ឈានដល់ថ្ងៃទី៤ កក្កដានេះ នៃព្រឹត្តិការណ៍កីឡានិស្សិតតំបន់អាស៊ាន 2024 ASEAN University Games ដែលកំពុងដំណើរការនៅទីក្រុង Surabaya ខេត្ត East Java ប្រទេសឥណ្ឌូនេស៊ី ស្របពេលដែលកម្ពុជា ដណ្តើមបានមេដាយសរុប ៥គ្រឿង ខណ:ម្ចាស់ផ្ទះឥណ្ឌូនេស៊ី ឈរលេខ ១ ឈ្នះមេដាយ សរុប ១៦៤គ្រឿង គិតត្រឹមម៉ោង ១០ព្រឹក ថ្ងៃទី៤ ខែកក្កា ឆ្នាំ២០២៤។
តារាងមេដាយ ទាំង ១១ប្រទេសចូលរួម ដណ្ដើមបាន គិតត្រឹមព្រឹកថ្ងៃទី៤ កក្កដា ២០២៤ នេះ៖
ប្រទេស | មេដាយ មាស | មេដាយ ប្រាក់ | មេដាយ សំរឹទ្ធ | មេដាយ សរុប | |
១ | ឥណ្ឌូនេស៊ី | ៧១ | ៥៦ | ៣៧ | ១៦៤ |
២ | ថៃ | ២៤ | ២០ | ១១ | ៥៥ |
៣ | ម៉ាឡេស៊ី | ១៤ | ១៧ | ២៨ | ៥៩ |
៤ | សិង្ហបុរី | ៧ | ១៨ | ២០ | ៤៥ |
៥ | វៀតណាម | ៤ | ៤ | ២ | ៩ |
៦ | ឡាវ | ២ | ២ | ៤ | ៨ |
៧ | ហ្វីលីពីន | ២ | ១ | ២ | ៥ |
៨ | *កម្ពុជា | ១ | ២ | ២ | ៥ |
៩ | ប្រ៊ុយណេ | ១ | ០ | ០ | ១ |
១០ | មីយ៉ាន់ម៉ា | ០ | ៧ | ០ | ៧ |
១១ | ទីម័រ ខាងកើត | ០ | ០ | ២ | ២ |
១២៦ | ១២៦ | ១០៨ | ៣៦០ |
ព្រឹត្តិការណ៍កីឡានិស្សិតតំបន់អាស៊ាន 2024 ASEAN University Games មានប្រទេសជាសមាជិកចំនួន១១ចូលរួម ក្នុងនោះបានដាក់កីឡាចំនួន២១ប្រភេទ មានសរុប២៥០វិញ្ញាសាឱ្យនិស្សិតប្រកួតប្រជែងចាប់ពីថ្ងៃទី២៥ មិថុនា ដល់៦ កក្កដា ឆ្នាំ២០២៤ នៅទីក្រុង Surabaya និង Malang របស់ខេត្ត East Java។
ព្រឹត្តិការណ៍កីឡានេះរៀបចំឡើងដំបូងតាំងពីឆ្នាំ១៩៨១ មកម៉្លេះ ដោយប្រកួតរាល់២ឆ្នាំម្តង ខណៈកម្ពុជា ទើបតែបានបញ្ជូនក្រុមចូលរួមប្រកួតបាន៥លើកប៉ុណ្ណោះ ព្រមទាំងធ្លាប់ឈ្នះបានមាស ១១គ្រឿង មេដាយប្រាក់ ២១ គ្រឿង និងមេដាយ សំរឹទ្ធិ ៣០ គ្រឿង។
ចំពោះការប្រកួតលើកនេះ កម្ពុជាបញ្ជូន ៦ប្រភេទកីឡា រួមមាន ប្រភេទកីឡាប៉េតង់, តេក្វាន់ដូ WT, អត្តពលកម្ម ,ការ៉ាតេ, ហែលទឹក និងយូដូ ដោយមានប្រតិភូសរុបចំនួន៤៥រូប។ កម្ពុជា បែងចែកការចេញដំណើរទៅប្រកួតជា២ក្រុម ដោយក្រុមទី១ មាន៣ប្រភេទកីឡា យូដូ ហែលទឹក និងប៉េតង់ និងក្រុមទី២ មានប្រភេទកីឡា អត្តពលកម្ម, តេក្វាន់ដូ WT និងការ៉ាតេ៕