តៃប៉ិ៖ ឆ្មាំសមុទ្ររបស់តៃវ៉ាន់បាននិយាយថា ក្រុមមន្ត្រីចិនបានឡើងជិះលើទូកនេសាទតៃវ៉ាន់ ដែលកំពុងប្រតិបត្តិការនៅជិតឆ្នេរសមុទ្ររបស់ប្រទេសចិន ក្បែរកោះដែលគ្រប់គ្រងដោយតៃវ៉ាន់ កាលពីល្ងាចថ្ងៃអង្គារ ហើយបន្ទាប់មកបានរឹបអូសទូកនេសាទនោះ ទៅកាន់កំពង់ផែរបស់ប្រទេសចិន ក្នុងគោលបំណងបង្កើនភាពតានតឹងបន្ថែមទៀត។ នេះបើយោងតាមការចេញផ្សាយដោយសារព័ត៌មាន Reuters នាថ្ងៃព្រហស្បតិ៍ ទី៤ ខែកក្កដា ឆ្នាំ២០២៤។
ឆ្មាំសមុទ្ររបស់តៃវ៉ាន់បាននិយាយថា ទូកនេសាទមឹកនេះ បាននៅក្នុងតំបន់ផ្ទៃទឹកប្រទេសចិន ប៉ុន្ដែក៏នៅក្បែរតំបន់កោះ Kinmen ដែលគ្រប់គ្រងដោយកោះតៃវ៉ាន់។
ជុំវិញបញ្ហានេះ ឆ្មាំសមុទ្របាននិយាយថា ទូកតៃវ៉ាន់កំពុងដំណើរការអំឡុងនៃការមិនអនុញ្ញាតឱ្យមានការនេសាទរបស់ចិន ដោយបន្ថែមថា តៃវ៉ាន់នឹងទំនាក់ទំនងជាមួយចិន និងជំរុញឱ្យពួកគេដោះលែងអ្នកនេសាទឱ្យបានឆាប់តាមដែលអាចធ្វើទៅបាន។ ខណៈចិន បាននិយាយថា ទង្វើនេះបំពានបម្រាមនេសាទនៅរដូវក្ដៅ និងធ្វើប្រតិបត្តិការទូកនេសាទដោយខុសច្បាប់លើដែនសមុទ្រចិន។
ជាមួយគ្នា ការិយាល័យកិច្ចការតៃវ៉ាន់ របស់ប្រទេសចិន មិនបានឆ្លើយតបភ្លាមៗ នោះទេ។ យ៉ាងណាម៉ិញ អគ្គនាយករងរដ្ឋបាលឆ្មាំឆ្នេរសមុទ្រតៃវ៉ាន់ លោក Hsieh Ching-chin បានប្រាប់អ្នកយកព័ត៌មាននៅទីក្រុងតៃប៉ិ ថា ប្រទេសចិនគួរតែពន្យល់ពីមូលហេតុដែលខ្លួនបានចាប់ទូកនោះ ហើយបានចង្អុលបង្ហាញថា អ្នកនេសាទត្រូវបានដោះលែងបន្ទាប់ពីបង់ប្រាក់ពិន័យនៅពេលប្រតិបត្តិការក្នុងរដូវមិនឱ្យនេសាទរបស់ប្រទេសចិន។
លោកបានបន្ថែមថា ទូកនេសាទតៃវ៉ាន់ ចាំបាច់ត្រូវបង្កើនកម្រិតប្រកាសអាសន្ន ហើយឆ្មាំឆ្នេរសមុទ្រក៏នឹងពង្រឹងការល្បាតរបស់ខ្លួនផងដែរ។ ឆ្មាំឆ្នេរសមុទ្រ ក៏អំពាវនាវឱ្យភាគីដីគោកកុំប្រើកត្តានយោបាយ ដើម្បីដោះស្រាយស្ថានភាពនេះផងដែរ។
បើមន្រ្តីម្នាក់បាននិយាយក្នុងលក្ខខណ្ឌមិនបញ្ចេញឈ្មោះថា នេះមិនមែនជាលើកទីមួយទេ ដែលទូកនេសាទតៃវ៉ាន់ត្រូវបានអាជ្ញាធរចិន រឹបអូសបាន បន្ទាប់ពីប្រតិបត្តិការនៅក្នុងដែនទឹករបស់ប្រទេសនោះ បានបំពានគ្នាទៅវិញទៅមក។
សូមជម្រាបថា ការរឹបអូសទូកនេសាទនេះ កើតឡើងចំពេលភាពតានតឹងរវាងចិន និងតៃវ៉ាន់ កំពុងកើនកម្ដៅខ្លាំង។ ចិន តែងចាត់ទុកតៃវ៉ាន់ជាអធិបតេយ្យភាពរបស់ខ្លួន ហើយបានដាក់សម្ពាធជាច្រើនលើកច្រើនសារទៅលើរដ្ឋាភិបាលក្រុងតៃប៉ិកាន់តែខ្លាំងក្លាជាងមុន គិតចាប់តាំងពីខែឧសភាកន្លងទៅ ក្រោយការឡើងកាន់តំណែងថ្មីរបស់លោកប្រធានាធិបតី Lai Ching-te។ ចិនបានចោទប្រកាន់លោក Lai ថាជាជនផ្ដាច់ខ្លួននិយម ដែលតែងតែប្រឆាំងនឹងសកម្មភាពរបស់ចិន៕
