សិល្បៈជាតិ៖ ក្រសួងវប្បធម៌ និងវិចិត្រសិល្បៈបានឲ្យដឹងថាវត្ថុបុរាណខ្មែរចំនួន១៤រូប ដែលត្រូវបានបញ្ជូនពីសារមន្ទីរ Metropolitan Museum of Art (MET) នៅសហរដ្ឋអាមេរិក បានមកដល់សារមន្ទីរជាតិកម្ពុជា ហើយនៅរសៀលថ្ងៃទី ៣ កក្កដា ២០២៤ ។
យ៉ាងណាមិញ នៅរសៀលថ្ងៃទី ០៤ ខែកក្កដា ឆ្នាំ២០២៤ នាយកដ្ឋានសារមន្ទីរ ក៏បានរៀបចំកម្មវិធី ប្រគល់-ទទួលវត្ថុបុរាណខ្មែរចំនួន១៤វត្ថុ ដែលប្រគល់ត្រឡប់មកប្រទេសកម្ពុជាផងដែរ។
បើតាមក្រសួងវប្បធម៌ បដិមាទេពស្រី (នាងឧមា) ដែលប្រគល់មកកាន់កម្ពុជាវិញនេះ កាលពីឆ្នាំ ២០២១ ក្រសួង បានរកឃើញប្រអប់ជើងនៃបដិមា ក្នុងរមណីយដ្ឋានប្រាសាទកោះកេរ និងផ្អែកលើសក្ខីកម្ម ពីអតីតបុគ្គលដែលបានលួចយកទៅថាបដិមារូបនេះ ត្រូវបានលួចចេញក្នុងឆ្នាំ១៩៩៧។
ក្រសួងវប្បធម៌បញ្ជាក់ទៀតថា ចំពោះបដិមាព្រះលោកេសូរ ត្រូវបានសារមន្ទីរ MET បានទិញយកពីលោក Douglas Latchford កាលពីឆ្នាំ១៩៩២ និងព្រះកេសព្រះលោកេសូរ ត្រូវបានលួចនៅក្នុងទសវត្សរ៍ឆ្នាំ ១៩៩០ ហើយដងខ្លួនបានរកឃើញនៅក្នុងទសវត្សរ៍ឆ្នាំ ១៩៣០ ក្នុងខេត្តបាត់ដំបង និងកំពុងតាំងនៅក្នុងសាមន្ទីរជាតិ។
លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ បញ្ជាក់ថា ការវិលត្រឡប់មកវិញនូវចម្លាក់ទាំងនេះមានតម្លៃសម្រាប់មនុស្សជាតិទាំងមូល។ លោកជំទាវបន្តទៀតថា កម្ពុជាប្ដេជ្ញាចិត្តបន្តស្វែងរក និងនាំយកមកវិញនូវព្រលឹងដូនតារបស់ខ្លួន ដែលបានឃ្លាតចាកឆ្ងាយពីទឹកដីកំណើតក្នុងអំឡុងសង្គ្រាមស៊ីវិលនិងអសន្តិសុខច្រើនទសវត្សរ៍កន្លងមកនេះ។
ចុងក្រោយ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ ការបញ្ជូនត្រឡប់មកវិញនៃព្រលឹងដូនតានេះបានរួម ចំណែកយ៉ាងសំខាន់ដល់ការផ្សះផ្សានិងការព្យាបាលរបួសផ្លូវចិត្តរបស់ប្រជាជនកម្ពុជា ដែលបានឆ្លងកាត់សង្គ្រាមស៊ីវិល ជាច្រើនទសវត្សរ៍ និងរងគ្រោះដ៏ឈឺចាប់ពីសោកនាដកម្មនៃអំពើប្រល័យពូជសាសន៍ខ្មែរក្រហម។ លទ្ធផលប្រកបដោយផ្លែផ្កានេះ ក៏បានបង្ហាញនូវទំនាក់ទំនងកាន់តែរឹងមាំឡើងជាមួយសហរដ្ឋអាមេរិក៕