលពីថ្ងៃសុក្រ ទី២៤ ខែឧសភា ឆ្នាំ២០២៤ កន្លងទៅនៅពហុកីឡដ្ឋានជាតិ ក្រុមបាល់ទះជម្រើសជាតិកម្ពុជា អាយុក្រោម២០ឆ្នាំ បានប្រកួតចាញ់ក្លិបកីឡាបាល់ទះស្នងការដ្ឋាននគរបាលរាជធានីភ្នំពេញ ក្នុងលទ្ធផល ៣-១ ជំនួបមិត្តភាព។
គួរដឹងផងដែរថាព្រឹត្តិការណ៍ជើងឯកអាស៊ី Men’s Asian U20 Volleyball Championship ឆ្នាំ២០២៤ លើកទី២២ ដែលរៀបចំឡើងនៅប្រទេសឥណ្ឌូណេស៊ី គ្រោងនឹងចាប់ផ្តើមពីថ្ងៃទី២៣ ដល់ថ្ងៃទី៣០ ខែកក្កដា ឆ្នាំ២០២៤៕